ഷിക്കാഗോ: അകാലത്തില്‍ ദുരൂഹ സാഹചര്യത്തില്‍ മരണപ്പെട്ട പ്രവീണിന്റെ രണ്ടാം ചരമവാര്‍ഷികം ദുഖസാന്ദ്രമായ അന്തരീക്ഷത്തില്‍ നടത്തപ്പെട്ടു. പ്രവീണ്‍ മരണപ്പെട്ട കാര്‍ബണ്‍ഡേയ്‌ലിലില്‍ പ്രവീണിനെ കണ്ടുകിട്ടിയെന്നു പറയപ്പെടുന്ന സ്ഥലത്തുവെച്ച് എഴുപതില്‍പ്പരം ആളുകള്‍ ഒത്തുചേര്‍ന്ന് കുടുംബാംഗങ്ങളോടൊപ്പം അനുസ്മരണ നടത്തി. അനുസ്മരണാ പ്രാര്‍ത്ഥനകള്‍ക്ക് പ്രവീണിന്റെ മാതൃസഹോദരന്‍കൂടിയായ റവ.ഫാ. ലിജു പോള്‍ നേതൃത്വം നല്കി. ഇല്ലിനോയി മുന്‍ സ്റ്റേറ്റ് ലഫ്. ഗവര്‍ണ്ണര്‍ ഷീലാ സൈമണും കുടുംബാംഗങ്ങളും, സ്റ്റേറ്റ് റെപ്രസന്റേറ്റീവ് ടെറി ബ്രയന്റ്, സിറ്റി മാനേജര്‍, പോലീസ് ചീഫ്, എസ്.ഐ.യു വൈസ് പ്രസിഡന്റ്, ഡീന്‍ എന്നിവരും ചടങ്ങില്‍ സംബന്ധിച്ചു. ഷിക്കാഗോയില്‍ എത്തിച്ചേര്‍ന്ന കുടുംബാംഗങ്ങളെ മുന്‍ ലഫ് ഗവര്‍ണ്ണര്‍ ഷീലാ സൈമണ്‍ തങ്ങളുടെ വസതിയില്‍ താമസ സ്ഥലമൊരുക്കി സ്വീകരിച്ചു. ഷിക്കാഗോ മാര്‍ത്തോമാ ചര്‍ച്ചില്‍ അഞ്ഞൂറില്‍പ്പരം ആളുകള്‍ കൂടിച്ചേര്‍ന്നു നടത്തിയ അനുസ്മരണാ പ്രാര്‍ത്ഥനകള്‍ക്ക് ഇടവക വികാരി റവ. ഏബ്രഹാം പി. സ്കറിയയും, എക്യൂമെനിക്കല്‍ ചര്‍ച്ച് പ്രതിനിധികളായെത്തിയ മറ്റു വൈദീകരും നേതൃത്വം നല്കി. അനുസ്മരണ സമ്മേളനത്തില്‍ പ്രവീണ്‍ ആക്ഷന്‍ കൗണ്‍സില്‍ കണ്‍വീനര്‍ ഗ്ലാഡ്‌സണ്‍ വര്‍ഗീസ് ഏവരേയും സ്വാഗതം ചെയ്തു. കോണ്‍ഗ്രസ് വുമണ്‍ ജാന്‍ ഷെക്കോസ്കി, മോര്‍ട്ടന്‍ഗ്രോവ് മേയര്‍ ഡാന്‍ഡി മരിയ, ഡോ. സാം ജോര്‍ജ്, സ്റ്റേറ്റ് സെനറ്റര്‍ മൈക്കിള്‍ നോളണ്ട്, കോണ്‍ഗ്രസ്മാന്‍ ബോബ് ബോള്‍ഡിന്റെ പ്രതിനിധി സ്‌കോട്ട് ലൈറ്റ്‌സോ, ഇല്ലിനോയി സ്റ്റേറ്റ് സെനറ്റര്‍ ലോറ മര്‍ഫി, സ്റ്റേറ്റ് റെപ്രസന്റേറ്റീവ് ലിന്‍ഡാ ചാപ്പാലാവിയ, ഡോ. ബെന്‍മര്‍ ഗോളിസ് എന്നിവര്‍ ചടങ്ങില്‍ സംസാരിച്ചു. പ്രവീണിന്റെ പേരില്‍ ആരംഭിച്ച സ്‌കോളര്‍ഷിപ്പിന്റെ പ്രകാശ നകര്‍മ്മം കോണ്‍ഗ്രസ് വുമണ്‍ ജാന്‍ ഷെക്കോസ്കി നിര്‍വഹിച്ചു. ക്രിമിനോളജി ആന്‍ഡ് ക്രമിനല്‍ ജസ്റ്റീസില്‍ മേജറോ മൈനറോ എടുത്ത് പഠിക്കുന്ന ഒരു വിദ്യാര്‍ത്ഥിക്ക് ആയിരം ഡോളറിന്റെ ഒരു സ്‌കോളര്‍ഷിപ്പാണ് ഏര്‍പ്പെടുത്തിയിരിക്കുന്നത്. ചടങ്ങില്‍ ആനി റോയി, ഷിജി അലക്‌സ് എന്നിവര്‍ എം.സിമാരായി പ്രവര്‍ത്തിച്ചു. ഷിക്കാഗോ മാര്‍ത്തോമാ ചര്‍ച്ച് ഗായകസംഘം ഗാനങ്ങള്‍ ആലപിച്ചു. പ്രവീണിന്റെ മാതാവ് ലൗലി വര്‍ഗീസ് കേസിന്റെ ഇതുവരെയുള്ള പ്രവര്‍ത്തനങ്ങള്‍ വിശദീകരിച്ചു. ചടങ്ങുകള്‍ക്ക് പ്രവീണ്‍ ആക്ഷന്‍ കൗണ്‍സില്‍ അംഗങ്ങള്‍ നേതൃത്വം നല്കി. പങ്കെടുത്തവര്‍ക്ക് പ്രവീണിന്റെ മാതാപിതാക്കളായ മാത്യുവും ലൗലിയും നന്ദി പറഞ്ഞു.
Comments