ഓര്മ തിങ്ക് ഫെസ്റ്റ് ഒന്നാം ഘട്ടം
Text Size
ജോര്ജ് നടവയല്
geodev@hotmail.com
Story Dated: Saturday, January 09, 2016 02:35 hrs UTC
ഫിലഡല്ഫിയ: ഓവര്സീസ് റസിഡന്റ് മലയാളീസ് അസ്സോസിയേഷന് (ഓര്മ) ക്രിസ്മസ് ന്യൂ ഇയര് ആഘോഷങ്ങളോടനുബന്ധിച്ച് നടത്തിയ '' തിങ്ക് ഫെസ്റ്റ്'' ''ചിന്തോത്സവം'' കാലികപ്രസക്തങ്ങളായ ആശയ ദീപങ്ങള് കൊളുത്തി. ഓര്മാ ദേശീയപ്രസിഡന്റ് ജോസ് ആറ്റുപുറം അദ്ധ്യക്ഷനായി. ഇന്ത്യാ പ്രസ് ക്ലബ് ഓഫ് നോര്ത്ത് അമേരിക്കാ ദേശീയ സെക്രട്ടറി വിന്സന്റ് ഇമ്മാനുവേല് ക്രിസ്മസ് ന്യൂ ഇയര് ആഘോഷങ്ങള്ക്ക് തിരി തെളിച്ചു. ഫൊക്കാനാ ഭാരത ദര്ശനം പദ്ധതിയുടെ ചെയര്പേഴ്സണ് അല്ക്സ് തോമസ് ഓര്മാ ചിന്തോത്സവം ഉദ്ഘാടനം ചെയ്തു.
'പൊതുപ്രവര്ത്തകരുടെ പ്രാധാന്യം' എന്ന വിഷയത്തിലാണ് അലക്സ് തോമസ് പ്രസംഗിച്ചത്. പൊതുപ്രവര്ത്തകരാണ് സമൂഹത്തിന്റെ ജീര്ണ്ണതകള്ക്കെതിരേയുള്ള തിരുത്തല് ശക്തികള് എന്ന് അല്ക്സ് തോമസ് സമര്ത്ഥിച്ചു. എല്ലാ പ്രവാചകരും ഋഷിമാരും വിശുദ്ധരും ചിന്തകരും ദേശീയ നേതാക്കളും താത്വികാചാര്യരും സത്യത്തിനും നീതിയ്ക്കും വേണ്ടി നിലകൊള്ളുന്ന ശാത്രജ്ഞരും സാമൂഹിക പ്രവര്ത്തകരും കലാകാരരും സാഹിത്യകാരും പത്ര പ്രവര്ത്തകരും പുരോഗമനവാദികളും പൊതുപ്രവര്ത്തകരുടെ ഗണത്തില് പെടുന്നു. അവരുടെ ത്യാഗങ്ങളാണ് ഇരുളാണ്ടുപോകുമായിരുന്ന മനുഷ്യ പരിണാമങ്ങളെ പ്രപഞ്ചത്തിനു വിനാശമാകുമായിരുന്ന ദുരന്തങ്ങളില് നിന്ന് തടഞ്ഞിട്ടുള്ളത്.
'അമേരിക്കന് രാഷ്ട്രീയത്തില് മലയാളികളുടെ പങ്കാളിത്തം വര്ദ്ധിപ്പിക്കുവാന് എന്തു ചെയ്യണം' എന്നതാണ് വിന്സന്റ് ഇമ്മാനുവേല് ചിന്തോത്സവത്തില് വിഷയമാക്കിയത്. രാഷ്ട്രീയം അമേരിക്കന് മലയാളിക്ക് ബാലികേറാ മലയല്ല. അതിന് തെളിവായി പ്രശസ്തരായ അമേരിക്കന് മലയാളികള് വര്ത്തമാനപ്പത്രങ്ങളില് നിറയുന്നുണ്ട്. അമേരിക്കയിലെ ശക്തരായ രാഷ്ട്രീയ നേതാകള്ക്ക് ഷെയ്ക് ഹാന്റ് കൊടുക്കുന്നതു കൊണ്ടും അവര്ക്കൊപ്പം ഫോട്ടോ എടുക്കുന്നതു കൊണ്ടും മാത്രം രാഷ്ട്രീയ പ്രവര്ത്തനം സാധിച്ചു എന്ന് തൃപ്തിപ്പെട്ടിരുന്ന സാഹചര്യത്തിനു പ്രസക്തിയില്ലാതായി. ഇന്ത്യയിലെപോലെ ഇവിടെയും രാഷ്ട്രീയം രാഷ്ട്രീയ പ്രവര്ത്തകരുമായുള്ള ''കമ്മ്യൂണിക്കേഷന്റെയും ഇടപഴകലിന്റെയും ഫണ്ടിങ്ങുകളുടെയും ഇല്ക്ഷന് മത്സരങ്ങളുടെയും അധികാരം പങ്കു വയ്ക്കുന്നതിന്റെയും സൗഹൃദങ്ങളുടെയും അവസരം പ്രയോജനപ്പെടുത്തുന്നതിന്റെയും കലയാണ്. ജോലിയും ബിസിനസ്സും രാഷ്ട്രീയവും ഒരുപോലെ കൊണ്ടു പോകാന് ''അവസരങ്ങളുടെ കല'' എന്ന യുക്തി മാത്രമാണ് വേണ്ടത്.
Comments