വായു മലിനീകരണം ഏറ്റവും ഗുരുതരമായ സാഹചര്യത്തില്‍ നില്‍ക്കുന്ന സംസ്ഥാനമാണ് ഡല്‍ഹി. ഇവിടെ പെട്രോള്‍, ഡീസല്‍ വാഹനങ്ങള്‍ക്ക് കേന്ദ്രം നിയന്ത്രണം ഏര്‍പ്പെടുത്തുകയും ചെയ്തിട്ടുണ്ട്. സമാനമായി വായു മലിനീകരണം കുറയുന്നതിന് പ്രധാനമായും ഇലക്ട്രിക് വാഹനങ്ങളിലേക്ക് മാറുക എന്നത് തന്നെയായിരിക്കും പ്രധാനപ്പെട്ട കാര്യം.
പെട്രോള്‍ ഡീസല്‍ വില വര്‍ധന ഉപഭോക്താക്കളെയും ഇലക്ട്രിക്കിലേക്ക് തിരിയാന്‍ പ്രേരിപ്പിക്കുന്നുവെന്ന യാഥാര്‍ഥ്യം നിലവിലുണ്ട്. സര്‍ക്കാര്‍ തന്നെ ഇലക്ട്രിക് വാഹനങ്ങള്‍ പ്രോത്സാഹിപ്പിക്കുന്നതിലൂടെ, ഉയര്‍ന്ന നിര്‍മാണം കൊണ്ടും കൂടുതല്‍ വിപുലീകരിച്ച വാഹന ശൃംഖലകളാലും നേട്ടം കൊയ്യാന്‍ ശ്രമിക്കുന്ന വാഹന നിര്‍മാതാക്കള്‍ ടാറ്റ മോട്ടോര്‍സ് ആണ്.
സര്‍ക്കാരിന്റെ പിഎല്‍ഐ സ്‌കീമിലൂടെ വരുന്ന കുറച്ച് വര്‍ഷത്തിനുള്ളില്‍ 6500 കോടി വരുമാനം ഉണ്ടാക്കാനാണ് ടാറ്റ മോട്ടോഴ്സ് ലക്ഷ്യമിടുന്നത്. പാസഞ്ചര്‍ വാഹന മേഖലയില്‍ നിന്ന് 4000 കോടിയും ഓട്ടോ മൊബൈല്‍സിനായുള്ള പ്രൊഡക്ഷന്‍ ലിങ്ക്ഡ് ഇന്‍സെന്റീവ് സ്‌കീം പ്രകാരമുള്ള വാണിജ്യ വാഹന വില്‍പ്പനയിലൂടെ 2500 കോടിയുമാണ് ലക്ഷ്യമിടുന്നത്.
വ്യവസായ മേഖലയില്‍ ഉല്‍പാദനം വര്‍ദ്ധിപ്പിക്കുന്നതിനും ആഗോള നിക്ഷേപം ആകര്‍ഷിക്കുന്നതിനുമായി കേന്ദ്ര സര്‍ക്കാര്‍ നടപ്പിലാക്കുന്ന ഒരു പദ്ധതിയാണ് പ്രൊഡക്ഷന്‍ ലിങ്ക്ഡ് ഇന്‍സെന്റീവ് (പിഎല്‍ഐ) സ്‌കീം. ഈ പദ്ധതി പ്രകാരം, തെരഞ്ഞെടുത്ത വ്യവസായ മേഖലകളില്‍ ഉല്‍പാദനം വര്‍ദ്ധിപ്പിക്കുന്ന കമ്പനികള്‍ക്ക് ധനപരമായ പ്രോത്സാഹനം നല്‍കുന്നുണ്ട്.
രാജ്യത്തെ ഏറ്റവും വലിയ ഇലക്ട്രിക് വാഹന നിര്‍മാതാക്കളാണ് ടാറ്റ. ഈ സ്‌കീം പ്രകാരം 2025 സാമ്പത്തിക വര്‍ഷത്തില്‍ ടാറ്റയ്ക്ക് പാസഞ്ചര്‍ വാഹനങ്ങളില്‍ നിന്നും 250 കോടിയും കമേഴ്‌സ്യല്‍ വാഹനങ്ങളില്‍ നിന്ന് 135 കോടിയുമായി ലൈറ്റ്, ഹെവി വാണിജ്യ വാഹനങ്ങളിലൂടെ 385 കോടിയാണ് നേട്ടമുണ്ടാക്കാന്‍ സാധിച്ചത്.
2024 സാമ്പത്തിക വര്‍ഷത്തില്‍ പാസഞ്ചര്‍ വാഹനങ്ങളില്‍ നിന്നും 102 കോടി, വാണിജ്യ വാഹനങ്ങളില്‍ നിന്ന് 40 കോടി എന്ന നിരക്കില്‍ ആകെ 142 കോടിയാണ് നേടാനായത്. 2028ലെ സാമ്പത്തിക വര്‍ഷം വരെ പിഎല്‍ഐ സ്‌കീം പ്രകാരമുള്ള എല്ലാ ആനുകൂല്യവും ലഭിക്കുമെന്ന് ടാറ്റ മോട്ടോഴ്സ് വക്താവ് സ്ഥിരീകരിക്കുകയും ചെയ്തു.
തിയാഗോ, ടിഗോര്‍, പഞ്ച് എന്നിങ്ങനെ മൂന്ന് വാഹനങ്ങള്‍ക്ക് പിഎല്‍ഐ ഇന്‍സെന്റീവായി 40 കോടി റണ്‍ റേറ്റ് ലഭിക്കുന്നുണ്ട്. ഇതിലേക്ക് ഹാരിയറും നെക്‌സോണും കൂടി വരികയാണ്. അങ്ങനെ വന്നാല്‍ 2026 സാമ്പത്തിക വര്‍ഷമാകുമ്പോഴേക്കും 700 കോടി ആയി ഇത് ഉയരുമെന്നാണ് പ്രതീക്ഷയെന്ന് കമ്പനി എക്‌സിക്യുട്ടീവ് പറഞ്ഞതായി ഫൈനാന്‍ഷ്യല്‍ എക്‌സ്പ്രസ് റിപ്പോര്‍ട്ട് ചെയ്തു.
45 കിലോ വാട്ട് ടാറ്റ നെക്‌സോണ്‍ ഇവിയ്ക്ക് പിഎല്‍ഐ സെര്‍ട്ടിഫിക്കേഷന്‍ ജൂണ്‍ 27ന് ലഭിച്ചിരുന്നു. ടാറ്റ കര്‍വും ഹാരിയറും ഈ നേട്ടം കൈവരിക്കുന്നതിന്റെ വക്കിലാണ്.
