പശ്ചിമേഷ്യൻ സംഘർഷത്തെ തുടർന്നുണ്ടായ പാചകവാതക പ്രതിസന്ധിക്കിടയിൽ ഒരു ആശ്വാസവാർത്ത. പൂർണമായും സൗരോർജ്ജത്തിൽനിന്നും പാചകം സാധ്യമാകുന്ന ഓഫ് ഗ്രിഡ് സോളാർ കുക്കിംഗ് ടെക്നോളജി അവതരിപ്പിച്ച് സൗരോർജ മേഖലയിലെ പ്രമുഖരായ സ്വെലക്റ്റ് എനർജി സിസ്റ്റംസ് ലിമിറ്റഡ്. തമിഴ് പുതുവർഷമായ പുത്താണ്ടിനോടനുബന്ധിച്ചാണ് പുതിയ ടെക്നോളജി അവതരിപ്പിച്ചത്. പുരയിടങ്ങളിൽ സ്ഥാപിച്ച സോളാർ പാനലുകളിനിന്നും നേരിട്ട് ഊർജം ഉത്പാദിപ്പിച്ച് പാചകം നടത്താം. നിലവിൽ വിപണിയിൽ ലഭ്യമായ ഇൻഡക്ഷൻ സ്റ്റവുകളിൽ ടെക്നോളജി ഉപയോഗിക്കാമെന്നതാണ് പ്രത്യേകത. കാർബൺ ബഹിർഗമനം ഇല്ലാതാക്കുന്നതിനുപുറമെ ദീർഘകാല അടിസ്ഥാനത്തിൽ ഗ്യാസ്, വൈദ്യുതി ചാർജുകളിനിന്ന് രക്ഷനേടാനും ടെക്നോളജി സഹായിക്കും.
രാജ്യവ്യാപകമായി ക്ലീൻ എനർജി സാധ്യമാക്കുകയെന്ന കമ്പനിയുടെ പ്രതിബദ്ധതയുടെ ഭാഗമായാണ് ഓഫ് ഗ്രിഡ് സോളാർ കുക്കിംഗ് ടെക്നോളജി അവതരിപ്പിക്കുന്നതെന്ന് സ്വെലക്റ്റ് എനർജി സിസ്റ്റംസ് ലിമിറ്റഡ് എംഡിയും സിഇഒയുമായ ഡോ. അരുൾകുമാർ ഷൺമുഖസുന്ദരം പറഞ്ഞു. കമ്പനിയുടെ ഗവേഷണ- വികസന വിഭാഗത്തിന്റെയും എഞ്ചിനീയർമാരുടെയും ശ്രമഫലമായാണ് കുറഞ്ഞ സമയത്തിനുള്ളിൽ മികച്ച ടെക്നോളജി പുറത്തിറക്കാൻ കഴിഞ്ഞതെന്നും അദ്ദേഹം കൂട്ടിച്ചേർത്തു. ആദ്യഘട്ടത്തിൽ കുറഞ്ഞ യൂണിറ്റുകളാണ് വിപണിയിലെത്തിക്കുന്നത്. ഉത്പാദനശേഷി വർധിപ്പിക്കുന്നതോടെ വ്യവസായിക അടിസ്ഥാനത്തിൽ കൂടുതൽ യൂണിറ്റുകൾ പുറത്തിറക്കുമെന്നും കമ്പനി വ്യക്തമാക്കി.
