ആഗോള ജ്വല്ലറി ഗ്രൂപ്പായ ജോയ്ആലുക്കാസുമായി സഹകരിക്കുന്ന വ്യാവസായിക പ്രമുഖർ, പങ്കാളിത്ത സ്ഥാപനങ്ങൾ എന്നിവരുടെ ആഗോള സംഗമം ‘പ്രൈഡ് 2026’ കൊച്ചിയിൽ ജോയ്ആലുക്കാസ് ചെയർമാൻ ഡോ. ജോയ് ആലുക്കാസ്, ജോളി ജോയ് ആലുക്കാസ് എന്നിവർ ഉദ്ഘാടനം ചെയ്തു. ജോയ്ആലുക്കാസ് ഗ്രൂപ്പിന്റെ ആഭരണങ്ങൾ ആഗോളതലത്തിൽ വിതരണം ചെയ്യുന്ന പ്രമുഖർ, പങ്കാളികൾ, വിശിഷ്ടാതിഥികൾ എന്നിവർക്ക് പുറമെ നാഷണൽ ജെംസ് ആൻഡ് ജ്വല്ലറി കൗൺസിൽ ഓഫ് ഇന്ത്യ ചെയർമാൻ പ്രമോദ് അഗർവാൾ, ആർട്ട് ജ്വല്ലറി മാഗസിൻ ചീഫ് എഡിറ്റർ സുമേഷ് വധേര, പിജിഐ ഇന്ത്യ എംഡി വൈശാലി ബാനർജി, സിനിമാതാരം അപർണ ബാലമുരളി, ജോയ്ആലുക്കാസ് സിഇഒ ജോൺ പോൾ ആലുക്കാസ്, എക്സിക്യൂട്ടീവ് ഡയറക്ടർമാരായ തോമസ് മാത്യു, ആന്റണി ജോസ്, ഡയറക്ടർമാരായ സോണിയ ആലുക്കാസ്, എൽസ ജോയ് ആലുക്കാസ് എന്നിവരും പങ്കെടുത്തു.
ലോകമെമ്പാടുമുള്ള 200 വിതരണ പങ്കാളികളാണ് സംഗമത്തിൽ പങ്കെടുക്കുന്നത്. ജോയ്ആലുക്കാസ് ഗ്രൂപ്പിന്റെ വളർച്ചയ്ക്ക് പ്രത്യേകമായി തയ്യാറാക്കിയ ആഭരണങ്ങളുടെ പ്രദർശനവും നടക്കും. നൂതന ആഭരണ നിർമാണ രീതികളും സർഗാത്മകതയും പങ്കുവെക്കുന്നതിനോടൊപ്പം ബിസിനസ് പങ്കാളിയുമായുള്ള ദീർഘകാല ബന്ധം ഉറപ്പിക്കുന്നതിനുള്ള വേദികൂടിയാണ് പ്രൈഡ് 2026. പരസ്പര വിശ്വാസത്തിലും സത്യസന്ധതയിലും പടുത്തുയർത്തിയതാണ് വിതരണ പങ്കാളികളുമായുള്ള ബന്ധമെന്നും അവരുടെ കഴിവും കരവിരുതുമാണ് ജോയ്ആലുക്കാസ് ഗ്രൂപ്പിനെ ആഗോള ജ്വല്ലറി ബ്രാൻഡാക്കി മാറ്റിയതെന്നും ഡോ. ജോയ് ആലുക്കാസ് പറഞ്ഞു. കേവലം സംഗമം എന്നതിലുപരി ബിസിനസ് പങ്കാളിയുമായുള്ള ബന്ധം ആഘോഷിക്കുകയാണ് പ്രൈഡ് 2026 ലൂടെ ചെയ്യുന്നതെന്നും അദ്ദേഹം കൂട്ടിച്ചേർത്തു. ആഭരണ വിപണിയിലെ പുത്തൻ ട്രെൻഡുകൾ, ഡിസൈനിങ് രീതികൾ എന്നിവയെക്കുറിച്ചും ചർച്ചകൾ സംഘടിപ്പിച്ചു.
