പ്രകൃതിവാതകങ്ങളുടെ പരമാവധി ഉപയോഗം വീടുകളിലും വാഹനങ്ങളിലും വാണിജ്യ, വ്യവസായശാലകളിലും ഉറപ്പാക്കുകയെന്ന ലക്ഷ്യത്തോടെ, പൊതുമേഖലാ സ്ഥാപനമായ ഭാരത് പെട്രോളിയം കോർപറേഷൻ ലിമിറ്റഡ് (ബിപിസിഎൽ) രാജ്യവ്യാപക ക്യാംപെയ്ൻ ആരംഭിച്ചു. ‘പിഎൻജി 2.0’ എന്ന പേരിൽ തുടക്കമിട്ട ക്യാംപെയ്നിലൂടെ പൈപ്പ്ഡ് നാചുറൽ ഗ്യാസ് (പിഎൻജി), കംപ്രസ്ഡ് നാചുറൽ ഗ്യാസ് (സിഎൻജി) എന്നിവയുടെ പ്രാധാന്യം ജനങ്ങളെ ബോധവൽക്കരിക്കുകയാണ് ലക്ഷ്യമിടുന്നത്. പെട്രോളിയം ആൻഡ് നാചുറൽ ഗ്യാസ് റെഗുലേറ്ററി ബോർഡിന്റെ നിർദേശപ്രകാരം നഗര ഗ്യാസ് വിതരണ വ്യവസായ മേഖലയുടെ സഹകരണത്തോടെയാണ് ക്യാംപെയ്ൻ സംഘടിപ്പിക്കുന്നത്. രാജ്യമെമ്പാടുമുള്ള സിറ്റി ഗ്യാസ് വിതരണ കമ്പനികളെ ഉൾപ്പെടുത്തി ഏകീകൃത പ്ലാറ്റ്ഫോം തുടങ്ങുമെന്നും ബിപിസിഎൽ അറിയിച്ചു. ബോധവൽക്കരണ ക്യാംപെയ്ന്റെ ഭാഗമായി വിവിധ മേഖലകളിലെ പ്രമുഖരെ ഉൾപ്പെടുത്തിയുള്ള പരസ്യചിത്രങ്ങളും പുറത്തിറക്കും.
പ്രകൃതിവാതകത്തിലേക്ക് പരിവർത്തനപ്പെടുകയെന്ന പൊതുലക്ഷ്യത്തിനായി വ്യവസായ ലോകം കൈകോർക്കുന്നതിന്റെ ഉത്തമ ഉദാഹരണമാണ് പിഎൻജി 2.0 ക്യാംപെയ്ൻ എന്ന് ബിപിസിഎൽ മാർക്കറ്റിംഗ് വിഭാഗം ഡയറക്ടർ ശുഭാങ്കർ സെൻ പറഞ്ഞു. ലളിതവും വിശ്വസനീയവും ലാഭകരവുമായ ഊർജ്ജം ഉപഭോക്താക്കൾക്ക് ലഭ്യമാക്കുന്നതിലൂടെ സുഖപ്രദമായ ജീവിതശൈലി ഉറപ്പാക്കുകയാണ് ലക്ഷ്യമിടുന്നത്. രാജ്യത്തിന്റെ ഊർജ സംരക്ഷണ പ്രവർത്തനങ്ങളിൽ സിഎൻജി, പിഎൻജി വിഭാഗത്തിന്റെ പ്രാധാന്യം വർധിപ്പിക്കാനും ക്യാംപെയ്നിലൂടെ സാധിക്കുമെന്നും ശുഭാങ്കർ സെൻ അഭിപ്രായപ്പെട്ടു. ഉപഭോക്തൃ ബോധവൽക്കരണത്തിനു പുറമെ വിവിധ കമ്മ്യൂണിറ്റി പ്രോഗ്രാമുകൾ, സൈബറിടങ്ങളിലെ പ്രവർത്തനങ്ങൾ എന്നിവയും സംഘടിപ്പിക്കും. രാജ്യത്തിന്റെ ഊർജ ഉപയോഗത്തിൽ പ്രകൃതി വാതകങ്ങളുടെ പങ്ക് 6.5 ശതമാനമാണ്. 2030നകം 15 ശതമാനത്തിലേക്ക് ഉയർത്തുകയാണ് ലക്ഷ്യമിടുന്നത്. ഊർജ്ജ സുരക്ഷയ്ക്കും പരിസ്ഥിതി സംരക്ഷണത്തിനുമായി നടത്തുന്ന ക്യാംപെയ്ൻ, രാജ്യത്തിന്റെ സുസ്ഥിര വികസനത്തിന് കരുത്തേകുമെന്നും ബിപിസിഎൽ അറിയിച്ചു.
