കേരള സർവകലാശാല സസ്പെൻഷൻ വിവാദത്തിൽ വീണ്ടും പോര് മുറുക്കി വൈസ് ചാൻസലർ മോഹനൻ കുന്നുമ്മൽ. രജിസ്ട്രാർ കെ.എസ്. അനിൽകുമാറിനെതിരായ സസ്പെൻഷൻ നടപടിയിൽ ഉറച്ച് വിസി മോഹനൻ കുന്നുമ്മൽ. സിൻഡിക്കേറ്റ് യോഗം പിരിച്ചുവിട്ടാൽ തീരുമാനങ്ങൾ നിലനിൽക്കില്ല. സസ്പെൻഡ് ചെയ്യപ്പെട്ട രജിസ്ട്രാർ എല്ലാം മാനിപുലേറ്റ് ചെയ്യുന്നുവെന്നും മോഹനൻ കുന്നുമ്മൽ പറഞ്ഞു.
“സസ്പെൻഷൻ പണിഷ്മെൻ്റ് അല്ല. കെ.എസ്. അനിൽകുമാർ അയച്ച ഒരു ഫയലും പാസാക്കിയിട്ടില്ല. പുറത്താക്കിയ കുട്ടി ക്ലാസിൽ നിന്ന് പോകുന്നില്ല എന്നതു പോലെയാണ് രജിസ്ട്രാർ. സസ്പെൻഷൻ കിട്ടിയ രജിസ്ട്രാർ ഫയലുകൾ നോക്കുന്നത് ക്രിമിനൽ കുറ്റമാണ്. ചാൻസലർ എന്ത് നടപടി എടുക്കുമെന്ന് പറയാൻ പറ്റില്ല. വൈസ് ചാൻസലർക്ക് സ്വതന്ത്രമായി തീരുമാനം എടുക്കാം. അത് സിൻഡിക്കേറ്റിൽ റിപ്പോർട്ട് ചെയ്താൽ മതി. വിശദീകരണം തേടുന്നത് അന്വേഷണ സമയത്താണ്. യൂണിവേഴ്സിറ്റി തലവൻ ചാൻസലറാണ്. അദ്ദേഹത്തെ അപമാനിച്ചതിനാണ് സസ്പെൻഷൻ. വിസിയെ തടയൽ നിയമത്തെ ചോദ്യം ചെയ്യലാണ്”, മോഹനൻ കുന്നുമ്മൽ.
