ശിവകാർത്തികേയൻ, സായ് പല്ലവി എന്നിവരെ കേന്ദ്രകഥാപാത്രങ്ങളായി രാജ്കുമാർ പെരിയസാമി ഒരുക്കിയ ചിത്രമായിരുന്നു ‘അമരൻ’. മികച്ച പ്രേക്ഷക-നിരൂപക പ്രശംസ നേടിയ ചിത്രം ഗോവയിൽ നടന്ന രാജ്യാന്തര ചലച്ചിത്ര മേളയിലെ മത്സരവിഭാഗത്തിൽ ഉൾപ്പെടെ പ്രദർശിപ്പിച്ചിരുന്നു. ‘അമരന്’ ശേഷം ധനുഷിനെ നായകനാക്കി രാജ്കുമാർ ഒരു സിനിമ പ്രഖ്യാപിച്ചിരുന്നു. ഈ സിനിമയുമായി ബന്ധപ്പെട്ട ചില സ്ഥിരീകരിക്കാത്ത അപ്ഡേറ്റുകളാണ് കഴിഞ്ഞ കുറച്ചു ദിവസങ്ങളായി സമൂഹമാധ്യമങ്ങളിൽ ചർച്ചാ വിഷയം.
രാജ്കുമാർ പെരിയസാമി-ധനുഷ് ചിത്രത്തിൽ ഒരു പ്രധാന വേഷത്തിൽ മമ്മൂട്ടി എത്തുന്നതായാണ് സോഷ്യൽ മീഡിയയിൽ പ്രചരിക്കുന്നത്. 15 കോടി രൂപയാണ് താരത്തിന് പ്രതിഫലമായി ഓഫർ ചെയ്തതെന്നാണ് റിപ്പോർട്ട്. എന്നാൽ ഇക്കാര്യം മമ്മൂട്ടിയോ സിനിമയുടെ അണിയറ പ്രവർത്തകരോ സ്ഥിരീകരിച്ചിട്ടില്ല. സായ് പല്ലവിയാകും ചിത്രത്തിലെ നായികയെന്നും സൂചനയുണ്ട്. നേരത്തെ, നായികയുടെ റോളിലേക്ക് പൂജാ ഹെഗ്ഡെയെ പരിഗണിച്ചിരുന്നു.
