എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷനുമായി (ഇപിഎഫ്ഒ) സഹകരിച്ച് ഇപിഎഫ് പേയ്മെന്റുകൾ നടത്താൻ സൗകര്യമൊരുക്കി ഫെഡറൽ ബാങ്ക്. ബാങ്കിന്റെ ഓൺലൈൻ പ്ലാറ്റ്ഫോമുകൾ മുഖേനയാണ് പേയ്മെന്റുകൾക്ക് സൗകര്യമുണ്ടാകുക. വൻകിട ബിസിനസ് സ്ഥാപനങ്ങൾ ഉൾപ്പടെയുള്ള ഇടപാടുകാർക്ക് ലളിതവും തടസരഹിതവുമായ മാർഗങ്ങളിലൂടെ സർക്കാർ സേവനങ്ങൾ ഉറപ്പാക്കുന്നതിന്റെ ഭാഗമായാണ് സംവിധാനം ഏർപ്പെടുത്തിയതെന്ന് ഫെഡറൽ ബാങ്ക് അറിയിച്ചു. ഡൽഹിയിൽ നടന്ന ചടങ്ങിൽ പുതിയ സംവിധാനം ഔപചാരികമായി ഉദ്ഘാടനം ചെയ്തു. ഇപിഎഫ്ഒ ഉദ്യോഗസ്ഥരായ ബ്രിജ് മോഹൻ സിംഗ്, അജയ് കൃഷ്ണ പലിവാൾ, കപിൽ ആനന്ദ്, ഫെഡറൽ ബാങ്ക് സീനിയർ വൈസ് പ്രസിഡന്റും ഗവർമെന്റ് ബിസിനസ് ഡിപ്പാർട്ട്മെന്റ് കൺട്രി ഹെഡുമായ അനൂപ് ടി തുടങ്ങിയവർ ചടങ്ങിൽ പങ്കെടുത്തു.
നൂതന ഡിജിറ്റൽ സേവനങ്ങൾ അവതരിപ്പിക്കുമ്പോൾ തന്നെ മാനുഷിക മൂല്യങ്ങൾ ഹൃദയത്തിൽ സൂക്ഷിക്കുക എന്ന ബാങ്കിന്റെ ആപ്തവാക്യത്തിന് അനുസൃതമായി, ഇടപാടുകാർക്ക് സൗകര്യപ്രദമായതും കാലഘട്ടത്തിന് യോജിച്ചതുമായ സേവനങ്ങൾ അവതരിപ്പിക്കുന്നതിൽ ബാങ്ക് പ്രതിബദ്ധമാണെന്ന് ഫെഡറൽ ബാങ്ക് എക്സിക്യൂട്ടീവ് ഡയറക്ടർ ഹർഷ് ദുഗർ പറഞ്ഞു. ഇത്തരം സംവിധാനങ്ങൾ ഉപഭോക്തൃ അനുഭവം മെച്ചപ്പെടുത്തുക മാത്രമല്ല, സർക്കാർ സ്ഥാപനങ്ങളുമായി സുഗമമായ ഇടപെടൽ സാധ്യമാക്കുകയും അതുവഴി സർക്കാർ സംവിധാനങ്ങളെ ജനപ്രിയമാക്കുമെന്നും അദ്ദേഹം കൂട്ടിച്ചേർത്തു.
ഇപിഎഫ് ഓഫീസ് സന്ദർശിക്കാതെ തന്നെ വ്യക്തികൾക്കും സ്ഥാപനങ്ങൾക്കും ഫെഡറൽ ബാങ്കിന്റെ നെറ്റ് ബാങ്കിങ് വഴി കുടിശിക അടക്കം പേയ്മെന്റുകൾ നടത്താൻ പുതിയ സംവിധാനം വഴി സാധിക്കുന്നതാണ്.
