ഛത്തീസ്ഗഡില് മതപരിവര്ത്തനവും, മനുഷ്യക്കടത്തും ആരോപിച്ച് മലയാളികളായ രണ്ട് കന്യാസ്ത്രീകളെ അറസ്റ്റ് ചെയ്ത് ജയിലില് അടച്ച സംഭവത്തില് ശക്തമായ പ്രതിഷേധം രേഖപ്പെടുത്തുന്നുവെന്ന് സിപിഐഎം സംസ്ഥാന സെക്രട്ടേറിയറ്റ്. ക്രിസ്ത്യന് പ്രശ്നം എന്ന നിലയില് മാത്രമല്ല ഈ വിഷയത്തെ കാണേണ്ടത്. ഭരണഘടനാ വ്യവസ്ഥകളുടെ ലംഘനവും, ന്യൂനപക്ഷാവകാശങ്ങളിന്മേലുള്ള കടന്നുകയറ്റവുമാണ് സംഭവമെന്ന് സിപിഐഎം പ്രസ്താവനയില് ചൂണ്ടിക്കാട്ടി.
മതം അനുഷ്ഠിക്കാന് മാത്രമല്ല പ്രചരിപ്പിക്കാനുള്ള അവകാശവും ഭരണഘടന നല്കുന്നുണ്ട്. ഗുരുതരമായ കുറ്റങ്ങള് ചുമത്തിയാണ് കന്യാസ്ത്രീകളെ ജയിലില് അടച്ചത്. കേന്ദ്ര സര്ക്കാരും, ഛത്തീസ്ഗഡ് സര്ക്കാരും പിന്തുടരുന്ന ന്യൂനപക്ഷ വിരുദ്ധ സമീപനത്തിന്റെ പശ്ചാത്തലത്തിലാണ് വിഷയം ഗൗരവതരമാകുന്നതെന്നും പാര്ട്ടി പ്രസ്താവനയില് പറഞ്ഞു.
ഛത്തീസ്ഗഡില് ദുര്ഗ് റെയില്വേ സ്റ്റേഷനില്വെച്ച് കന്യാസ്ത്രീകളായ സി. പ്രീതി മേരി, സി വന്ദന ഫ്രാന്സിസ് എന്നിവരെ ബജ്രംഗ് ദള് പ്രവര്ത്തകര് വളഞ്ഞ് പൊലീസിനെ ഏല്പ്പിക്കുകയായിരുന്നു. നിയമം കൈയ്യിലെടുത്ത ബജ്രംഗ് ദള് പ്രവര്ത്തകരെ തടയുന്നതിന് പകരം ഛത്തീസ്ഗഡ് പൊലീസും, റെയില്വേ അധികൃതരും അവര്ക്കൊപ്പം നിന്നു എന്നതും ഞെട്ടലുളവാക്കുന്നതാണ്.
ക്രിസ്ത്യന് ന്യൂനപക്ഷങ്ങള്ക്കെതിരായ അക്രമങ്ങള് രാജ്യത്ത് 2014-ന് ശേഷം കുത്തനെ വര്ധിക്കുകയാണെന്നാണ് റിപ്പോര്ട്ടുകള് സൂചിപ്പിക്കുന്നത്. മണിപ്പൂരില് നിയമവാഴ്ച തകര്ത്ത് നടത്തിയ അക്രമങ്ങള്ക്ക് കേന്ദ്ര സര്ക്കാര് മൂകസാക്ഷിയായിരുന്നു. ഗ്രഹാം സ്റ്റെയിന്സും സ്റ്റാന്സ്വാമിയും മുതല് രാജ്യത്തിന്റെ വിവിധ ഭാഗങ്ങളില് ക്രൈസ്തവര്ക്കെതിരായി നടക്കുന്ന ക്രൂരമായ അക്രമങ്ങള് നിര്ബാധം തുടരുകയാണെന്ന് ഈ സംഭവവും വ്യക്തമാക്കുന്നതായി സിപിഐഎം പ്രസ്താവന ചൂണ്ടിക്കാട്ടി. ഇതിനെതിരായി ശക്തമായ പ്രതിഷേധം ഉയര്ന്ന വരണമെന്നും പ്രസ്താവനയിലൂടെ അഭ്യര്ഥിക്കുന്നതായി സിപിഐഎം സെക്രട്ടറിയേറ്റ് അറിയിച്ചു.
കന്യാസ്ത്രീകളുടെ അറസ്റ്റിനെതിരെ പാര്ലമെന്റില് ശക്തമായ പ്രതിഷേധമാണ് ഇന്ന് നടന്നത്. പ്രതിപക്ഷ ബഹളത്തില് സഭ സ്തംഭിച്ചു. ഒരു മണി വരെ സഭ നിര്ത്തിവെക്കുകയുംചെയ്തു. സഭയുടെ കീഴിലുള്ള ആശുപത്രികളിലേക്കും ഓഫീസുകളിലേക്കും ജോലിക്കായി ദുര്ഗില് നിന്ന് മൂന്ന് പെണ്കുട്ടികളെ കൂട്ടിക്കൊണ്ടുപോകാനെത്തിയ കന്യാസ്ത്രീകളാണ് ഛത്തീസ്ഗഡില് അറസ്റ്റിലായത്. പെണ്കുട്ടികളുടെ കൈവശം പ്ലാറ്റ്ഫോം ടിക്കറ്റ് ഉണ്ടായിരുന്നില്ല. ഇത് ചോദ്യം ചെയ്ത റെയില്വേ പൊലീസ് പിന്നീട് ചില തീവ്രഹിന്ദു സംഘടനകളില്പ്പെട്ടവരെ വിളിച്ചുവരുത്തുകയായിരുന്നു. ഇവര് സ്റ്റേഷനില് പ്രതിഷേധിക്കുകയും കന്യാസ്ത്രീകളെ അധികൃതര് അറസ്റ്റ് ചെയ്യുകയും ആയിരുന്നു.
കന്യാസ്ത്രീകള് ഛത്തീസ്ഗഡില് നിന്ന് കൂട്ടിക്കൊണ്ട് വരാന് പോയ മൂന്ന് പെണ്കുട്ടികളും ക്രിസ്ത്യന് വിഭാഗക്കാരാണെന്ന് സിബിസിഐ വനിതാ കൗണ്സില് സെക്രട്ടറി സിസ്റ്റര് ആശാ പോള് പറയുന്നു. കൃത്യമായ യാത്രാ രേഖകളും കന്യാസ്ത്രീകളുടെ പക്കല് ഉണ്ടായിരുന്നു. മത പരിവര്ത്തനം നടത്തിയിട്ടില്ലെന്നും സിസ്റ്റര് ആശാ പോള് അറിയിച്ചു.
റിമാന്ഡിലായ കന്യാസ്ത്രീകള് നിലവില് ദുര്ഗ് ജയിലിലാണുള്ളത്. മത പരിവര്ത്തനവും മനുഷ്യക്കടത്തുമാണ് ഇവര്ക്കെതിരെ ആരോപിച്ചിരിക്കുന്ന കുറ്റങ്ങള്. കന്യാസ്ത്രീകളുടെ അറസ്റ്റില് പ്രതിഷേധം ശക്തമാകുന്നതിനിടെയാണ് ഇന്ന് പാര്ലമെന്റും സ്തംഭിച്ചത്.
