അശുഭകരമായ വാര്‍ത്തകളാണ് നാം നിത്യവും കേട്ടുകൊണ്ടിരിക്കുന്നത്.എവിടെ നോക്കിയാലും അപകട മരണങ്ങളുടെ പരമ്പര. നിരത്തുകളില്‍ ജീവന്‍
നഷ്ടപ്പെടുന്നവര്‍ ഒരുപാട്. അപകടത്തില്‍പെട്ട് ജീവച്ഛവമായി കിടക്കുന്നവര്‍ അതിലേറെ. അത്താണി നഷ്ടപ്പെട്ട കുടുംബങ്ങളുടെ കണ്ണീര്‍.
ഒരു യാദ്ര്ശ്ചികത വരുത്തിവയ്ക്കുന്ന നിശബ്ദത കനത്ത ആഘാതം ഉണ്ടാക്കുന്നു.

ആരെയും നമുക്ക്‌ കുറ്റപ്പെടുത്താം. സര്‍ക്കാരിനെ, ജനങ്ങളെ, നിയമങ്ങളെ. ആ പട്ടിക നീണ്ടു പോകുന്നതല്ലാതെ നഷടം പേറുന്നവന് പ്രയോജനമൊന്നും ഇല്ല.റോഡുകള്‍ അപകടക്കെണിയോരുക്കി കാത്തിരിക്കുമ്പോള്‍ നാട്ടില്‍ അപകടങ്ങള്‍ തുടര്‍ക്കഥയാകുന്നു.

ഇവിടെയാണ് നമുക്കൊരു പ്രതീക്ഷയുണ്ടാകുന്നത്. ഋഷിരാജ് സിംഗ് ഐപിഎസ്.നട്ടെല്ലുള്ള ഐപിഎസുകാരന്‍. ആത്മാര്‍ഥതയും സത്യസന്ധതയും ഉള്ള പല ഉദ്യോഗസ്ഥരും നമുക്ക് ഉണ്ടായിട്ടുണ്ടെങ്കിലും ഋഷിരാജ് സിംഗ് അതില്‍നിന്നെല്ലാം വ്യത്യസ്തനാകുന്നു.

ഋഷിരാജ് സിംഗ് ട്രാന്‍സ്പോര്‍ട്ട് കമ്മീഷണര്‍ ആയി ചുമതലയേറ്റ ശേഷം നടപ്പാക്കിയ പരിഷ്കാരങ്ങള്‍ മാറ്റത്തിന്‍റെ സൂചകങ്ങളാണ്. വര്‍ദ്ധിച്ചുവരുന്ന റോഡപകടങ്ങളില്‍ കാര്യമായ കുറവുണ്ടായതായി കണക്കുകള്‍ സൂചിപ്പിക്കുന്നു. 2012 സെപ്റ്റംബര്‍ മുതല്‍ 2013 സെപ്റ്റംബര്‍ വരെ കേരളത്തില്‍ 29403 അപകടങ്ങളാണ് ഉണ്ടായത്. അതിനു തൊട്ടു മുമ്പ് ഇത് 30056 ആയിരുന്നു. ഈ കാലഘട്ടത്തില്‍ കേരളത്തിലെ റോഡുകളില്‍ 3421 ജീവന്‍ പൊലിഞ്ഞു.അതിനു മുന്‍പ്‌ 3520 ആയിരുന്നു മരണ സംഖ്യ. ഇരുചക്രവാഹനങ്ങളില്‍ ഹെല്‍മറ്റ് നിര്‍ബന്ധമാക്കിയതോടെ അപകടത്തില്‍പെട്ട് തലയ്ക്കു പരിക്കു പറ്റുന്നവരുടെ എണ്ണത്തില്‍ വന്‍ കുറവുണ്ട്. സെപ്തംബര്‍ 20 മുതല്‍ പരിശോധന കര്‍ശനമാക്കിയതോടെ നവംബര്‍ ആറ് വരെ 810ഓളം അപകടങ്ങളുടെ കുറവുണ്ടായി.

ഋഷിരാജ് സിംഗിന്‍റെ നടപടികള്‍ക്കെതിരെ എതിര്‍പ്പുകള്‍ പല ഭാഗങ്ങളില്‍ നിന്നും ഉണ്ടായി.സ്പീഡ്‌ ഗവര്‍ണര്‍ ഘടിപ്പിക്കുന്നതിനെതിരെ ബസ്‌ അനിശ്ചിതകാല കാല സമരം പ്രഖ്യാപിച്ചു. പക്ഷെ സര്‍ക്കാരും ജനങ്ങളും ഋഷിരാജ് സിംഗിന് പൂര്‍ണ പിന്തുണ നല്‍കിയപ്പോള്‍ എല്ലാം മാഞ്ഞുപോയി.സമരം വെള്ളത്തില്‍ വരച്ച വരപോലായി.സ്വകാര്യ ബസ്സുകളിലും കെ.എസ്.ആര്‍.ടി.സി. ബസ്സുകളിലും ടിപ്പര്‍ ലോറികളിലും സ്പീഡ്‌ ഗവര്‍ണര്‍ ഘടിപ്പിക്കാന്‍ അദ്ദേഹം കാണിച്ച ഉത്സാഹം അഭിനന്ദനാര്‍ഹമാണ്. അതുവഴി അപകടങ്ങളില്‍ വലിയ കുറവ് വന്നിട്ടുണ്ട്. വാഹനങ്ങളുടെ പ്രവര്‍ത്തനക്ഷമതയില്‍ കൃത്രിമം കാണിക്കുന്നവരുടെ പെര്‍മിറ്റ് റദ്ദാക്കുകയും ചെയ്തു.

അപകടം കണ്ടുകഴിഞ്ഞാല്‍ തിരിഞ്ഞുനോക്കാതെ പോകുന്നവരാണ് നമ്മളില്‍ കൂടുതല്‍ പേരും. അതിനു അവരെ കുറ്റം പറഞ്ഞിട്ട് കാര്യമില്ല. കട്ടവനെ കിട്ടിയില്ലെങ്കില്‍ കിട്ടിയവനെ പ്രതിയാക്കുന്ന നമ്മുടെ നിയമത്തിലെ പഴുതാണ് പ്രശ്നം. അതിനും അദ്ദേഹം പരിഹാരമുണ്ടാക്കി. ഇപ്പോള്‍ ജനങ്ങള്‍ തന്നെ അപകടത്തില്‍പെട്ടവരെ അതിവേഗം ആശുപത്രിയില്‍ എത്തിക്കാന്‍ മുന്‍കൈ എടുക്കുന്നു.

നിയമങ്ങള്‍ ഇല്ലാത്തതല്ല പ്രശ്നം. അവയൊന്നും തന്നെ കൃത്യമായി പാലിക്കപ്പെടുന്നില്ല. അദ്ദേഹം നിയമങ്ങളെ ഓര്‍മ്മപ്പെടുത്തുന്നു.റോഡ്‌ ഉപയോഗിക്കുന്നവരെക്കാള്‍ കൂടുതല്‍ റോഡ്‌ ദുരുപയോഗം ചെയ്യുന്നവരാണ്.പാട്ടുകേട്ട് അശ്രദ്ധയോടെ വാഹനം ഓടിക്കുന്നു.ഹെല്‍മെറ്റ് ഇല്ലാതെ യാത്രചെയ്യുന്നു. തെറ്റായ വശത്തുകൂടി ഓവര്‍ടെക്ക് ചെയ്യുന്നു. ചീറിപ്പാഞ്ഞു വാഹനങ്ങള്‍ ഓടിക്കുന്നു. ഇങ്ങിനെയൊന്നും ചെയ്യരുത്‌ എന്ന് എല്ലാവര്ക്കും അറിയാം.പക്ഷെ നാം എല്ലാം മറക്കുന്നു. ഓര്‍മ്മപ്പെടുത്താന്‍  ഒരാളുവേണ്ടേ? ബൈക്കിന്‍റെ പുറകിലിരിക്കുന്നവര്‍ക്കും ഹെല്‍മറ്റ് നിര്‍ബന്ധമാക്കണമെന്നു ഇപ്പോള്‍ അദ്ദേഹം പറയുമ്പോള്‍ എതിര്‍പ്പുകള്‍ വീണ്ടും ഉയരുന്നു. എന്നാല്‍ അപകടങ്ങളില്‍പെടുന്നത് നമ്മുടെ കൂട്ടുകാരനോ വീട്ടുകാരനൊ അല്ലെ? അതിനാല്‍ എതിര്‍പ്പുകള്‍ മാറിവച്ച് അദ്ദേഹത്തോട് സഹകരിക്കണം.

വളയം പിടിക്കുന്നവന്റെ കൈയില്‍ എത്രയോ ജീവിതങ്ങള്‍ നാളെ സ്വപ്നം കണ്ടിരിക്കുന്നുണ്ട്. ആ സ്വപ്നങ്ങളെ തല്ലിക്കെടുത്തല്ലേ.റോഡുകളെ കുറ്റം പറയുന്നതില്‍ കാര്യമില്ല.അലസമായ ഡ്രൈവിങ്ങും മദ്യപാനവും മൂലമാണ് റോഡപകടങ്ങള്‍ അധികവും ഉണ്ടാകുന്നത്.

ട്രാഫിക് പോലീസിലും , കെഎസ്ഇബിയിലും മികച്ച പ്രവര്‍ത്തനം നടത്തി തന്‍റെ ആത്മാര്‍ഥത തെളിയിച്ചിട്ടുണ്ട് സിംഗ്. വ്യാജ സിഡി നിര്‍മ്മിക്കുന്ന ക്കുന്ന സ്ഥലങ്ങളില്‍ റൈഡ് നടത്തി അവരുടെ നട്ടെല്ലൊടിച്ചു.മൂന്നാറില്‍ അനധികൃത കെട്ടിടങ്ങള്‍ ഇടിച്ചു നിരത്താന്‍ പറഞ്ഞയച്ചപ്പോള്‍ കുടിയൊഴിപ്പിക്കലിന് പൂര്‍ണ സംരക്ഷണം നല്‍കി. സമരക്കാരുടെ ഒരു കൈ പോലും ഐപിഎസ് 85 ബാച്ചുകാരനായ ആ പോലീസ്‌ ഓഫീസര്‍ക്കുനേരെ ഉയര്‍ന്നില്ല.ഇങ്ങിനെ ആത്മാര്‍ത്ഥതയും സത്യസന്ധതയും ഉള്ള ഉദ്യോഗസ്ഥരെയാണ് നമ്മുടെ നാടിനു ആവശ്യം. സര്‍ക്കാര്‍ ഉദ്യോഗസ്ഥര്‍ ആത്മാര്‍ത്ഥമായി ശ്രമിച്ചാല്‍ മണല്‍ മാഫിയയും കരിമണല്‍ ലോബിയും വനം കൊള്ളക്കാരും ഭൂമാഫിയയും ഇവിടെ നിന്നു
കെട്ടുകെട്ടും. ഋഷിരാജ് സിംഗ് അതാണ്‌ നമുക്ക്‌ കാണിച്ചുതരുന്നത്.

നമുക്ക്‌ ശുഭവാര്‍ത്തകള്‍ തരാന്‍ വേണ്ടി പരിശ്രമിക്കുന്ന ഋഷിരാജ് സിംഗ് ആറുമാസത്തിനുള്ളില്‍ തന്‍റെ പദവിയില്‍ നിന്ന് ഔദ്യോഗികമായി വിടവാങ്ങുകയാണ്. മലയാളിയെ സ്നേഹിച്ച, മലയാളത്തെ സ്നേഹിച്ച, ആ മനുഷ്യന്‍ നമ്മുടെ നാട്ടില്‍ നിന്ന് വിടപറയുന്നു എന്നത് ഒരു ദുഖസത്യമായി അവശേഷിക്കുന്നു.