എബി ആനന്ദ്‌

ദി യൂണിവേഴ്സ്റ്റി ഓഫ് ടെക്‌സസ് അറ്റ് ആസ്റ്റിന്‍ മലയാള വിഭാഗം പ്രൊഫസര്‍ ഡോ.ദര്‍ശന മനയത്ത് ശശി 2017 ടെക്‌സസ് ഫോറിന്‍ ലാന്‍ഗ്വേജ് ടീച്ചിംഗ് എക്‌സലന്‍സ് അവാര്‍ഡിന് നാമനിര്‍ദ്ദേശം ചെയ്യപ്പെട്ടു. 2014 മുതല്‍ ഡോ.ദര്‍ശന പ്രസ്തുത യൂണിവേഴ്‌സിറ്റിയില്‍ മലയാള ഭാഷയും സാഹിത്യവും പഠിപ്പിച്ചു വരുന്നു. 2013 ല്‍ ഡോ.എം.ജി. ശശിഭൂഷന്റെ മേല്‍നോട്ടത്തില്‍ കേരള യൂണിവേഴ്‌സിറ്റിയില്‍ നിന്ന് 'ചരിത്രവും സര്‍ഗ്ഗാത്മക സ്വാതന്ത്ര്യവും മലയാള നോവലില്‍' എന്ന വിഷയത്തില്‍ പി.എച്ച്.ഡി. ബിരുദം കരസ്ഥമാക്കി. 2007 ല്‍ എം.ഫില്‍(A grade) ബിരുദവും കരസ്ഥമാക്കി. 2012 ല്‍ കേരള ഗവണമെന്റിന്റെ 'മലയാളം മിഷന്‍' സ്ഥാപനത്തില്‍ 'നമുക്കും പഠിക്കാം മലയാളം' എന്ന പ്രോഗ്രാമിന് തുടക്കമിടുകയും തുടര്‍ന്ന് 2014 വരെ അതിന്റെ പ്രോഗ്രാം കോര്‍ഡിനേറ്ററും ഇന്‍സ്ട്രക്ടറും ആയിരിക്കുകയും ചെയ്തു.

ഈ പ്രോഗ്രാം വിദേശികള്‍ക്കും കേരളത്തില്‍ ജോലി ചെയ്യുന്ന ഇന്‍ഡ്യാ ഗവണ്‍മെന്റിന്റെ മലയാളികളല്ലാത്ത ഉദ്യോഗസ്ഥര്‍ക്കും വേണ്ടിയുള്ള ഒരു മലയാള പഠന സംരംഭമാണ്. 2008 മുതല്‍ 2014 വരെ ആള്‍ ഇന്ത്യാ റേഡിയോയിലും ദൂരദര്‍ശനിലും അനൗണ്‍സറായി സേവനം അനുഷ്ഠിച്ചിട്ടുണ്ട്. 2014 ല്‍ കേരളത്തിന്റെ സാംസ്‌കാരിക കലയായ പടയണിയെ ആധാരമാക്കിയുള്ള ഒരു പഠന പുസ്തകം പ്രസിദ്ധീകരിച്ചു. ഓസ്റ്റിന്റ യൂണിവേഴ്‌സ്റ്റിയില്‍ ഡോ.ദര്‍ശന തയ്യാറാക്കിയ മലയാള ഭാഷാ പഠന പുസ്തകവും സിലബസ്സും വളരെ അനായാസമായി വിദ്യാര്‍ത്ഥികള്‍ക്ക് മലയാള ഭാഷ പഠിക്കാനാവുന്നതാണ്. വിദ്യാര്‍ത്ഥികളാണ് 2017 FLTF അവാര്‍ഡിന് ഡോ.ദര്‍ശനയെ നാമനിര്‍ദ്ദേശം ചെയ്തത്.