ന്യൂ ജേഴ്സി: സാംസ്‌കാരിക കേരളത്തിന് തീരാകളങ്കമായി കേരളത്തില്‍ അടുത്തയിടെ ഓര്‍ത്തഡോക്ള്‍സ് യാക്കോബായ സഭാ തര്‍ക്കത്തിന്റെ ഭാഗമായി പല ഇടവകകളിലും മൃതദേഹം സംസ്‌കരിക്കുന്നതിനോട് അനുബന്ധിച്ചു നടന്ന ചേരി തിരിഞ്ഞുള്ള പോരാട്ടത്തിലും , മൃത ശരീരത്തിനോട് കാണിച്ച കടുത്ത അനാദരവിലും നവംബര്‍ 26 ന് ചേര്‍ന്ന ജസ്റ്റീസ് ഫോര്‍ ഓള്‍ മനുഷ്യാവകാശ സംഘടനയുടെ എക്‌സിക്യൂടീവ് യോഗം ശക്തമായ പ്രതിഷേധവും, അതൃപ്തിയും രേഖപ്പെടുത്തുകയും , വളരെ നിര്‍ഭാഗ്യകരമായ ഈ സ്ഥിതിവിശേഷത്തില്‍ ഐക്യരാഷ്ര സംഘടനയുടെ മനുഷ്യാവകാശ സംരക്ഷണ വിഭാഗം ഇക്കാര്യത്തെ കുറിച്ച് സമഗ്രമായി അന്വേഷിക്കുവാനും , മൃതശരീരത്തെ സംബന്ധിച്ചുള്ള വളരെ അപലനീയമായ ഇത്തരം മനുഷ്യാവകാശ ലംഘനങ്ങള്‍ ആവര്‍ത്തിക്കാതിരിക്കാന്‍ തുടര്‍നടപടികള്‍ സ്വീകരിക്കുവാന്‍ ബന്ധപ്പെട്ട ഇന്‍ഡ്യാ , കേരളാ സര്‍ക്കാരുകള്‍ക്ക് നിവേദനം സമര്‍പ്പിക്കുവാനും തീരുമാനമായി
സുപ്രീം കോടതി ഈയിടെ പുറപ്പെടുവിച്ച വിധിയുടെ പശ്ചാത്തലത്തില്‍ ഈ പ്രശ്‌നത്തിന് ശാശ്വതമായ പരിഹാരമാര്‍ഗം കണ്ടെത്തുവാന്‍ ഇന്ത്യയിലേയും, അമേരിക്കയിലേയും ഉള്‍പ്പെടെയുള്ള യാക്കോബായ ഓര്‍ത്തഡോക്‌സ് സഭാനേതാക്കളും, മെത്രാപ്പോലീത്തമാരും ഉടനടി ചര്‍ച്ചകള്‍ക്ക് മുന്‍കൈ എടുക്കണമെന്നും , അന്താരാഷ്ട്ര മനുഷ്യാവകാശ നിയമങ്ങള്‍ക്കു വിധേയമായി, സംഘട്ടനങ്ങള്‍ക്കു വഴിതുറന്നു കൊടുക്കാതെ , സമാധാനപരമായി , ഇന്ത്യയില്‍ നിലവില്‍ നില്‍ക്കുന്ന നിയമങ്ങളും, ഇടവക ജനങ്ങളുടെ അഭിപ്രായങ്ങള്‍ മാനിച്ചുകൊണ്ടും ക്രിസ്തീയ സഭകളുടെ അന്തസ് ഉയര്‍ത്തിപിടിച്ചുള്ള ശാശ്വത പരിഹാര മാര്ഗങ്ങളിലേക്കു സഭാനേതൃത്വം എത്തണമെന്നും, ഇക്കാര്യത്തില്‍ JFA സംഘടയുടെ എല്ലാ സഹകരണവും ഉണ്ടാവുമെന്നും ഭാരവാഹികള്‍ ഉറപ്പു കൊടുത്തു
സന്പൂര്‍ണ സാക്ഷരത കൈ വരിച്ചു , ഉദാത്തമായ സാംസ്‌കാരിക പൈതൃകം കൈമുതലുള്ള കേരള ജനത , ലോകമെമ്പാടും മലയാളികള്‍ വൈവിധ്യമാര്‍ന്ന കര്‍മ്മ മണ്ഡലങ്ങളില്‍ ശ്ലാഘനീയമായ പ്രവര്‍ത്തനങ്ങള്‍ കാഴ്ച വെച്ച് വെന്നിക്കൊടി പാറിച്ചു മുന്നേറുന്ന ഈ നാളുകളില്‍ , സഭാതര്‍ക്കത്തിന്റെ ഭാഗമായി കേരളത്തില്‍ മൃതശരീരത്തെ അവഹേളിക്കും വിധമുള്ള നിഷ്ടൂര പ്രവര്‍ത്തികളില്‍ ഏര്‍പ്പെടുന്നത് പ്രബുദ്ധരായ മലയാളി സമൂഹത്തിനു ലജ്ജാവഹമാണെന്നും , ഇത്തരത്തില്‍ കാര്യങ്ങള്‍ കൈവിട്ടുപോകുന്നതിലുള്ള ഉല്‍കണ്ഠയും ആശങ്കയും JFA എക്‌സിക്യൂട്ടീവ് അംഗങ്ങള്‍ പങ്കുവച്ചു.
ജെ എഫ് എ ചെയര്‍മാന്‍ തോമസ് മൊട്ടക്കലിന്റെ അധ്യക്ഷതയില്‍ കൂടിയ യോഗത്തില്‍ മുന്‍ ചെയര്‍മാന്‍ തോമസ് കൂവള്ളൂര്‍ , പ്രസിഡന്റ് പ്രേമ തെക്കേക്ക്, ജനറല്‍ സെക്രട്ടറി കോശി ഉമ്മന്‍ ടി , PRO തങ്കം അരവിന്ദ് , വൈസ് പ്രസിഡന്റ് വര്‍ഗീസ് മാത്യു (മോഹന്‍) , ഡയറക്ടര്‍മാരായ ഗോപിനാഥ കുറുപ്പ്, പി പി ചെറിയാന്‍ , ഉപദേശക സമിതി അംഗങ്ങളായ ജോയിച്ചന്‍ പുതുക്കുളം, ചെറിയാന്‍ ജേക്കബ്, ഷാജി എണ്ണശ്ശേരില്‍ , ഓഡിറ്റര്‍ ജോര്‍ജ് ജോസഫ് എന്നിവര്‍ പങ്കെടുത്തു.
Comments