ഇടതുസ്വതന്ത്ര​​െന്‍റ പിന്തുണയില്‍ പ്രതിപക്ഷം കൊണ്ടുവന്ന അവിശ്വാസം പാസായതോടെ ഇൗരാറ്റുപേട്ട നഗരസഭ ഭരണം എല്‍.ഡി.എഫിന്​ നഷ്​ടമായി. സി.പി.എം, സി.പി.ഐ, എസ്​.ഡി.പി.ഐ അംഗങ്ങള്‍ വിട്ടുനിന്നപ്പോള്‍ 15 കൗണ്‍സിലര്‍മാര്‍​ പ്ര​മേയത്തെ അനുകൂലിച്ചു. 28 അംഗങ്ങളാണ് നഗരസഭയിലുള്ളത്. നഗരസഭ അധ്യക്ഷന്‍ ടി.എം. റഷീദ്​, ഉപാധ്യക്ഷ കുഞ്ഞുമോള്‍ സിയാദ്​ എന്നിവര്‍ക്കെതിരെ യു.ഡി.എഫും ജനപക്ഷവും ചേര്‍ന്നാണ്​ അവിശ്വാസം ​െകാണ്ടുവന്നത്​. സി.പി.എമ്മിലെ ഭിന്നതയെ തുടര്‍ന്നായിരുന്നു​ പ്രതിപക്ഷനീക്കം. അവിശ്വാസചര്‍ച്ചയില്‍ പങ്കെടുക്കരുതെന്ന്​ കാട്ടി സി.പി.എമ്മും സി.പി.ഐയും അംഗങ്ങള്‍ക്ക്​ വിപ്പ് നല്‍കിയിരുന്നു.

എന്നാല്‍, എല്‍.ഡി.എഫിലെ വികസനകാര്യ സ്ഥിരംസമിതി അധ്യക്ഷന്‍കൂടിയായ വി.കെ. കബീര്‍ യോഗത്തില്‍ പ​െങ്കടുക്കുകയും അവിശ്വാസത്തിന്​ അനുകൂലമായി വോട്ട്​ ചെയ്യുകയുമായിരുന്നു. ഇതോടെ ചെയര്‍മാനും വൈസ്​ ചെയര്‍മാനും പുറത്തായി. അതേസമയം, വിപ്പ്​ ലഭിച്ചില്ലെന്ന്​ ​വി.കെ. കബീര്‍ പറഞ്ഞു. എന്നാല്‍, കബീര്‍ വിപ്പ്​ കൈപ്പറ്റാന്‍ തയാറാകാത്തതിനെതുടര്‍ന്ന്​ അദ്ദേഹത്തി​​െന്‍റ വീടിന്​ മുന്നില്‍ സി.പി.എം ജില്ല സെക്രട്ടറി നല്‍കിയ വിപ്പ്​ പതിച്ചിരുന്നു. 
സി.പി.എം അംഗമായിരുന്ന ചെയര്‍മാന്‍ ടി.എം. റഷീദിനോട്​ നേര​േത്ത പാര്‍ട്ടി നേതൃത്വം ചെയര്‍മാന്‍ സ്​ഥാനം ഒഴിയാന്‍ ആവശ്യപ്പെട്ടിരുന്നു. റഷീദ്​ ഇതിന്​ തയാറായില്ല. ഇതോടെ റഷീദി​​െന്‍റ പാര്‍ട്ടി അംഗത്വം സി.പി.എം ലോക്കല്‍ കമ്മിറ്റി പുതുക്കി നല്‍കിയിരുന്നില്ല.

ശനിയാഴ്​ച രാവിലെ 10.30 ന് കൊല്ലം നഗരസഭ ജോയന്‍റ്​ ഡയറക്ടര്‍ വി.ആര്‍. രാജുവി​​െന്‍റ മേല്‍നോട്ടത്തില്‍ നടന്ന ടി.എം. റഷീദിനെതിരായ അവിശ്വാസ പ്രമേയ ചര്‍ച്ചയില്‍ 15 കൗണ്‍സിലര്‍മാര്‍ പങ്കെടുത്തു. മുസ്​ലിം ലീഗിലെ എട്ട്​ അംഗങ്ങളും കോണ്‍ഗ്രസിലെ മൂന്ന്​ അംഗങ്ങളും ജനപക്ഷത്തിലെ മൂന്ന്​ അംഗങ്ങളും എല്‍.ഡി.എഫിലെ വി.കെ. കബീറുമാണ് എത്തിയത്. ഇവരെല്ലാം അനുകൂലമായി വോട്ട് ചെയ്തു. ചെയര്‍മാന്‍ അടക്കം ഒമ്ബത്​ എല്‍.ഡി.എഫ് കൗണ്‍സിലര്‍മാരും എസ്.ഡി.പി.ഐയിലെ നാല് കൗണ്‍സിലര്‍മാരും യോഗത്തിലെത്തിയിരുന്നില്ല. ഉച്ചകഴിഞ്ഞ് രണ്ടിന് നടന്ന കുഞ്ഞുമോള്‍ സിയാദിനെതിരായ അവിശ്വാസത്തിലും ഇൗ 15 പേരും പ്രമേയത്തിന് അനുകൂലമായി വോട്ട് ചെയ്തു.

ആറുമാസം മുമ്ബ്​ നഗരസഭാധ്യക്ഷന്‍ ടി.എം. റഷീദിനെതിരെ യു.ഡി.എഫ്​ ​​​കൊണ്ടുവന്ന അവിശ്വാസം പരാജയപ്പെട്ടിരുന്നു. 15 പേര്‍ ഒപ്പിട്ടു നല്‍കിയ അവിശ്വാസപ്രമേയ ചര്‍ച്ചയില്‍നിന്ന്​ ജനപക്ഷത്തെ കുഞ്ഞുമോള്‍ സിയാദ് വിട്ടുനിന്നതോടെ അവിശ്വാസം പരാജയപ്പെടുകയായിരുന്നു. ഇത്തവണ 14 പേര്‍ ഒപ്പിട്ട അവിശ്വാസമാണ്​ യു.ഡി.എഫും ജനപക്ഷവും ചേര്‍ന്ന് നല്‍കിയത്. യു.ഡി.എഫി​​െന്‍റയും ജനപക്ഷത്തി​​െന്‍റയും പിന്തുണയില്‍ അവിശ്വാസത്തെ അനുകൂലിച്ച വി.കെ. കബീര്‍ അടുത്ത ചെയര്‍മാനായേക്കും.

കബീറിനെ പിന്തുണക്കുമെന്ന്​ ഇരുപാര്‍ട്ടികളും അറിയിച്ചു. അതേസമയം, കബീറിനെ അയോഗ്യനാക്കണമെന്നാവശ്യപ്പെട്ട്​ തെരഞ്ഞെടുപ്പ്​ കമീഷനെ സമീപിക്കാനാണ്​ എല്‍.ഡി.എഫ്​ തീരുമാനം. എസ്​.ഡി.പി.​െഎയുടെയും ജനപക്ഷത്തി​​െന്‍റയും പിന്തുണയോടെയായിരുന്നു എല്‍.ഡി.എഫ്​ ഭരണത്തിലെത്തിയത്​. പിന്നീട്​ ചെയര്‍മാനുമായി സി.പി.എമ്മും ജനപക്ഷവും ഭിന്നതയിലാവുകയുമായിരുന്നു. സി.പി.എമ്മിന്​ എട്ടും സി.പി.​െഎക്ക്​ രണ്ടും അംഗങ്ങളായിരുന്നു ഉണ്ടായിരുന്നത്​. വന്‍ പൊലീസ് സുരക്ഷയിലായിരുന്നു അവിശ്വാസപ്രമേയ ചര്‍ച്ച. പാലാ ഡിവൈ.എസ്​.പിയുടെ നേതൃത്വത്തില്‍ 200 ഓളം പൊലീസുകാരെയാണ്​ നഗരത്തില്‍ വിന്യസിച്ചിരുന്നത്.