കാലങ്ങളായി കോഴ ഉണ്ടെങ്കിലും ഈ സമീപകാലത്ത് വേദിയിലും, വീഥിയിലും ഏതാണ്ട് സര്വ്വ മണ്ഡലങ്ങളിലും കോഴാ.... കോഴാ.... എന്ന പേര് മുഴങ്ങി കേള്ക്കുന്നു. ഏതായാലും നാട്ടിലെ പാലാക്ക് അടുത്തുള്ള കോഴ, പത്തനംതിട്ട ജില്ലയിലെ കോഴഞ്ചേരി പിന്നെ നമ്മുടെ കോഴഞ്ചേരി സംഗമം എന്നീ 'കോഴ' പദം ചേര്ത്ത സ്ഥലനാമക്കാരും പ്രസ്ഥാനക്കാരും ക്ഷമിക്കണം. ഇപ്പോള് കോഴ എന്ന പദം സകലരും ജപമാല ചൊല്ലുന്നതുപോലെ ഉരുവിട്ടുരുവിട്ട് മഹത്തീകരിച്ചു. ഇപ്പോള് നമ്മുടെ ശ്രദ്ധ അങ്ങോട്ട് കോഴയിലേക്കായി. നല്ലകാര്യം. സംഗതികളുടെ കിടപ്പ് ഇങ്ങനെയൊക്കെ ആയിരിക്കെ നമ്മുടെ ഫൊക്കാനാ, ഫോമാ, വേള്ഡ് മലയാളി, വേള്ഡ് വൈഡ് മലയാളി, ഗ്ലോബല് മലയാളി, പ്രവാസി മലയാളി, പ്രയാസ മലയാളി എന്നീ എണ്ണിയാലൊടുങ്ങാത്ത മലയാള സംഘടനകള് ഇങ്ങനെ വൃഥാ ഞാനൊന്നുമറിഞ്ഞില്ലെ രാമനാരായണ എന്ന മട്ടില് ആസനത്തിലൊ സിംഹാസനത്തിലൊ കുത്തിയിരുന്നാല് മതിയൊ? ഒന്നനങ്ങണ്ടെ... ഒന്നനക്കി കൊടുക്കണ്ടെ.... വല്ലതുമൊക്കെ ഒന്നു ചെയ്യണ്ടെ? അല്ലെങ്കിലെന്താ ഒരു ത്രില്ല്. സംഘടനകള് സംഘടിക്കണം, സംഘടിപ്പിക്കണം, പ്രകടനം നടത്തണം, കുറഞ്ഞപക്ഷം പത്രത്തിലെല്ലാം ഒറ്റയായും പെട്ടയായും ഫോട്ടോകളെടുത്ത് പൊന്നാട ചാര്ത്തി നിന്ന് പ്രതിഷേധ കുറിപ്പുകള് ഒരു പെരുമഴ മാതിരി പ്രത്യക്ഷപ്പെടണം.
ഫൊക്കാനയും ഫോമയും മറ്റും മറ്റും അതുണ്ടായ കാലം മുതല് ഓരോ വര്ഷവും ഇതാ പുതുപുത്തന് പരിപാടികള്, പദ്ധതികള് എന്നും പറഞ്ഞ് പഴയ വീഞ്ഞ് എപ്പോഴും പുതിയ കുപ്പിയില് അവതരിപ്പിക്കാറുണ്ട്. അതായത് ചോറും സാമ്പാറും ഇക്കൊല്ലം തന്നാല് അടുത്ത കൊല്ലം, അവര് തരും, സാമ്പാറും ചോറും, ഇതു മാത്രം പരസ്പരം ഓരോ വര്ഷവും മാറ്റി മറിച്ച് പുതുമയാണെന്ന് പറഞ്ഞ് അവതരിപ്പിക്കുന്നു. എന്നാലിതാ തികച്ചും പുതുമയുള്ളതും വ്യത്യസ്ഥവുമായ ഒരു പദ്ധതി ഫൊക്കാനക്കും ഫോമക്കും. മറ്റേത് സംഘടനക്കും പരീക്ഷിക്കാനൊ പ്രവൃത്തിപഥത്തില് കൊണ്ടുവരാനൊ അങ്ങ് എറിഞ്ഞിട്ടു തരികയാണ്. ലേഖകന്റെ ഈ പുതിയ കണ്ടുപിടുത്തത്തിന്റെ അല്ലെങ്കില് നിര്ദ്ദേശത്തിന്റെയൊ പേരില് ലേഖകനെ വ്യക്തിപരമായി അവാര്ഡ് നല്കിയും ഫലകം തന്നും പൊന്നാട ചൂടിച്ചും തൊപ്പിയിട്ടും അപമാനിക്കുകയും അവഹേളിക്കുകയും ചെയ്യരുതേ.. എന്ന് താണുകേണ് അപേക്ഷിക്കുന്നു. അതെല്ലാം അര്ഹിക്കുന്നവര്ക്കും പിന്നെ ചൊറിയുന്നവര്ക്കും കാശുമുടക്കുന്നവര്ക്കും ഗ്ലാമര് ഉള്ളവര്ക്കും കൊടുത്ത് ബഹുമാനിക്കുക.
എന്താണ് സംഘടനകളും സംഘാടകരും ചെയ്യേണ്ടത്. സംഗതി നിസ്സാരം. ഇവിടെ മുഖ്യവിഷയം കോഴായും പാലായിലെ മാണിക്യം എന്ന് ചിലര് കൊട്ടിഘോഷിക്കുന്ന കേരള ധനമന്ത്രി കെ.എം. മാണി, മണി മേടിച്ചു, ഭവനത്തില് മണി എണ്ണുന്ന യന്ത്രം ഉണ്ട് എന്നതൊക്കെ ആണല്ലൊ. എന്നാല് പുള്ളിയാകട്ടെ ഞാന് ശുദ്ധന്-പരിശുദ്ധന് എന്നൊക്കെ പറഞ്ഞ് മറ്റൊരു പുണ്യാളന്റെ മാതിരി അങ്ങ് രൂപക്കൂട്ടിലേക്കു കേറുകയാണ്. വിശുദ്ധരായ അല്ഫോന്സാമ്മയുടെയും, കുര്യാക്കോസ് ഏലിയാസച്ചന്റേയും ഏവുപ്രാസി അമ്മയുടേയും പ്രസക്തി തന്നെ പാലായിലെ മാണിക്യം അടിച്ചെടുക്കുമോ എന്നാണ് സംശയം. അങ്ങനെ നമ്മുടെ ചര്ച്ചാ വിഷയമായ കോഴ അല്ലെങ്കില് മണി മേടിയ്ക്കാത്തവരായ ധാരാളം പുണ്യജന്മങ്ങള് അങ്ങ് ഭരണപക്ഷത്തും പ്രതിപക്ഷത്തും ഉണ്ടെന്ന് പറയപ്പെടുന്നു. അഷ്ടിക്കു വകയില്ലാത്ത മുഴുപട്ടിണി പാവങ്ങളായി തീരുമ്പോള് അവര് അറിയാതെ മണി അല്ലെങ്കില് കോഴ വാങ്ങുന്നതില് എന്താണ് തെറ്റ് എന്ന് ചിലര് ചോദിക്കുന്നു. അത്തരത്തിലൊരാളായ നമ്മുടെ കുഞ്ഞുമാണിയുടെ പട്ടിണി അകറ്റാനായി ഒരു പട്ടിണി ഫണ്ട് അല്ലെങ്കില് ഒരു കോഴ ഫണ്ട് ശേഖരണാര്ത്ഥം ഫെയിസ് ബുക്കില് ആഷിക് അബു എന്നൊരാള് ഒരു കുറിപ്പ് എഴുതിയതിന്റെ പേരില് അഷ്ടിക്ക് വകയില്ലാത്ത മാണിക്കായി കൊച്ചു കൊച്ചു ചില്ലിക്കാശുകള് ഡ്രാഫ്റ്റ് ആയും മണി ഓര്ഡറായും പാലായിലേക്കൊഴുകി എത്തിയത്രെ. കൊടുക്കാന് കാശില്ലാത്ത ചിലര് പള്ളിപ്പെരുന്നാളിലും ഉല്സവപറമ്പിലും പോയി തെണ്ടി കാശ് പിരിച്ച് മാണിയുടെ വിലാസത്തില് അയച്ചുവത്രെ. ചിലര് കുട്ടികളെ കൊണ്ട് പഴയമാതിരി തിപ്പെട്ടി അരി ശേഖരണവും നടത്തി. അങ്ങനെ കോഴ ഫണ്ട് ഒരു ഇറച്ചികോഴിയുടെ മാതിരി കൊഴുത്ത് കൊഴുത്ത് ചെനക്കി ചെനക്കി പാലായിലെത്തി കൊക്കരക്കൊ കൊക്കരക്കൊ... എന്ന് കൂവി മാണിയുടെ സൈ്വര്യം കെടുത്തിയപ്പോള് നമ്മുടെ അമേരിക്കന് മലയാളി സംഘടനാ നേതാക്കളുടെ മനസ്സില് ഉദിക്കുന്ന ഒരു പുതുപുത്തന് ആശയം പോലെ മാണിയുടെ മനസ്സിലും പുത്തന് ആശയം ഉദിച്ചു.
തന്റെ വിലാസത്തിലെത്തുന്ന ഈ പട്ടിണി ഫണ്ട്, കോഴി അല്ലെങ്കില് കോഴാ ഫണ്ട്് വഴിതിരിച്ച് കേരളാ ഗവണ്മെന്റിന്റെ കാരുണ്യാ ഫണ്ടിലേക്ക് അങ്ങ് അയച്ചേക്കാമെന്ന്.. ഇപ്പോ... ഫോമാ... ഫൊക്കാനക്കാര്ക്ക് പറഞ്ഞു വരുന്ന ആശയം പിടികിട്ടിയൊ. പച്ചക്ക് അങ്ങു പറയാം.. ഫൊക്കാനാ വര്ഷങ്ങളായി ഭാഷക്ക് ഒരു ഡോളര് എന്ന പേരിലും ഫോമാ ഭാഷക്ക് ഒരു പിടി ഡോളര് എന്ന പേരിലും നമ്മുടെയിടയില് കൊച്ചുകാശ് പിരിക്കാറില്ലെ? അത് ഭാഷക്ക് വല്ല ഗുണവും ചെയ്യുന്നുണ്ടോ. അതൊ വെറും ഫോട്ടോ ഓപ്പര്ച്ചുനിറ്റി പബ്ലിസിറ്റി സ്റ്റണ്ടാണൊ എന്ന കാര്യത്തില് പലര്ക്കും സംശയമുണ്ട്. അതെന്തുമാകട്ടെ... ഇതാണ് ലേഖകന് നിര്ദ്ദേശിക്കുന്ന പുതിയ പദ്ധതി. ഫൊക്കാനാ ഉടന് തന്നെ കോഴക്കൊരു ഡോളര് എന്ന പേരിലും ഫോമാ കോഴക്കൊരു പിടി ഡോളര് എന്ന പേരിലും ഒരു നിത്യസഹായനിധി ആരംഭിക്കണം. പിരിവ് ഉടന് തുടങ്ങണം. അതിന്റെ ഒറ്റയായും പെട്ടയായുമുള്ള പത്രക്കുറിപ്പുകളും ഫോട്ടോകളും പത്രമാധ്യമ താളുകളില് നിറയുകയും വേണം. അതാണ് പ്രധാനം. എല്ലാം എഴുതാന് ആളില്ലെങ്കില് മണികൊടുത്ത് നാട്ടില് നിന്നുള്ള എഴുത്തുകാരേയും റിപ്പോര്ട്ടറന്മാരേയും ഹയര് ചെയ്യണം. നമ്മുടെ ഇവിടെ വെട്ടിത്തിളങ്ങി നിന്ന് അവാര്ഡുകള് വാരിക്കൂട്ടുന്ന ചില സാഹിത്യ ശിരോമണികളോടു ചോദിച്ചാല് മാത്രം മതി അവര് നാട്ടിലെ ഔട്ട്സോഴ്സിംഗ് എഴുത്തുകാരെ പറ്റി റിപ്പോര്ട്ടറന്മാരെ പറ്റി വിവരങ്ങളും റെയിറ്റും പറഞ്ഞു തരും.
പിന്നെ ഈ ശേഖരിക്കുന്ന കോഴക്കൊരു ഡോളര് അല്ലെങ്കില് കോഴക്കൊരു പിടി ഡോളര് പാലായിലെ മാണികുഞ്ഞ് ചേട്ടനുമാത്രം കൊടുത്ത് തിരിച്ചുവേദം അല്ലെങ്കില് ഡിസ്ക്രിമിനേഷന് കാണിക്കരുത്. മറിച്ച് നാട്ടിലെ എല്ലാ കോഴ മന്ത്രിമാര്ക്കും, ഉദ്യോഗസ്ഥര്ക്കും തുല്യമായി വീതിച്ച് ഗഡുക്കളായി കൊടുക്കണം. അതാണ് ജസ്റ്റിസ് ഫോര് ഓള് എന്നുപറയുന്നത്. 'ജസ്റ്റിസ് ഫോര് ഓള്'പ്രസ്ഥാനത്തിന്റെ ഒരു ചെറു പ്രവര്ത്തകനും അഭ്യുദയകാംക്ഷിയുമായ ഈ ലേഖകനും ചെറുവിരല് അനക്കി സഹായിക്കാന് സന്നദ്ധനാണെന്ന വിവരം അറിയിക്കുന്നു. ജീവിക്കാന് വകയില്ലാത്തതു കൊണ്ടാണല്ലൊ ഇവരെല്ലാം കോഴ മേടിക്കുന്നത്. ഇവിടെ ഡോളറൊക്കെ മരത്തില് നിന്ന് കുലുക്കി പറിച്ചെടുക്കുന്ന അമേരിക്കന് മലയാളി പ്രവാസികള്ക്ക് പ്രയാസമില്ലാതെ ഈ കോഴക്കൊരു ഡോളര് പദ്ധതിയിലേക്കൊ, കോഴക്കൊരുപിടി ഡോളര് പ്രസ്ഥാനത്തിലേക്കൊ ഉദാരമായി സംഭാവന ചെയ്യാമല്ലൊ. കോഴി പിടുത്തം ഡോളര് ആയാലും കുഴപ്പമില്ല. പക്ഷെ ഈ മണി എണ്ണുന്ന യന്ത്രമുണ്ടല്ലൊ, അതും വേണം. കേരളത്തിലെ എല്ലാ തെണ്ടികളുടെ ചെറ്റക്കുടിലിലും അല്ലെങ്കില് മണിമാളികയിലും ഉണ്ടല്ലൊ ഈ യന്ത്രം. ഈ തെണ്ടി കിട്ടുന്ന നാണയങ്ങളും നോട്ടുകളും അടങ്ങുന്ന മണി യന്ത്രത്തിനല്ലെ എണ്ണി തിട്ടപ്പെടുത്താന് പറ്റൂ. അല്ലാതെ മാനുവലായി എണ്ണുക ഈ തെണ്ടികള്ക്ക് അസാധ്യമാണ്. അല്ലെങ്കില് മാസ്റ്റര് കാര്ഡും വിസാ കാര്ഡും തെണ്ടികള് സ്വീകരിക്കണം.
ഫൊക്കാന-ഫോമ തുടങ്ങിയ ആനകള്ക്ക്, ആമകള്ക്ക്, കോഴക്ക് ഒരു ഡോളര് എന്ന രീതിയില് വന്പിരിവു നടത്താം. ഫൊക്കാന തുടങ്ങിയ ആനകള് വലിയ പിണ്ടമിടുമ്പോള് കൊച്ചു പിടിയാന സംഘടനകള് ചെറിയ കാഷ്ടമെങ്കിലും ഇടുന്നത് ഒരു മര്യാദയല്ലെ? ജസ്റ്റീസ് ഫോര് ഓള് സംഘടനയും കോഴക്കൊരു ഡോളര് എന്നതിനു പകരം കോഴക്കൊരു പെന്നി എന്നെങ്കിലും പറഞ്ഞ് ഉടന് ഒരു ഫണ്ട് പിരിച്ച് സത്വരമായി ആരംഭിച്ച് പേരെടുക്കണം. പിന്നെ അമേരിക്കയിലെ എല്ലാ പ്രവാസി നാട്ടുകൂട്ടങ്ങളും കോഴക്കൊരു പെന്നി ഫണ്ട് പിരിവ് ഉല്ഘാടനം ചെയ്യണം. ഫോമ-ആമ തുടങ്ങിയ മഹാപ്രസ്ഥാനങ്ങള്ക്ക് ആമയുടെ മാതിരി നല്ല തൊലിക്കട്ടിയും പ്രതാപവും ഉള്ളതിനാല് കോഴക്കൊരു പിടി ഡോളര് പദ്ധതി അതിഭയങ്കരവും, പരമ രസകരവുമായ ലാലിസം പരിപാടി വെദിയില് അവതരിപ്പിച്ചുകൊണ്ട് ഉല്ഘാടനം ചെയ്യാം. ലാലിസമില്ലെങ്കില് പിന്നെന്താ ഒരു രസവും, ഇമ്പവും. കമ്മ്യൂണിസവും, സോഷ്യലിസവും, മാര്ക്സിസവും പഴയ റഷ്യയുടെ പ്രതാപം അവസാനിച്ചതോടെ തകര്ന്നു എന്നാണല്ലൊ പറയുന്നത്. ഇനി ലാലിസമന്ത്രം മലയാളികള്ക്ക് പരീക്ഷിക്കാം. പിന്നെ ബാപ്റ്റിസം, റേസിസം, ലിബറലിസം ഒന്നും അത്ര കണക്കില് കൊള്ളിക്കേണ്ട. ഉല്ഘാടനത്തില് ഒരു കേരളാ സ്റ്റൈല് കൂട്ടയോട്ടവും വേണം. ഓട്ടത്തില് നമ്മുടെ അമേരിക്കന് മലയാളി നേതാക്കളോടൊപ്പം കേരളത്തില് നിന്നെത്തുന്ന രാഷ്ട്രീയ-സിനിമാ-സാഹിത്യ സിലിബ്രിറ്റികള് മുന്നില് നില്ക്കണം. എന്നാല് മാത്രമെ ഉല്ഘാടനത്തിന് ഒരു കുതിപ്പും കിതപ്പും കിട്ടുകയുള്ളൂ. ഓഡിറ്റോറിയത്തില് ഓഡിയന്സായി ആരും ഇല്ലേലും സാരമില്ല. അവിടെ മൈക്കിന്റെ പാപ്പാനും ഫോട്ടോ വീഡിയോ പിടുത്തക്കാരും എടുപ്പുകാരും മതി. പക്ഷെ സംഘടനാ സ്ഥാപക നേതാക്കന്മാരടക്കം സകലരും ഭദ്രദീപം കൊളുത്തണം. കൂട്ടത്തില് മലയാളമൊ ഇംഗ്ലീഷൊ കൊരച്ച് കൊരച്ച് ഒരു പ്രത്യേക ആക്കസന്റെില് പറയുന്ന ഒന്നോ രണ്ടോ ഗ്ലാമര് സുന്ദരി അവതാരികമാരാകാം. അതായത് സ്റ്റേജില് അതിഭയങ്കര ക്രൗഡ് ഉണ്ടായിരിക്കണം.
അമേരിക്കയില് അധികവും കോഴ വാങ്ങാത്തതിനാലായിരിക്കണം ഇംഗ്ലീഷില് 'ഴ' എന്ന് എഴുതാനോ ഉച്ചരിക്കാനൊ ഒരു പദമില്ലാത്തത്. അവരോട് കോഴ എന്നുച്ചരിക്കാന് പറഞ്ഞാല് അവര് പറയും 'കോളാ' ന്ന്. അതുപോലെ വാഴപ്പഴത്തിന് അവര്പറയും വാളപ്പളം എന്നും കോഴഞ്ചേരിക്ക് കോളഞ്ചേരി, കോഴിക്ക് കോളി, ബാര്കോഴക്ക് ബാര്കോള, അല്ലെങ്കില് ബാര്കോയ, എന്നൊക്കെ അവര് പറയും. ഇവിടെ ജനിക്കുന്ന നമ്മുടെ മലയാളി കുട്ടികള്ക്കം ഴ പറയാന് അറിയില്ല. അവരുടെ നാക്ക് അതിന് വഴങ്ങില്ല. അതിനാല് അവര് നമ്മളേക്കാള് 'കോഴ' വാങ്ങാത്തവരും സത്യസന്ധരുമായിരിക്കും.
നെല്ലും പതിരും എന്നാണല്ലൊ. അല്പം പതിരും പറയാം. സത്യത്തില് കോഴക്ക് ഒരു ഡോളര് അല്ലെങ്കില് കോഴക്ക് ഒരു പിടി ഡോളര് പദ്ധതി കോഴയും കൈക്കൂലിയും വാങ്ങുന്നവര്ക്കെല്ലാം എതിരായ ഒരു ഗാന്ധിമാര്ഗ്ഗ സമരമാണ്. ഇടതു കരണത്ത് അടി വരുമ്പോള് വലതു കരണം കൂടി കാണിച്ചു കൊടുക്കുന്ന ഒരു സമരം. കോഴവാങ്ങുന്നവര്ക്ക് അല്പ്പം കൂടെ മണി ഉന്തിക്കൊടുക്കുന്ന ഒരു പരിപാടി. കോഴ വാങ്ങുന്നവര് ഇത് കണ്ടും കേട്ടും അനുഭവിച്ചും അവഹേളിതരായി കൈക്കൂലി വാങ്ങലും കോഴ വാങ്ങലും നിര്ത്തണം. ഇവിടെ മാണി മാത്രമല്ല കുറ്റക്കാര് അല്ലെങ്കില് കുറ്റം ആരോപിക്കപ്പെട്ടവര് അതിലും വലിയ കോഴ വാങ്ങിയ കൊലകൊമ്പന്മാര് ഇപ്പോഴും മുമ്പും നമ്മുടെ മന്ത്രിസഭകളിലുണ്ടായിരിക്കാം. എന്നാല് പിടിക്കപ്പെടുന്നവരാണ് ക്രൂശിക്കപ്പെടുന്നവര്. കക്കാന് പഠിച്ചാല് പോരാ നില്ക്കാനും പഠിക്കണം എന്നു പറയാറില്ലെ. പലനാള് കക്കുന്നവന് ഒരിക്കല് പിടിക്കപ്പെടും എന്ന് പറയാറില്ലെ. കാര്യസാധ്യത്തിനായി കോഴയും കൈക്കൂലിയും കൊടുക്കുന്നവരും കുറ്റക്കാരാണ്. കോഴ വാങ്ങി എന്ന പരാതി പറയുന്നവര് അതു ന്യായമായി തെളിയിക്കാനും ബാധ്യസ്ഥരാണ്. എന്നാല് ന്യായമായ തെളിവുകള് കൊടുക്കുമ്പോള് അതു തെളിവല്ലെന്നു പറഞ്ഞ് തടിതപ്പാനൊ അധികാരമുപയോഗിച്ച് അന്വേഷണം അട്ടിമറിക്കാനൊ പരാതിക്കാരെ ഏതെങ്കിലും തരത്തില് സ്വാധീനിക്കാനൊ ഭീഷണിപ്പെടുത്താനൊ അല്ല ശ്രമിക്കേണ്ടത്. ചങ്കെടുത്ത് കാണിക്കുമ്പോള് ചെമ്പരത്തിപൂവാണെന്നു പറയരുത്. കോഴ കൊടുക്കുമ്പോള് അതിന് ആരും രസീത് വാങ്ങാറില്ല. ഏതു വമ്പനായാലും രാജിവെച്ച് അന്വേഷണം നേരിടണം. ഇതില് ജാതിമത ചിന്തകള്ക്ക് യാതൊരു പ്രസക്തിയുമില്ല. ജസ്റ്റിസ് ഫോര് ഓള്. അന്തരിച്ച പ്രസിദ്ധ തെന്നിന്ത്യന് നടന് മക്കള് തിലകം എംജിആര് ഒരു സിനിമയില് അഭിനയിച്ചു പാടിയ ഒരു തമിഴ് ഗാനം ഓര്ക്കുകയാണ്. 'ഒരു തവരു ചെയ്താല് അവന് ദൈവമാനാലും വിടമാട്ടെ...
കൂട്ടത്തില് ഒന്നുകൂടി കുറിക്കട്ടെ. ഇതെല്ലാം നെല്ലും പതിരുമായി എടുക്കണം അത്രമാത്രം.
സമീപകാലത്തെ കേരള രാഷ്ട്രീയ, സാമൂഹ്യ വാര്ത്തകള് അമേരിക്കയിലെ പ്രവാസി മലയാളികളേയും അവരുടെ സംഘടനാ പ്രവര്ത്തനങ്ങളേയും കോര്ത്തിണക്കിയുള്ള ഒരു നര്മ്മ ലേഖനം മാത്രമാണിത്. സാമൂഹ്യ പ്രതിബദ്ധതയോടെ നമ്മള് എഴുതണ്ടെ? ദീപസ്തംഭം മഹാശ്ചര്യം നമുക്കും കിട്ടണം പണം എന്ന ചൊല്ലില് എപ്പോഴും എഴുതാന് പറ്റുമോ? നര്മ്മ രൂപത്തിലെങ്കിലും രാജാവ് നഗ്നനാണെന്ന് പറയണ്ടെ? പ്രത്യേകിച്ച് നാട്ടില് നടമാടുന്ന അസംബന്ധങ്ങള് എഴുതാന്...പ്രസിദ്ധീകരിക്കാന് യുഎസില് ജീവിക്കുന്ന മലയാളി എഴുത്തുകാര് ഇത്ര ഭയപ്പെടണൊ? ഇവിടെ യുഎസില് നമുക്ക് കുറച്ച് നീതിയും യുഎസ് വ്യവസ്ഥിതിയും സുരക്ഷിതത്വവുമുണ്ടല്ലൊ? നാട്ടിലെ ഗുണ്ടകള് ഏതായാലും ഇവിടെ വന്ന് നമ്മളെ അടിക്കുകയില്ല. പിന്നെ നാട്ടില് പോകുന്നകാലംവരെ അവരങ്ങനെ നമ്മളെ അടിക്കാന് നോക്കി ഇരിക്കുമോ?
ഇനിയും ഒത്തിരി പോയിന്റുണ്ടായിരുന്നു എഴുതാന്. 'എഴുതുന്തോറും വളരും വളരുന്തോറും എഴുതും' എന്നാണല്ലൊ മാണിസൂക്ത്തം. പക്ഷെ എന്തു ചെയ്യാനാണ് കോഴകളുടെ കഥകേട്ട് ആകപ്പാടെ ഒരു തലകറക്കം. അതിനാല് ഇവിടെ തല്ക്കാലം നിര്ത്തുന്നു. എന്തിനധികം മൊഴിമൂത്തൂകള്...മിഴിനീര്... കോഴയാണെങ്ങൂം.....കേഴുക.....പ്രീയനാടെ......
Comments