ഛത്തീസ്ഗഡില് മതപരിവര്ത്തനത്തിന്റെ പേരില് അറസ്റ്റിലായ സിസ്റ്റര് വന്ദനയുടെ കാര്യത്തില് ആശങ്കയുണ്ടെന്ന് സഹോദരങ്ങള് ന്യൂസ് മലയാളത്തോട് പറഞ്ഞു. സിസ്റ്റര് വന്ദനയ്ക്കും സിസ്റ്റര് പ്രീതി മേരിക്കുമെതിരായ മതപരിവര്ത്തന ആരോപണം കള്ളക്കഥയാണെന്നും സഹോദരന് പറഞ്ഞു.
പെണ്കുട്ടികളെ മര്ദിച്ചും ഭീഷണിപ്പെടുത്തിയും മൊഴിമാറ്റിച്ച് കള്ളക്കേസ് ബലപ്പെടുത്താന് ശ്രമം നടക്കുന്നുണ്ട്. മതപരിവര്ത്തനം നടത്തിയെന്ന് പറയുന്ന പെണ്കുട്ടികള് ക്രിസ്ത്യന് മതത്തില് പെട്ടവര് തന്നെയാണ്. പിന്നെ എന്തിന് മതപരിവര്ത്തനം നടത്തുന്നുവെന്നും സിസ്റ്റര് വന്ദനയുടെ സഹോദരന് ജിന്സ് ചോദിക്കുന്നു.
വെള്ളിയാഴ്ചയാണ് കണ്ണൂര് തലശ്ശേരി ഉദയഗിരിയില് സിസ്റ്റര് വന്ദന ഫ്രാന്സിസ്, അങ്കമാലി എളവൂരില് പ്രീതി മേരി എന്നിവരെ അറസ്റ്റ് ചെയ്തത്. സഭയുടെ കീഴിലുള്ള ആശുപത്രികളിലേക്കും ഓഫീസുകളിലേക്കും ജോലിക്കായി ദുര്ഗില് നിന്ന് മൂന്ന് പെണ്കുട്ടികളെ കൂട്ടിക്കൊണ്ടുപോകാനെത്തിയപ്പോള് നിര്ബന്ധിത മതപരിവര്ത്തനവും മനുഷ്യക്കടത്തും ആരോപിച്ചായിരുന്നു അറസ്റ്റ്.
ഗുരുതര വകുപ്പുകളാണ് കന്യാസ്ത്രീകള്ക്കെതിരെ എഫ്ഐആറില് ചേര്ത്തിരിക്കുന്നത്. പെണ്കുട്ടികളെ പ്രലോഭിപ്പിച്ച് മതംമാറ്റാന് ശ്രമിച്ചുവെന്ന് എഫ്ഐആറില് പറയുന്നു. മനുഷ്യക്കടത്തും മതപരിവര്ത്തനവുമായിരുന്നു കന്യാസ്ത്രീകളുടെ ഉദ്ദേശ്യമെന്ന് എഫ്ഐആറില് പറയുന്നു.
കേസ് കെട്ടിച്ചമച്ചതെന്ന് ആരോപിച്ച് കാത്തലിക് ബിഷപ്സ് കോണ്ഫറന്സ് ഓഫ് ഇന്ത്യ (സിബിസിഐ) രംഗത്തെത്തി. വിഷയത്തില് ഇടപെടണമെന്ന് ആവശ്യപ്പെട്ട് പ്രധാനമന്ത്രിക്ക് നിവേദനം നല്കിയെന്ന് സിബിസിഐ വക്താവ് റോബിന്സണ് റോഡ്രിഗസ് അറിയിച്ചു. അറസ്റ്റിലായ കന്യാസ്ത്രീകള്ക്ക് നീതി ഉറപ്പാക്കണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയനും പ്രധാനമന്ത്രിക്ക് കത്തയച്ചിട്ടുണ്ട്. സംഭവത്തില് വിവിധ ക്രിസ്ത്യന് സഭകളും പ്രതിഷേധം രേഖപ്പെടുത്തി.
