ന്യൂയോര്ക്ക് മേയറായി പുതുവത്സരദിനത്തില് ഇന്ത്യന് വംശജനായ സൊഹ്റാന് മംദാനി സത്യപ്രതിജ്ഞ ചെയ്തു. മാന്ഹാട്ടനിലെ ഓള് സിറ്റി ഹാള് സബ്വേ സ്റ്റേഷനില് അര്ധരാത്രിയ്ക്കുശേഷമായിരുന്നു സത്യപ്രതിജ്ഞ. ന്യൂയോര്ക്ക് നഗരത്തിന്റെ ആദ്യ മുസ്ലിം മേയറാണ് മംദാനി.
രണ്ട് സത്യപ്രതിജ്ഞാചടങ്ങുകളാണ് പരമ്പരാഗതമായി ന്യൂയോര്ക്ക് മേയര്ക്കുള്ളത്. ആദ്യ സത്യപ്രതിജ്ഞാചടങ്ങ് സ്വകാര്യ ചടങ്ങാണ്. പുതുവര്ഷപ്പിറവിയില് അര്ദ്ധരാത്രിയ്ക്കുശേഷമായിരുന്നു ആദ്യ ചടങ്ങ്. ന്യൂയോര്ക്ക് അറ്റോര്ണി ജനറല് ലെറ്റീഷ്യ ജെയിംസ് ആണ് മാന്ഹാട്ടനിലെ ഓള് സിറ്റി ഹാള് സബ്വേ സ്റ്റേഷനില് നടന്ന ചടങ്ങില് മംദാനിക്ക് സത്യവാചകം ചൊല്ലിക്കൊടുത്തത്. ഖുറാനില് തൊട്ടാണ് മംദാനി സത്യപ്രതിജ്ഞ ചെയ്തത്. ന്യൂയോര്ക്ക് നഗരത്തിന്റെ പാരമ്പര്യം കാത്തുസൂക്ഷിക്കുമെന്നും ഉത്തരവാദിത്തത്തോടെ പ്രവര്ത്തിക്കുമെന്നും സത്യപ്രതിജ്ഞയ്ക്കുശേഷം മംദാനി പറഞ്ഞു.മംദാനിയുടെ ഭാര്യ രാമാ ദുവാജിയും അമ്മ മീരാ നായരും പിതാവ് മഹ്മൂദ് മംദാനിയും മറ്റ് കുടുംബാംഗങ്ങളും സ്ഥാനമൊഴിയുന്ന ന്യൂയോര്ക്ക് മേയര് എറിക് ആഡമും ചടങ്ങില് സംബന്ധിച്ചു. ഇന്ന് പ്രാദേശികസമയം ഉച്ചതിരിഞ്ഞ് ഒരു മണിക്ക് സിറ്റി ഹാളിന്റെ പടികളിലാണ് രണ്ടാമത്തെ സത്യപ്രതിജ്ഞാ ചടങ്ങ്. ഇത് പൊതുജനങ്ങള്ക്കായുള്ളതാണ്. സെനറ്റര് ബേണി സാന്ഡേഴ്സ് ചടങ്ങിന് നേതൃത്വം നല്കും.
