തിരക്കു പിടിച്ച ജീവിതത്തിനിടയിൽ പാചകം എന്നത് അത്ര എളുപ്പമായിരിക്കില്ല പലർക്കും. അതുകൊണ്ടു തന്നെ പാചകത്തിലെ സമയം ലാഭിക്കാൻ പച്ചക്കറികളും സൂക്ഷിക്കാറുണ്ട്. അരിഞ്ഞുവയക്കുന്നവയുടെ കൂട്ടത്തിൽ സവാളയും ചിലർ ഉൾപ്പെടുത്താറുണ്ട്. അത് പക്ഷെ ശ്രദ്ധിക്കേണ്ടതാണ്. സവാള വിഷമായി മാറുമെന്ന സ്ഥിരം പല്ലവി കേട്ട് പേടിക്കേണ്ടതില്ല. പക്ഷെ അരിഞ്ഞതോ, പകുതി മുറിച്ചതോ ആയ സവാള ഫ്രഡ്ജിൽ സൂക്ഷിക്കുമ്പോൾ അൽപ്പം ശ്രദ്ധിക്കണം എന്ന് മാത്രം.
അരിഞ്ഞ് സൂക്ഷിക്കുന്ന സവാള വിഷമാകും എന്നതിന് ശാസ്ത്രീയമായി ഒരു തെളിവും നൽകാനായിട്ടില്ല. എന്നാൽ ശരിയായ രീതിയില് അല്ല സൂക്ഷിക്കുന്നതെങ്കില് അവയില് ബാക്ടീരിയകള് വളരാനും സവാളയുടെ ഗുണം കുറയാനും കാരണമാകാറുണ്ട്. സവാള അരിഞ്ഞതും മുറിച്ചതും ഫ്രിഡ്ജിൽ തുറന്ന് വയ്ക്കരുത്. എപ്പോഴും ഒരു ബോക്സില് അടച്ച് സൂക്ഷിക്കാന് ശ്രദ്ധിക്കുക.
സവാളയിലെ ഈര്പ്പം കാരണം പൂപ്പല് ഉണ്ടാകാൻ സാധ്യതയുണ്ട്. അതുകൊണ്ട് പാത്രത്തിനടിയില് ഒരു ടിഷ്യുപേപ്പര് കൂടി വയ്ക്കുന്നത് ഗുണം ചെയ്യും. സവാള മുറിച്ചുകഴിഞ്ഞാല് അധിക നേരം പുറത്ത് വയ്ക്കുന്നതും ബാക്ടീരിയകള് വളരാന് കാരണമാകും. പകുതി മുറിച്ച് വയ്ക്കുന്ന സവാളയും പാത്രത്തിൽ അടച്ച് മാത്രം ഫ്രിഡ്ജിൽ വയ്ക്കുക.
ഇനി കൂടുതൽ ദിവസത്തേക്ക് സവാള ഫ്രിഡ്ജിൽ സൂക്ഷിക്കാനാണ് ശ്രമിക്കുന്നതെങ്കിൽ ഫലപ്രദമായ വേറെ വഴിയുണ്ട്. സവാള അരിഞ്ഞ ശേഷം ഒരു പാത്രത്തില് നിരത്തിവച്ച് 1-2 മണിക്കൂര് ഫ്രീസറില് വയ്ത്തുക. ശേഷം ഒരു സിപ് ലോക്ക് കവറിലാക്കി ഫ്രിഡ്ജില് സൂക്ഷിക്കാം. ഇത്തരത്തിൽ സൂക്ഷിക്കുന്നത് 2-3 മാസം വരെ സവാള കേടുകൂടാതെ ഇരിക്കാൻ സഹായിക്കും.
