ഇസിനോഫിലിക് മെനിംജൈറ്റിസ് സംശയിക്കുന്ന രോഗികൾക്ക് സൗജന്യമായി അഡ്വാൻസ്ഡ് സി.എസ്.എഫ് പി.സി.ആർ പരിശോധന ആരംഭിച്ച് കൊച്ചി അമൃത ആശുപത്രി. ഗുരുതരമായ ഈ രോഗത്തിന് കാരണമാകുന്ന ആൻജിയോസ്റ്റ്രോംഗിലസ് കാന്റോനെൻസിസ് എന്ന പരാസൈറ്റിനെ കൃത്യമായി കണ്ടെത്തുന്നതിനാണ് ഈ പരിശോധന.
കേരള അസോസിയേഷൻ ഓഫ് ന്യൂറോളജിസ്റ്റ്സ് (KAN) ൻറെ പിന്തുണയോടെയാണ് പദ്ധതി നടപ്പാക്കുന്നത്. കൊച്ചി അമൃത ആശുപത്രിയിലെ പീഡിയാട്രിക് ന്യൂറോളജി വിഭാഗം മേധാവി ഡോ. വിനയൻ. കെ.പി., അസോസിയേറ്റ് പ്രൊഫസർ ഡോ. വൈശാഖ് ആനന്ദ്, മൈക്രോബയോളജി വിഭാഗത്തിലെ ഡോ. വി. അനിൽ കുമാർ, മോളിക്യുലർ ബയോളജി ലാബിലെ ഡോ. സച്ചിൻ ഡേവിഡ്, അമൃത സെന്റർ ഫോർ നാനോസയൻസസ് ആൻഡ് മോളിക്യുലർ മെഡിസിനിലെ ഡോ. ലളിത ബിശ്വാസ് എന്നിവരുടെ നേതൃത്വത്തിലുള്ള സംഘമാണ് പരിശോധന നടത്തുന്നത്. കൊച്ചി ഐ.എം.എ. ഹൗസിൽ നടന്ന ന്യൂറോ ഇൻഫെക്ഷൻസ് ശിൽപ്പശാലയിൽ വെച്ച് കൊച്ചി അമൃത ആശുപത്രി അഡീഷണൽ മെഡിക്കൽ സൂപ്രണ്ട് ഡോ. കെ.വി. ബീന പുതിയ സൗജന്യ പരിശോധനാ പദ്ധതി പ്രഖ്യാപനം നടത്തി.
രോഗം വേഗത്തിൽ തിരിച്ചറിയാൻ കഴിയുന്നതിലൂടെ സമയബന്ധിത ചികിത്സ ഉറപ്പാക്കാനും ഗുരുതര പ്രത്യാഘാതങ്ങൾ കുറയ്ക്കാനും ഈ പദ്ധതി സഹായകരമാകുമെന്ന് കൊച്ചി അമൃത ആശുപത്രിയിലെ പീഡിയാട്രിക് ന്യൂറോളജി വിഭാഗം മേധാവി ഡോ. വിനയൻ. കെ.പി. അറിയിച്ചു. രോഗനിർണയത്തിൽ ഉയർന്ന കൃത്യതയും വേഗതയും ഉറപ്പാക്കുന്ന ഈ സൗകര്യം സംസ്ഥാനത്ത് ആദ്യമായാണെന്നും പൊതുജനാരോഗ്യ രംഗത്ത് ഇത് നിർണായക ഇടപെടലാകുമെന്നും ഡോ. വിനയൻ കൂട്ടിച്ചേർത്തു.
