ഷിക്കാഗോ: ഇന്ത്യന് നാഷണല് ഓവര്സീസ് കോണ്ഗ്രസ് ഷിക്കാഗോയുടെ നേതൃത്വത്തില് സ്വതന്ത്ര ഇന്ത്യയുടെ അറുപത്തേഴാമത് റിപ്പബ്ലിക് ദിനാഘോഷങ്ങള് ജനുവരി 29-നു വെള്ളിയാഴ്ച കെ.പി.സി.സി വൈസ് പ്രസിഡന്റും ഗവണ്മെന്റ് പ്ലീഡറുമായ അഡ്വ. ലാലി വിന്സെന്റ് ഉദ്ഘാടനം ചെയ്തു. മാതൃരാജ്യത്തിന്റെ ദേശഭക്തിനിറഞ്ഞുനിന്ന ആഘോഷ പരിപാടികളില് നൂറുകണക്കിന് ആളുകള് പങ്കെടുത്തു. എണ്ണമറ്റ പ്രതിസന്ധികളെ ചെറുത്ത് തോല്പിച്ച് സ്വതന്ത്രപരമാധികാര രാഷ്ട്രം എന്ന നിലയ്ക്കുള്ള ഭാരതത്തിന്റെ യാത്ര ഇന്ന് അറുപത്തേഴ് വയസിന്റെ ത്രിവര്ണ്ണ തിളക്കത്തില് എത്തി നില്ക്കുന്നതിന്റെ മഹത്വം കോണ്ഗ്രസ് എന്ന ലോകത്തിലെ വലിയ പ്രസ്ഥാനത്തിന്റെ നേരായ വഴിയിലൂടെ ദിശാബോധമുള്ള നേതാക്കളുടെ ജീവത്യാഗത്തിന്റെ ഫലമായിട്ടാണ് കൈവരിച്ചതെന്ന് ലാലി വിന്സെന്റ് തന്റെ ഉദ്ഘാടന പ്രസംഗത്തില് പറഞ്ഞു. സോണിയാഗാന്ധിയുടേയും, കരണ്സിംഗിന്റേയും അംഗീകാരമുള്ള ഐ.എന്.ഒ.സിയ്ക്ക് എല്ലാവിധ ഭാവുകങ്ങളും കെ.പി.സി.സി വൈസ് പ്രസിഡന്റ് നേരുകയുണ്ടായി. ഐ.എന്.ഒ.സി ഷിക്കാഗോ പ്രസിഡന്റ് ഗ്ലാഡ്സണ് വര്ഗീസിന്റെ അധ്യക്ഷതയില് കൂടിയ സമ്മേളനത്തില് സെക്രട്ടറി സിനു പാലയ്ക്കാത്തടം വിശിഷ്ടാതിഥികളെ മുത്തുക്കുടകളുടേയും താലപ്പൊലിയുടേയും അകമ്പടിയോടെ വേദിയിലേക്ക് ക്ഷണിച്ച് ആമുഖ പ്രസംഗം നടത്തി. തുടര്ന്ന് ഭാരതത്തിന്റേയും അമേരിക്കയുടേയും ദേശീയ ഗാനങ്ങള് ബ്യൂലബെന്, ബ്യൂണബെന്, അലന് ചേന്നോത്ത്, എന്നിവര് ആലപിച്ചത് ദേശഭക്തിയുണര്ത്തി. അച്ചന്കുഞ്ഞ് ബൊക്കെ നല്കി വിശിഷ്ടാതിഥിയെ സ്വീകരിച്ചു. ഐ.എന്.ഒ.സി നാഷണല് ജനറല് സെക്രട്ടറി ഡോ. സാല്ബി പോള് ചേന്നോത്ത് നിറഞ്ഞ സദസിന് സ്വാഗതം ആശംസിച്ചുകൊണ്ട് ഐ.എന്.ഒ.സിയുടെ സ്തുത്യര്ഹമായ പ്രവര്ത്തനങ്ങളെക്കുറിച്ചും റിപ്പബ്ലിക് ദിനാഘോഷങ്ങളുടെ പ്രസക്തിയെക്കുറിച്ചും സംസാരിച്ചു. അധ്യക്ഷ പ്രസംഗം നടത്തിയ പ്രസിഡന്റ് ഗ്ലാഡ്സണ് വര്ഗീസ് സ്വതന്ത്ര ഇന്ത്യയുടെ 67 വര്ഷത്തെ പ്രയാണത്തില് കോണ്ഗ്രസ് രാഷ്ട്രത്തിനു നേടിത്തന്ന സംഭാവനകളെക്കുറിച്ച് വിവരിച്ചു. നാഷണല് യൂത്ത് കോണ്ഗ്രസ് കോര്ഡിനേറ്റര് സുബാഷ് ജോര്ജ് ആയിരുന്നു എം.സി. ആശംസകള് അര്പ്പിച്ചുകൊണ്ട് ലൂയി ചിക്കാഗോ, ഐ.എന്.ഒ.സി എക്സിക്യൂട്ടീവ് വൈസ് പ്രസിഡന്റ് റ്റോമി അംബേനാട്ട്, ജയ്ബു കുളങ്ങര, ഡോ. ജോസ് ആന്റണി, George Joseph Kottukkapally, ചെറിയാന് വേങ്കടത്ത്, ജോണ് ഇലക്കാട്ട്, മനു നൈനാന്, ഹെറാള്ഡ് ഫിഗുരേദോ, അച്ചന്കുഞ്ഞ് മാത്യു, ഐ.എന്.ഒ.സി നാഷണല് ഐ.ടി കോര്ഡിനേറ്റര് വിശാഖ് ചെറിയാന് എന്നിവര് സംസാരിച്ചു. എല്സി വേങ്കിടത്തിന്റെ നേതൃത്വത്തിലുള്ള താലപ്പൊലിയും വിവിധ കലാപരിപാടികളും സമ്മേളനത്തിന് കൊഴുപ്പേകി. മാത്യു ഡാനിയേലിന്റെ നന്ദി പ്രകാശനത്തോടും, ഡിന്നറോടുംകൂടി പരിപാടികള്ക്ക് തിരശീല വീണു.
Comments