മലയാളികളുടെ പ്രിയപ്പെട്ട നടനും സംവിധായകനുമാണ് ബേസിൽ ജോസഫ്. ഇന്ന് 37ാം ജന്മദിനം ആഘോഷിക്കുകയാണ് നടൻ. പിറന്നാൽ ദിനത്തിൽ ബേസിലിന് ആശംസകൾ നേർന്നുകൊണ്ടുള്ള ഭാര്യ എലിസബത്തിന്റെയും സഹോദരി ഷിൻസി ജോസഫിന്റെയും പോസ്റ്റുകൾ സോഷ്യൽ മീഡിയയിൽ വൈറലാകുകയാണ്.
ബേസിൽ ജോസഫ് ‘ടൈറ്റാനിക്ക്’ സിനിമയിലെ പാട്ട് ഉച്ചത്തിൽ പാടുന്ന വീഡിയോ ആണ് എലിസബത്ത് പങ്കുവച്ചത്. മകൾ ഹോപ്പിനേയും ദൃശ്യങ്ങളിൽ കാണാം. “ഹാപ്പി ബർത്ത് ഡേ മിസ്റ്റർ അപ്പാ. ഇനി പാടരുത്, അല്ലെങ്കിൽ ഞങ്ങൾ വാ കെട്ടി വയ്ക്കും,” എന്ന് കുറിച്ചുകൊണ്ടാണ് എലിസബത്ത് ഈ വീഡിയോ പോസ്റ്റ് ചെയ്തത്. അധികം വൈകാതെ കമന്റ് സെക്ഷനിൽ ബേസിലിനെ ട്രോളിയും ആശംസകൾ നേർന്നും സുഹൃത്തുക്കളും സഹപ്രവർത്തകരും എത്തി. “ഹോപ്പ്: ചുമ്മാതല്ല ആ ഷിപ്പ് മുങ്ങിയത്,” എന്നായിരുന്നു സംവിധായകൻ വിപിൻ ദാസിന്റെ കമന്റ്. ടൊവിനോ തോമസിന്റെ കമന്റിനായി കാത്തിരിക്കുന്നവരേയും കമന്റ് സെക്ഷനിൽ കാണാം.
സഹോദരി ഷിൻസി ജോസഫും നടന് ആശംസകൾ നേർന്നു. “പ്രായം കൂടും എന്ന് പേടിച്ച് പിറന്നാൾ വേണ്ടെന്ന് വച്ച പൊന്നാങ്ങളയ്ക്ക് എന്റെ പേരിലും മരുമക്കളുടെ പേരിലും കൊച്ചുമക്കളുടെ പേരിലും മാതാ പിതാക്കളുടെയും ബാക്കി എല്ലാ ബന്ധു മിത്രാധികളുടെയും പേരിലും ആയിരമായിരം പിറന്നാൾ ആശംസകൾ,” എന്നായിരുന്നു ഷിൻസിയുടെ സോഷ്യൽ മീഡിയ പോസ്റ്റ്.
അതേസമയം, ‘അതിരടി’യാണ് ബേസിൽ ജോസഫ് അഭിനയിക്കുന്ന ഏറ്റവും പുതിയ ചിത്രം. സിനിമയിലെ ആദ്യ ഗാനം ഇന്ന് റിലീസ് ചെയ്യും. അരുൺ അനിരുദ്ധൻ സംവിധാനം ചെയ്യുന്ന ചിത്രം ബേസിൽ ജോസഫ് എന്റർടെയ്ൻമെന്റ്സിന്റെ ബാനറിൽ ബേസിൽ ജോസഫും ഡോക്ടർ അനന്തു എന്റർടെയ്ൻമെന്റ്സിന്റെ ബാനറിൽ ഡോക്ടർ അനന്തു എസും ചേർന്നാണ് നിർമിക്കുന്നത്.
പോൾസൺ സ്കറിയ, അരുൺ അനിരുദ്ധൻ എന്നിവർ ചേർന്നാണ് തിരക്കഥ. സംവിധായകനും ഛായാഗ്രാഹകനുമായ സമീർ താഹിറും ടൊവിനോ തോമസും അതിരടിയുടെ സഹനിർമാതാക്കളാണ്. ‘മിന്നല് മുരളി’ക്ക് ശേഷം ടൊവിനോ തോമസും ബേസിൽ ജോസഫും സമീർ താഹിറും അരുൺ അനിരുദ്ധനും ഒന്നിക്കുന്ന ചിത്രം കൂടിയാണിത്. മെയ് 14ന് ചിത്രം തിയേറ്ററുകളിൽ എത്തും.
