ജൂബി വെന്നലശേരി
ചിക്കാഗോ: ചിക്കാഗോ ക്‌നാനായ കാത്തലിക്‌ സൊസൈറ്റിയുടെ ആഭിമുഖ്യത്തില്‍ നടത്തപ്പെടുന്ന ഓണാഘോഷവും ഗ്രാന്റ്‌ പേരന്റ്‌സ്‌ ദിനാഘോഷവും സമുന്നതനായ കേരളാപ്രദേശ്‌ കോണ്‍ഗ്രസ്‌ കമ്മറ്റി ചെയര്‍മാനും, എം.എല്‍.എ.യുമായ രമേശ്‌ ചെന്നിത്തല ഉദ്‌ഘാടനം ചെയ്യുന്നു. സെപ്‌തംബര്‍ 13-ാം തീയതി വെള്ളിയാഴ്‌ച വൈകിട്ട്‌ 6 മണിക്ക്‌ കമ്മ്യൂണിറ്റി സെന്ററില്‍ വച്ചാണ്‌ ആഘോഷപരിപാടികള്‍ നടത്തപ്പെടുന്നത്‌. ഓണാഘോഷപരിപാടികളോടനുബന്ധിച്ചുള്ള ഓണസദ്യ കമ്മ്യൂണിറ്റി സെന്ററില്‍ 6 മണിക്ക്‌ ആരംഭിക്കുന്നതായിരിക്കും. ഓണസദ്യയോടനുബന്ധിച്ച്‌ വാദ്യമേളങ്ങളുടെ അകമ്പടിയോടെ ഘോഷയാത്രയും നടത്തപ്പെടുന്നതാണെന്ന്‌ കെ.സി.എസ്‌. പ്രസിഡന്റ് ജോര്‍ജ്‌ തോട്ടപ്പുറം അറിയിച്ചു. ഗ്രാന്റ്‌ പേരന്റ്‌സ്‌ ദിനാഘോഷത്തിന്റെ ഭാഗമായി ബെസ്റ്റ്‌ ഗ്രാന്റ്‌ പേരന്റ്‌സിനെ തെരഞ്ഞെടുക്കുന്നതിനുള്ള മത്സരവും ഉണ്ടായിരിക്കും. വിവിധ പോഷകസംഘടനകളുടെ നേതൃത്വത്തില്‍ അത്തപ്പൂവിടല്‍, വടംവലി, തിരുവാതിര, ഓണപ്പാട്ട്‌, ഡാന്‍സ്‌, ഗാനമേള എന്നിവ നടത്തപ്പെടുന്നതായിരിക്കും. ആഘോഷപരിപാടിയിലേക്ക്‌ എല്ലാഅംഗങ്ങളേയും കെ.സി.എസ്‌. ഭരണസമിതി പ്രത്യേകം ക്ഷണിക്കുന്നു.
Comments