ന്യൂഡൽഹി: ഇന്ത്യന് ബഹിരാകാശ സഞ്ചാരി ശുഭാംശു ശുക്ലയുടെ രാജ്യാന്തര ബഹിരാകാശ നിലയത്തിലേക്കുള്ള യാത്ര വീണ്ടും മാറ്റി. ദൗത്യം ഞായറാഴ്ച നടക്കുമെന്ന് ആക്സിയം സ്പേസ് കമ്പനി അറിയിച്ചു. നാളെ നടത്താനാണ് മുന്പ് തീരുമാനിച്ചിരുന്നത്.എന്നാൽ സാങ്കേതിക കാരണങ്ങളാല് ദൗത്യം വീണ്ടും മാറ്റിവയ്ക്കുകയായിരുന്നു. ഇക്കാര്യം ഐഎസ്ആര്ഒയും സ്ഥിരീകരിച്ചിട്ടുണ്ട്.
ആക്സിയം സ്പേസ്, നാസ, ഐ എസ് ആര് ഒ എന്നിവയുടെ സംയുക്ത ദൗത്യമാണിത്. 31 രാജ്യങ്ങളില് നിന്നായി 60 ശാസ്ത്ര പരീക്ഷണങ്ങള് ആക്സിയം 4 ദൗത്യത്തിന്റെ ഭാഗമാണ്. പരിചയസമ്പന്നയായ പെഗ്ഗി വിറ്റ്സനാണു യാത്രയുടെ കമാന്ഡര്. സ്ലാവോസ് വിസ്നീവ്സ്കി (പോളണ്ട്), ടിബോര് കാപു (ഹംഗറി) എന്നീ 2 യാത്രികരും ഒപ്പമുണ്ട്. 715 കോടി രൂപയാണ് ശുഭാംശുവിന്റെ യാത്രയ്ക്കായി ഇന്ത്യ ചിലവിടുന്നത്.
ഈ മാസം 22ന് ഇന്ത്യന് സമയം ഉച്ചയ്ക്ക് 1:12ന് വിക്ഷേപണം നടക്കുമെന്നാണ് ആക്സിയം സ്പേസ് കമ്പനി വ്യക്തമാക്കിയിരിക്കുന്നത്. അന്താരാഷ്ട്ര ബഹിരാകാശ നിലയത്തിലെ സ്വെസ്ദ മോഡ്യൂളില് നടന്ന അറ്റകുറ്റ പണികള്ക്ക് ശേഷം നിലയത്തിന്റെ പ്രവര്ത്തനം വിലയിരുത്തുന്നത് തുടരുകയാണ്. മെയ് 29 ന് തീരുമാനിച്ചിരുന്ന ദൗത്യം, ഫാൽക്കൺ 9 റോക്കറ്റിന്റെ ബൂസ്റ്ററുകളിൽ ദ്രാവക ഓക്സിജൻ ചോർച്ച കണ്ടെത്തിയതിനെത്തുടർന്നാണ് ആദ്യം മാറ്റിവെച്ചത്.
