കേരളത്തിൽ ദിനംപ്രതി ചൂട് വർധിക്കുകയാണ്. ഇടയ്ക്കിടെ വേനൽമഴ ഉണ്ടെങ്കിൽ കൂടിയും അതൊരു താൽക്കാലിക ആശ്വാസം മാത്രമാണ്. വേനൽ ആകുമ്പോൾ അല്ലെങ്കിൽ ചൂട് കനക്കുമ്പോൾ തന്നെ, ആദ്യം പറയുന്നത് വെള്ളം കുടിക്ക് എന്നതാണ്. വെള്ളം കുടിക്കാതിരുന്നാൽ ഉണ്ടാകുന്ന പ്രശ്നം ഗുരുതരമാണ്. അമിതമായി വെള്ളം കുടിച്ചാലുള്ള പ്രശ്നവും അതുപോലെ തന്നെയാണ്. ദാഹം തീർക്കാൻ വെള്ളം കുടിക്കുന്നത് ആരോഗ്യകരമാണെങ്കിലും, അമിതമായി കുടിക്കുന്നത് നമ്മെ ദോഷകരമായി ബാധിക്കും.
വൃക്കകളുടെ പ്രവർത്തനം
നമ്മുടെ വൃക്കകൾക്ക് ഒരു മണിക്കൂറിൽ ഏകദേശം ഒരു ലിറ്റർ വെള്ളം മാത്രമേ ശുദ്ധീകരിച്ച് നീക്കം ചെയ്യാൻ സാധിക്കൂ. വ്യക്തികളുടെ പ്രായം, ആരോഗ്യസ്ഥിതി എന്നിവ അനുസരിച്ച് ഇതിൽ വ്യത്യാസം സംഭവിക്കാം.
കൂടാതെ വ്യായാമം, കാലാവസ്ഥ തുടങ്ങിയ ഘടകങ്ങൾ ഇതിനെ സ്വാധീനിക്കുന്ന ഘടകങ്ങളാണ്. ശരീരത്തിന് ആവശ്യമായതിലും കൂടുതൽ വെള്ളം കുടിച്ചാൽ വൃക്കകൾക്ക് അത് കൃത്യമായി പ്രവർത്തിക്കാൻ കഴിയാതെ വരുന്നു. ഇത് വാട്ടര് ഇന്ടോക്സിക്കേഷനിലേക്ക് വഴിവെക്കുന്നു.
സോഡിയത്തിൻ്റെ കുറവ്
അമിതമായി വെള്ളം കുടിക്കുന്നത് മൂലം രക്തത്തിലെ സോഡിയത്തിൻ്റെ അളവ് ഗണ്യമായി കുറയുന്നതിനെയാണ് ഹൈപ്പോനാട്രീമിയഎന്ന് വിളിക്കുന്നത്. അമിതമായി വെള്ളം കുടിക്കുന്നത് മൂലം ശരീരത്തിലെ സോഡിയത്തിൻ്റെ ബാലൻസ് തെറ്റുന്ന അവസ്ഥ ഉണ്ടാകുന്നു. ഇത് തലച്ചോറിലെ കോശങ്ങളെ വരെ ബാധിക്കുമെന്നും ആരോഗ്യവിദഗ്ധർ ചൂണ്ടിക്കാട്ടുന്നു.
പ്രധാന ലക്ഷണങ്ങൾ
ഓക്കാനം, ഛർദി, ശക്തമായ തലവേദന, തലചുറ്റൽ, ആശയക്കുഴപ്പം, ക്ഷീണം, എന്നിവയാണ് വാട്ടര് ഇന്ടോക്സിക്കേഷന് പ്രധാന ലക്ഷണങ്ങൾ.
ശ്രദ്ധിക്കേണ്ട കാര്യങ്ങൾ
ദാഹം മാത്രം വെള്ളം കുടിക്കുക. ഓരോരുത്തരുടെയും ശരീരഭാരം, കാലാവസ്ഥ, അധ്വാനം എന്നിവ അനുസരിച്ച് വെള്ളം കുടിക്കുന്നതിൽ മാറ്റം വരാം. മേൽ പറഞ്ഞ ലക്ഷണങ്ങൾ അവഗണിക്കരുത്, ഡോക്ടറെ കാണുന്നതിൽ വിമുഖതയും കാണിക്കരുത്. ശരിയായ അളവിൽ വെള്ളം കുടിക്കുന്നത് ആരോഗ്യത്തിന് നല്ലതാണ്, പക്ഷേ അമിതമായത് എന്തോ അത് എല്ലായ്പ്പോഴും അപകടകരമാണ് എന്നതും മനസിലാക്കണം.
