തൃശൂർ മാനേജ്മെന്റ് അസോസിയേഷനും ഇസാഫ് സ്മോൾ ഫിനാൻസ് ബാങ്കും ചേർന്ന് സംഘടിപ്പിച്ച ബിസിനസ് ക്വിസ് 2026 (ക്വിസാത്മ) മത്സരത്തിൽ കൊച്ചിൻ യൂണിവേഴ്സിറ്റി ഓഫ് സയൻസ് ആൻഡ് ടെക്നോളജിയിലെ (കുസാറ്റ്) ബിച്ചു സി എബ്രഹാം, എസ് ബാനു ലാൽ എന്നിവർ വിജയികളായി. കുസാറ്റിലെ മുഹമ്മദ് അമീൻ, അമൽഹസീൻ എന്നിവർ രണ്ടാംസ്ഥാനവും. തൃശൂർ ഗവണ്മെന്റ് മെഡിക്കൽ കോളേജിലെ ജോ ജോൺസൻ, വൈഷ്ണവ് എ വി എന്നിവർ മൂന്നാം സ്ഥാനവും കരസ്ഥമാക്കി. ഇസാഫ് സ്വാശ്രയ മൾട്ടി സ്റ്റേറ്റ് അഗ്രോ കോ ഓപ്പറേറ്റീവ് സൊസൈറ്റി സിഇഒ ജോർജ് തോമസ് വിജയികൾക്കുള്ള ക്യാഷ് അവാർഡും ഫലകവും കൈമാറി. ആകെ ഒരുലക്ഷം രൂപയുടെ സമ്മാനതുകയാണ് വിജയികൾക്ക് വിതരണം ചെയ്തത്. പ്രശസ്ത ക്വിസ് മാസ്റ്റർ രഞ്ജിത്ത് എ ആർ നയിച്ച മത്സരത്തിൽ സംസ്ഥാനത്തുടനീളമുള്ള കോളജുകളിൽനിന്നും 40 ടീമുകൾ പങ്കെടുത്തു. ടിഎംഎ പ്രസിഡന്റ് പത്മകുമാർ സി അധ്യക്ഷത വഹിച്ച ചടങ്ങിൽ പ്രോഗ്രാം കൺവീനർ ഡോ. മെറിൻ പോൾ, ടിഎംഎ സെക്രട്ടറി ഷാജി പി ജെ എന്നിവർ പ്രസംഗിച്ചു.
