ഡാലസ്: ഇന്ത്യൻ അമേരിക്കൻ വംശജനും ഡാലസിൽ നിന്നുള്ള അധ്യാപകനുമായ ആകാശ് പട്ടേലിനെ 2018 ഗ്ലോബൽ ടീച്ചേഴ്സ് പ്രൈസിനുവേണ്ടി മത്സരിക്കുന്ന 50 ഫൈനലിസ്റ്റുകളിൽ ഒരാളായി തിരഞ്ഞെടുത്തതായി വർക്കി ഫൗണ്ടേഷന്റെ ഔദ്യോഗിക അറിയിപ്പിൽ പറയുന്നു.
30 രാജ്യങ്ങൾ സന്ദർശിച്ചിട്ടുള്ള അഞ്ചു ഭാഷകൾ സംസാരിക്കുന്നതിൽ പ്രാവീണ്യം നേടിയിട്ടുള്ള ആകാശ് പട്ടേൽ ടെക്സസ് ആസ്ഥാനമായി പ്രവർത്തിക്കുന്ന തോമസ് ജെ റസ്ക്ക് മിഡിൽ സ്കൂൾ അധ്യാപകനാണ്.
ഒക്കലഹോമ സ്കൂളിൽ അധ്യാപകനായിരുന്ന ആകാശ് ഇപ്പോൾ ഡാലസിൽ സ്പാനിഷ് പഠിപ്പിക്കുന്നു.
ദുഷ്കരമായ ചുറ്റുപാടുകളിൽ നിന്നും എത്തിച്ചേരുന്ന കുറ്റവാസനയുള്ള കുട്ടികളെ പഠിപ്പിക്കുന്ന സ്കൂളിൽ ആകാശ് പട്ടേൽ സ്തുത്യർഹമായ സേവനമാണനുഷ്ഠിക്കുന്നത്.
ലോകത്തിന്റെ വിവിധ ഭാഗങ്ങളിലുള്ള പ്രൊഫഷണലുകളുമായി കുട്ടികളെ ബന്ധപ്പെടുത്തുന്നതിനും ആശയവിനിമയത്തിനും സോഷ്യൽ മീഡിയ ഉപയോഗിക്കുന്നതിൽ ആകാശ് പ്രത്യേകം ശ്രദ്ധിക്കുന്നു. ഒരു മില്യൺ ഡോളറാണ് ദുബായി ആസ്ഥാനമായി പ്രവർത്തിക്കുന്ന ഇന്ത്യൻ വംശജൻ സണ്ണി വർക്കി സ്ഥാപിച്ച വർക്കി ഫൗണ്ടേഷൻ സമ്മാനമായി നൽകുന്നത്.
Comments