ഭാരത് പെട്രോളിയം കോർപ്പറേഷൻ ലിമിറ്റഡിന്റെ (ബിപിസിഎൽ) പുതിയ ചെയർമാൻ ആൻഡ് മാനേജിംഗ് ഡയറക്ടറായി (സിഎംഡി) സഞ്ജയ് ഖന്നയെ നിയമിച്ചു.
പെട്രോളിയം പ്രകൃതിവാതക മന്ത്രാലയത്തിന് കീഴിലുള്ള സെർച്ച് കം സെലക്ഷൻ കമ്മിറ്റിയുടെ ശുപാർശയുടെ അടിസ്ഥാനത്തിൽ, കേന്ദ്ര മന്ത്രിസഭയുടെ നിയമന സമിതി (എസിസി) നിയമനത്തിന് അംഗീകാരം നൽകി. ബിപിസിഎൽ റിഫൈനറീസ് വിഭാഗം ഡയറക്ടറായി പ്രവർത്തിച്ചു വരികയായിരുന്നു അദ്ദേഹം. റിഫൈനറി പ്രവർത്തനങ്ങളിലും പദ്ധതി നിർവഹണത്തിലുമുള്ള സഞ്ജയ് ഖന്നയുടെ ദീർഘകാല പരിചയസമ്പത്ത് ബിപിസിഎല്ലിന് കരുത്താകുമെന്ന് കമ്പനി വാർത്താക്കുറിപ്പിൽ വ്യക്തമാക്കി. തിരുച്ചിറപ്പള്ളി നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ നിന്ന് കെമിക്കൽ എൻജിനീയറിങ്ങിൽ ബിരുദവും മുംബൈ സർവകലാശാലയിൽ നിന്ന് ഫിനാൻസ് മാനേജ്മെന്റിൽ ബിരുദാനന്തര ബിരുദവും നേടിയ സഞ്ജയ് ഖന്ന, ബിപിസിഎല്ലിന്റെ റിഫൈനിങ് മികവ് മെച്ചപ്പെടുത്തുന്നതിലും പെട്രോകെമിക്കൽ ഉത്പാദനശേഷി വർധിപ്പിക്കുന്നതിലും നിർണായക പങ്ക് വഹിച്ചിട്ടുണ്ട്.
