ഏഷ്യയിലെ ഏറ്റവും വലിയ ഇന്റർവെൻഷണൽ പൾമണോളജി സമ്മേളനങ്ങളിൽ ഒന്നായ എബിഐപി 2026 (ABIP 2026) മാർച്ച് 28, 29 തീയതികളിൽ കൊച്ചിയിലെ ലെ മെറിഡിയൻ ഹോട്ടലിൽ നടക്കും. അമൃത ബ്രോങ്കോളജി & ഇന്റർവെൻഷണൽ പൾമണോളജി വിഭാഗത്തിന്റെ അഞ്ചാമത് ബിയന്നിയൽ കോൺഫറൻസായ ഈ സമ്മേളനം രാജ്യാന്തര നിലവാരത്തിലുള്ള ശാസ്ത്രീയ ചർച്ചകൾക്കും പരിശീലന പരിപാടികൾക്കും വേദിയാകും.
ഇന്റർവെൻഷണൽ പൾമണോളജി രംഗത്തെ 14 അന്താരാഷ്ട്ര വിദഗ്ധരും, വിവിധ രാജ്യങ്ങളിൽ നിന്നുള്ള 1000-ലധികം പ്രതിനിധികളും പങ്കെടുക്കും. പുതിയ സാങ്കേതിക വിദ്യകളും ചികിത്സാരീതികളും പങ്കുവെക്കുന്ന ശാസ്ത്രീയ സെഷനുകൾക്ക് പുറമെ, വിവിധ വിഷയങ്ങളിലായി ഹാൻഡ്സ്-ഓൺ പരിശീലന പരിപാടികളും ഒരുക്കിയിട്ടുണ്ട്.
റിജിഡ് ബ്രോങ്കോസ്കോപ്പി, എയർവേ സ്റ്റന്റിംഗ്, ഫ്ലെക്സിബിൾ ബ്രോങ്കോസ്കോപ്പി, ഇബസ് (EBUS) മാസ്റ്റർക്ലാസ്, റോബോട്ടിക് ബ്രോങ്കോസ്കോപ്പി, തോറക്കോസ്കോപ്പി, ചെസ്റ്റ് അൾട്രാസൗണ്ട് തുടങ്ങിയ മേഖലകളിലാണ് പരിശീലനം. സങ്കീർണ്ണമായ ചികിത്സാപ്രക്രിയകൾ തത്സമയം കാണാനാകുന്ന ലൈവ് കേസ് ഡെമോൺസ്ട്രേഷനുകൾ സമ്മേളനത്തിന്റെ പ്രത്യേക ആകർഷണമായിരിക്കും.
ഇന്റർവെൻഷണൽ പൾമണോളജിയിലെ പുതിയ സാങ്കേതിക വിദ്യകൾ പരിചയപ്പെടുത്തുന്ന ഇന്നോവേറ്റേഴ്സ് ഹബ്, കൃത്രിമ ബുദ്ധി (AI) അധിഷ്ഠിത ചികിത്സാ സാധ്യതകൾ ചർച്ച ചെയ്യുന്ന പ്രത്യേക സെഷനുകൾ, ഫെലോഷിപ്പ് ഫോറങ്ങൾ എന്നിവയും സമ്മേളനത്തിൽ ഉൾപ്പെടുത്തിയിട്ടുണ്ട്. വിദ്യാർത്ഥികൾ മുതൽ പരിചയസമ്പന്നരായ ഡോക്ടർമാർ വരെ എല്ലാവർക്കും അറിവും പരിചയവും വർധിപ്പിക്കാൻ സഹായകമായ ഈ സമ്മേളനം ഇന്റർവെൻഷണൽ പൾമണോളജി രംഗത്ത് പുതിയ വഴിത്തിരിവുകൾ സൃഷ്ടിക്കുമെന്ന് കോൺഫറൻസ് ഡയറക്ടറും, അമൃത ആശുപത്രിയിലെ ഇന്റർവെൻഷണൽ പൾമോണളജി വിഭാഗം മേധാവിയുമായ ഡോ. ടിങ്കു ജോസഫ് അറിയിച്ചു.
