മാറിവരുന്ന സാമ്പത്തിക സാഹചര്യത്തിൽ ഉപഭോക്താക്കൾക്ക് കൃത്യമായ അവബോധവും സാമ്പത്തിക തട്ടിപ്പുകളെക്കുറിച്ചുള്ള ബോധവൽക്കരണവും നൽകുകയെന്ന ലക്ഷ്യത്തോടെ ഇസാഫ് സ്മോൾ ഫിനാൻസ് ബാങ്ക് സാമ്പത്തിക സാക്ഷരതാ പരിപാടി സംഘടിപ്പിച്ചു. റിസർവ് ബാങ്കിന്റെ നേതൃത്വത്തിൽ രാജ്യവ്യാപകമായി നടത്തുന്ന പ്രചാരണ പരിപാടിയുടെ ഭാഗമായി സംഘടിപ്പിച്ച ചടങ്ങ് ഇസാഫ് ബാങ്ക് എംഡിയും സിഇഒയുമായ ഡോ. കെ പോൾ തോമസ് ഉദ്ഘാടനം ചെയ്തു. ‘കെവൈസി; സുരക്ഷിത ബാങ്കിംഗിനുള്ള ആദ്യ ചുവട്’ എന്ന പ്രമേയത്തിലാണ് ഇത്തവണത്തെ പ്രചാരണ പരിപാടികൾ സംഘടിപ്പിക്കുന്നത്. 350 ലധികം ഇസാഫ് ബാങ്ക് ശാഖകളിൽ സാമ്പത്തിക സാക്ഷരതാ പ്രോഗ്രാമുകൾ സംഘടിപ്പിച്ചു. സ്ത്രീകൾ, കർഷകർ, അതിഥി തൊഴിലാളികൾ, പ്രാദേശിക പ്രതിനിധികൾ എന്നിങ്ങനെ വിവിധ മേഖലകളിലുള്ള 4700 ലധികം ആളുകൾ ബോധവൽക്കരണ പരിപാടികളിൽ പങ്കെടുത്തു. യഥാസമയങ്ങളിൽ കെവൈസി വിവരങ്ങൾ പുതുക്കേണ്ടതിനെക്കുറിച്ചും ഓൺലൈനിൽ ഉൾപ്പെടെ നടക്കുന്ന തട്ടിപ്പുകളെക്കുറിച്ചും അന്യദേശ തൊഴിലാളികൾ സുരക്ഷിത ബാങ്കിംഗ് നടത്തേണ്ടതിനെക്കുറിച്ചും ക്ലാസ്സിൽ ചർച്ച ചെയ്തു.
സാമ്പത്തിക സാക്ഷരതാ കൗൺസിലർ സണ്ണി എ പി ക്ലാസിന് നേതൃത്വം നൽകി. ചടങ്ങിൽ റിസർവ് ബാങ്ക് പ്രതിനിധി ശ്രീകാന്ത് ടി കെ, നബാർഡ് ഡെപ്യുട്ടി ജനറൽ മാനേജർ സെബിൻ ആന്റണി, ലീഡ് ഡിസ്ട്രിക്ട് മാനേജർ അജയ് ഇ കെ, ഇസാഫ് ബാങ്ക് എക്സിക്യൂട്ടീവ് വൈസ് പ്രസിഡണ്ടുമാരായ ബോസ്കോ ജോസഫ്, സുദേവ് കുമാർ, സസ്റ്റൈനബിൾ ബാങ്കിങ് ഹെഡ് സന്ധ്യ സുരേഷ് എന്നിവർ പ്രസംഗിച്ചു.
