മതസാഹോദര്യത്തിൻ്റെ മഹദ് സന്ദേശം ഉയർത്തി മണപ്പുറം ഫൌണ്ടേഷൻ ഇഫ്താർ സംഗമം സംഘടിപ്പിച്ചു. മണപ്പുറം ഗ്രൂപ്പിൻ്റെ സാരഥി വി പി നന്ദകുമാറിന്റെ അധ്യക്ഷതയിൽ നടന്ന ഇഫ്താർ വിരുന്ന് തൃശൂരിൻ്റെ രാഷ്ട്രീയ, സാംസ്കാരിക, സാമുദായിക, വ്യവസായ രംഗത്തെ പ്രമുഖരുടെ സാന്നിധ്യത്താൽ ശ്രദ്ധേയമായി.
റെവന്യൂ, ഭവന വകുപ്പ് മന്ത്രി കെ രാജൻ ചടങ്ങ് ഉൽഘാടനം ചെയ്തു. പുണ്യ മാസത്തിന്റെ പവിത്രത ഉൾക്കൊണ്ട് ഇഫ്താർ വിരുന്നൊരുക്കിയ മണപ്പുറം സാരഥി വി പി നന്ദകുമാറിനെ മന്ത്രി ശ്ലാഖിച്ചു. ജീവ കാരുണ്യ പ്രവർത്തനങ്ങളിൽ അനുകരണീയമായ മാതൃകയാണ് നന്ദകുമാർ പുലർത്താറുള്ളതെന്നും മന്ത്രി പറഞ്ഞു.
പ്രമുഖ മത പണ്ഡിതനും അസാസ് കോളേജ് പ്രിൻസിപ്പലുമായ ഓണംപിള്ളി മുഹമ്മദ് ഫൈസി അനുഗ്രഹ പ്രഭാഷണം നടത്തി. മേയർ ഡോക്ടർ നിജി ജസ്റ്റിൻ, ഡെപ്യൂട്ടി മേയർ എ പ്രസാദ്, കല്യാൺ സിൽക്സ് എം ഡി ടി എസ് പട്ടാഭിരാമൻ, ഇസാഫ് എംഡി പോൾ തോമസ്, ധനലക്ഷ്മി ബാങ്ക് എംഡി കെ കെ അജിത്കുമാർ, ജില്ലാ പഞ്ചായത്ത് പ്രസിഡന്റ് മേരി തോമസ്, ആൽഫ പാലിയേറ്റീവ് കെയർ ചെയർമാൻ കെ എം നൂറുദ്ധീൻ, അമല ഹോസ്പിറ്റൽ ഡയറക്ടർ ഫാദർ ജൂലിയസ് അറക്കൽ, ജൂബിലി മിഷൻ മെഡിക്കൽ കോളേജ് ഡയറക്ടർ ഫാദർ റെന്നി മുണ്ടെങ്കുരിയൻ, ജൂബിലി മിഷൻ മെഡിക്കൽ കോളേജ് സി ഇ ഒ ഡോക്ടർ ബെന്നി ജോസഫ്, ഇടവേള ബാബു, പ്രീതി പറക്കാട്ട് തുടങ്ങി സമൂഹത്തിലെ വിവിധ തുറകളിലെ പ്രമുഖർ ഇഫ്താർ വിരുന്നിൽ സംബന്ധിച്ചു.
മണപ്പുറം ഫിനാൻസ് സീനിയർ പി ആർ ഒ കെ എം അഷ്റഫ് സ്വാഗതവും മണപ്പുറം ഫിനാൻസ് ജനറൽ മാനേജറും ചീഫ് പി ആർ ഒ യുമായ സനോജ് ഹെർബർട്ട് നന്ദിയും പറഞ്ഞു. രഞ്ജൻ ശ്രീധരൻ, മിഷാൽ കെ നസീം എന്നിവർ അവതാരകരായിരുന്നു.
