ജോണ്‍ മാത്യു
ഒരിക്കല്‍ പരിചയിച്ച ചിട്ടകള്‍ നൂറുശതമാനവും ശരിയെന്നുതന്നെ വിവിധ സമൂഹങ്ങള്‍ വിശ്വസിക്കുന്നു. ഒരു ജനതയുടെ ധര്‍മ്മബോധം, സദാചാര നിഷ്ഠകള്‍, ദേശത്തിലെ മറ്റ് സമ്പ്രദായങ്ങള്‍, ഭക്ഷണരീതികള്‍, ഭൂമിശാസ്ത്രം എന്നുവേണ്ട ഒട്ടനവധി ഘടകങ്ങളാണ് മനുഷ്യജീവിതത്തെ ക്രമപ്പെടുത്തുക. കേരളത്തില്‍ ജനിച്ച ഒരാള്‍ ഏറ്റവും അടുത്ത സ്വന്തക്കാരല്ലാതെ മറ്റൊരാള്‍ തൊട്ട ഭക്ഷണം കഴിക്കുമോ? "എച്ചിലായി' എന്നവാക്ക് നിരന്തരം മനസ്സില്‍ കൊണ്ടുനടക്കുന്നവരാണ് നമ്മള്‍.
ഉത്തരേന്ത്യാക്കാര്‍ ഒരേ പ്ലേറ്റില്‍നിന്ന് ഭക്ഷണം പങ്കിടുന്നത് എത്ര അറപ്പോടെയാണ് അവിടെ ജീവിക്കേണ്ടതായി വന്ന മലയാളികള്‍ തുടക്കത്തില്‍ കണ്ടിട്ടുള്ളത്. നാമൊക്കെ ഏതാനും പതിറ്റാണ്ടുകള്‍ക്ക് മുന്‍പുവരെ ഇങ്ങനെയായിരുന്നു. ഇന്നത്തെ ധൃതഗതിയിലുള്ള മാറ്റത്തില്‍ എന്തെല്ലാം ഒലിച്ചുപോയി എന്ന് എനിക്കറിയില്ല. ഇത്രയും എഴുതാന്‍ കാരണം ഈ അടുത്തകാലത്ത് വാര്‍ത്തകളില്‍ നിറഞ്ഞുനിന്ന ചുംബന സമരമാണ്. വിദേശരാജ്യങ്ങളിലേക്കുണ്ടായ കുടിയേറ്റം, സാങ്കേതികമുന്നേറ്റങ്ങള്‍ തുടങ്ങിയവ മറ്റുദേശങ്ങളിലെ രീതികള്‍ അടുത്തറിയാന്‍ കേരളീയര്‍ക്കു ഇടയുണ്ടാക്കി, ചിലപ്പോള്‍ അത് പറഞ്ഞുകേട്ടതും അബദ്ധജടിലങ്ങളുമായ അറിവാണെങ്കില്‍ക്കൂടി. "സോഷ്യലിസം', "ഇടതുപക്ഷം', "ഭാഷയിലെ സ്വതന്ത്രപ്രയോഗങ്ങള്‍' എന്നിവ പുരോഗമനപ്രസ്ഥാനങ്ങളായിട്ടാണ് കണക്കാക്കപ്പെടുന്നത്. ഇതിനും പുറമേയാണ് വിദ്യാര്‍ത്ഥി പ്രസ്ഥാനങ്ങള്‍.
രാഷ്ട്രീയകക്ഷികളുടെ ചാവേറുകളായിട്ടാണ് അവര്‍ വിദ്യാര്‍ത്ഥികളെ കണക്കാക്കിയിട്ടുള്ളത്. കാരണം വിദ്യാര്‍ത്ഥികള്‍ "പുരോഗമന'ക്കാരാണ്, ഉത്തരവാദിത്തമില്ലാതെ അവര്‍ക്ക് എന്തും പറയുകയുമാവാം. എന്തിനും സമരവും തുടങ്ങാം. അമ്പതുകളിലും അറുപതുകളിലും പ്രസ്ഥാനങ്ങള്‍ ഇടത്തോട്ട് തിരിഞ്ഞിരുന്നതുപോലെ ഇന്നത്തെ മാറ്റം വലത്തോട്ടാണ്. ഈ മാറ്റങ്ങള്‍ ഒന്നുമാറിനിന്ന് കാണുന്നവര്‍ക്ക് അറിയാം ഇതില്‍ വലിയ കഥയൊന്നുമില്ലെന്ന്. ഇടതില്‍ ഇടതായ കക്ഷികള്‍ എന്നെങ്കിലും സമ്പൂര്‍ണ്ണ അധികാരം പിടിച്ചെടുത്താല്‍ അവരായിരിക്കും ഇന്ത്യയിലെ ഹിന്ദുമഹാസഭയേക്കാള്‍ ഏറെ യാഥാസ്ഥികര്‍, അമേരിക്കയിലെ ക്രൈസ്തവവലതുപക്ഷക്കാരേക്കാളും ഏറെ സാമൂഹിക യാഥാസ്ഥികര്‍! ഇനിയും അമേരിക്കയെ അപേക്ഷിച്ച് എത്രയോ അധികം യാഥാസ്ഥിതികമായിരുന്നു മുക്കാല്‍നൂറ്റാണ്ടുകാലത്തെ സോവിയറ്റ് റഷ്യന്‍ സമൂഹം. പ്രസംഗിച്ചുകൊണ്ടിരുന്നതും സ്വപ്നംകണ്ടതുമായ "സാമൂഹിക പുരോഗമനം' ലോകത്തില്‍ ഒരു കമ്മ്യൂണിസ്റ്റ് രാജ്യവും നടപ്പാക്കിയിട്ടില്ല, പകരം പാരമ്പര്യത്തിലേക്ക് ഏറെ മടങ്ങിപ്പോകുകയും ചെയ്തു.
ആ രാജ്യങ്ങളില്‍ സ്ത്രീകളാരെങ്കിലും ഭരണതലപ്പത്ത് എത്തിയിട്ടുണ്ടോ? സ്വവര്‍ഗ്ഗ ബന്ധങ്ങള്‍, മയക്കുമരുന്നുപയോഗങ്ങള്‍, മതസ്വാതന്ത്ര്യം തുടങ്ങി ലിബറലിസ്റ്റുകള്‍ക്ക് പ്രിയപ്പെട്ട പലതിനും എതിരായി തീവ്രപോരാട്ടം നടത്തുന്നതും കമ്മ്യൂണിസ്റ്റുകള്‍ത്തന്നെ. സാമൂഹിക ലിബറലുകള്‍ എന്നുപറഞ്ഞ് ചമയുന്നവര്‍ക്ക് തങ്ങള്‍ പമ്പരവിഡ്ഢികളായിയെന്ന തിരിച്ചറിവ്, അത്, ഏതെങ്കിലും ഒരുകാലത്ത് സംഭവിച്ചാല്‍ ഭാഗ്യം! ചുംബനസമരത്തെപ്പറ്റിയാണല്ലോ പറഞ്ഞുവന്നത്. സാമൂഹിക അവകാശങ്ങള്‍ക്കുവേണ്ടിയുണ്ടായിരുന്ന ഏതോ സമരം പോലെയാണോ ഈ ചുംബനസമരവും? മറ്റുനാടുകളിലെല്ലാം ജനം വഴിനീളെ നടന്ന് ചുംബിക്കുന്നുവെന്നും, കേരളത്തില്‍ സദാചാരപ്പോലീസ് കാരണം അതു നടപ്പില്ലെന്നും അതുകൊണ്ട് ചുംബനത്തിനുള്ള അവകാശം നേടിയെടുക്കണമെന്നുമായിരിക്കാം ചുംബനാനുകൂലികള്‍ വാദിക്കുന്നത്. ഇവിടെ രസകരമായ ഒരു വസ്തുത ഇഷ്ടപ്പെട്ട ആണും പെണ്ണും മാത്രം നിന്ന് ഉമ്മവെക്കാനുള്ള കഴിവ് ഈ സമരക്കാര്‍ക്കില്ലെന്നതാണ്. ഇവരുടെ ചുംബനത്തിന് പത്തുമുന്നൂറുപേരെങ്കിലും ചുംബനചങ്ങാതികളായി വേണം.
പിന്നെ ചുറ്റും കാണികള്‍ ഒരു പതിനായിരവം വേണം, പോലീസും കൂടിയേ തീരൂ. ഇനിയും പത്രക്കാര്‍ കണിശമായും ഉണ്ടായിരിക്കണം. ഇല്ലെങ്കില്‍ വിളിച്ചുവരുത്തും. പത്രക്കാരില്ലാതെ കേരളത്തില്‍ എന്തുസമരം. പക്ഷേ ഇവര്‍ മറന്നതാണെന്ന് ഇവിടെ എഴുതുന്നില്ല, പാശ്ചാത്യദേശങ്ങളില്‍ ചുംബിക്കേണ്ടവര്‍ ഇതുപോലെ ജനപ്രളയം സൃഷ്ടിച്ചിട്ടില്ല കാര്യം സാധിക്കുന്നത്. കൂട്ടത്തില്‍ പാടാനും വെള്ളത്തില്‍പൂട്ടാനും പണ്ടേ നമ്മളൊക്കെ മിടുക്കരാണല്ലോ. നമുക്കറിയാം കേരളത്തില്‍ ഒറ്റക്ക് ഈ വേണ്ടാതീനത്തിനൊക്കെ ഇറങ്ങിച്ചിരിച്ചാല്‍ "സദാചാരപ്പോലീസിന്റെ' കരിങ്കല്‍ച്ചീളുകളായിരിക്കും മുതുകത്ത് പതിക്കുക, പട്ടിയെ എറിയുന്നതുപോലെ! പുരോഗമനവാദികളായ ചില അമേരിക്കന്‍ മലയാളികളും കലക്കവെള്ളത്തില്‍ മീന്‍പിടിച്ചാലോ എന്ന് ചിന്തിച്ചുപോയി. അവര്‍ക്ക് അമേരിക്കയിലെ മലയാളികളുടെ പള്ളികളിലോ ഓണാഘോഷവേളയിലോ ചുംബിക്കാനുള്ള ധൈര്യമില്ലാത്തതുകൊണ്ടാണ് ഞാന്‍ എഴുതുന്നില്ല. പകരം ഇവിടെ ""അനുവാദ''മില്ലാത്തതിന്റെ പ്രതിഷേധം കേരളത്തിന്റെ മണ്ണില്‍ത്തന്നെ രേഖപ്പെടുത്തുകയാണ്.
അങ്ങനെ തങ്ങള്‍ ജീവിക്കുന്ന അമേരിക്കയില്‍ ഒന്നു ചുംബിക്കാനുള്ള അവകാശം നേടിയെടുക്കാന്‍ കേരളത്തില്‍പ്പോയത് എന്തായാലും ഗിന്നീസ്ബുക്കിലും ഒപ്പിക്കാം. അതിന് ചിലര്‍ വലിയവലിയ പുരസ്ക്കാരങ്ങള്‍ നേടുന്നതുപോലെ ""ഉടന്‍ വരുന്നൂ'' എന്നൊരു പരസ്യവും കൊടുക്കാം.
Comments