കൊടുംചൂടില് വെന്തുരുകുന്നതുപോലെ വിയര്ക്കുകയും തളരുകയും ഉഷ്ണത്താല് പുകയുകയും ചെയ്യുക മാത്രമല്ല തലവേദനയും ശരീരവേദനയും കൂടി വലയ്ക്കുന്നുണ്ടോ? അന്തരീക്ഷ താപനില കൂടുമ്പോള് ഇത്തരം വേദനകളും പല ആളുകളേയും വലയ്ക്കുകയാണ്. മൈഗ്രേന് ഉള്പ്പെടെയുള്ള ബുദ്ധിമുട്ടുകള് ഉഷ്ണകാലത്ത് കൂടുന്നതായി തോന്നുന്നുണ്ടോ? ശരീരത്തിന്റെ പല ഭാഗങ്ങളിലും വേദന അനുഭവപ്പെടുന്നുണ്ടോ? കാരണങ്ങളും പരിഹാരമാര്ഗങ്ങളും അറിയാം.
വേദനയ്ക്ക് കാരണമെന്ത്?
നിര്ജലീകരണം തന്നെയാണ് ഇത്തരം പല വേദനകള്ക്കും കാരണം. സന്ധികളിലെ ഉള്പ്പെടെ സ്രവങ്ങളുടെ അളവ് കുറയുന്നത് വാതം ഉള്പ്പെടെയുള്ള പ്രശ്നങ്ങള് വര്ധിപ്പിക്കാം. അമിത വിയര്പ്പിലൂടെ ഇലക്ട്രോലൈറ്റുകള് നഷ്ടമാകുന്നതും തലവേദനയും ശരീരവേദനയും ഉണ്ടാക്കാം.
വേദന ലഘൂകരിക്കാന് ഇക്കാര്യങ്ങള് പരീക്ഷിക്കാം.
നന്നായി വെള്ളം കുടിക്കുന്നതിനൊപ്പം ഭക്ഷണത്തിലും മാറ്റങ്ങള് വരുത്തണം. ജലാംശം കൂടുതലുള്ള ഫല വര്ഗങ്ങളും പച്ചക്കറികളും കൂടുതലായി കഴിക്കണം. കരിക്ക് വെള്ളം, സംഭാരം, നാരങ്ങാ വെള്ളം മുതലായവയും ഉപയോഗിക്കാം.
മഗ്നീഷ്യം കൂടുതലുള്ള നട്ട്സ്, പംകിന് സീഡ്സ് പോലുള്ളവയൊക്കെ കഴിയ്ക്കുന്നത് ചൂടുകാലത്തെ തലവേദന ലഘൂകരിക്കാന് സഹായിക്കും.
സൂര്യന് കത്തി നില്ക്കുന്ന സമയത്ത് വ്യായാമം ചെയ്യുന്നത് ഒഴിവാക്കാം. പകരം പുലര്ച്ചെ വ്യായാമം ചെയ്യാം.
