ഭാരതാംബ ചിത്ര വിവാദത്തില് പോരിനുറച്ച് ഗവര്ണര് രാജേന്ദ്ര അര്ലേക്കര്. ഭരണഘടനാ ലംഘനമെന്ന് ചൂണ്ടിക്കാട്ടി മുഖ്യമന്ത്രി നല്കിയ കത്തിന് ഗവര്ണറുടെ മറുപടി. മന്ത്രി വി. ശിവന്കുട്ടി രാജ്ഭവനിലെ പരിപാടി ബഹിഷ്കരിച്ചത് പ്രോട്ടോക്കോള് ലംഘനമാണെന്നും ഭരണഘടനയുടെ തലവനെ മന്ത്രി അപമാനിച്ചുവെന്നും കത്തില് ഗവര്ണര്. കേരള സര്വകലാശാല സെനറ്റ് ഹാളില് കാവി കൊടിയേന്തിയ ഭാരതാംബയുടെ ചിത്രം എത്തിച്ച സംഘാടകര്ക്കെതിരെ നിയമനടപടി സ്വീകരിക്കണമെന്ന് ആവശ്യപ്പെട്ട് രജിസ്ട്രാര് ഡിജിപിക്ക് പരാതി നല്കി.
ഔദ്യോഗിക പരിപാടികളില് കാവിക്കൊടിയേന്തിയ ഭാരതാംബ ചിത്രം വെക്കുന്നതില് വിയോജിപ്പറിയിച്ച മുഖ്യമന്ത്രിക്ക് അതേ നാണയത്തിലാണ് കത്തിലൂടെ ഗവര്ണറുടെ മറുപടി. ഭാരതാംബ എന്നത് രാഷ്ട്രീയ പാര്ട്ടിയുടെ ആശയമല്ല. ഭാരതാംബ ദേശീയ ഐക്യത്തിന്റെ ഭാഗമാണ്. രാജ്ഭവനില് നടന്ന പരിപാടിയില് നിന്ന് മന്ത്രി വി ശിവന്കുട്ടി ഇറങ്ങിപ്പോയത് പ്രൊട്ടോക്കോള് ലംഘനമെന്നും ഭരണഘടനാ തലവനെ അപമാനിക്കുന്നതെന്നും ഗവര്ണര് കത്തില് ചൂണ്ടിക്കാട്ടി.
കേരള സര്വകലാശാലയിലെ സെനറ്റ് ഹാളിലെ ഭാരതാംബ ചിത്ര വിവാദത്തില് സംഘാടകരായ ശ്രീപത്മനാഭ സേവാ സമിതിക്കെതിരെ രജിസ്ട്രാര് ഡോ.കെ.എസ് അനില്കുമാര് ഡിജിപിക്ക് പരാതി നല്കി. സംഘാടകര് പരിപാടി നടത്തിയത് അനധികൃതമായാണെന്ന് പരാതിയില് പറയുന്നു. മതപരമായ ചടങ്ങുകളുമായി മുന്നോട്ടു പോയതിനാല് അനുമതി റദ്ദാക്കിയിരുന്നു. സര്വ്വകലാശാലയുടെ മതനിരപേക്ഷത നിലപാടാണ് സംഘാടകര് ലംഘിച്ചതെന്നും രജിസ്ട്രാറുടെ പരാതിയിലുണ്ട്. ഭാരതാംബ തര്ക്കം കയ്യാങ്കളിയിലേക്ക് കൂടി പോയതോടെ നിലപാട് കടുപ്പിക്കുകയാണ് സര്ക്കാരും ഗവര്ണറും.
