ബി.ജെ.പി. നേതൃത്വത്തിലുള്ള എൻ.ഡി.എ. വീണ്ടും അധികാരത്തിലേറാനൊരുങ്ങുമ്പോൾ പ്രധാനമന്ത്രി നരേന്ദ്രമോദിയെ അനുമോദിച്ച് ലോകനേതാക്കൾ. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവാണ് അനുമോദനവുമായെത്തിയ ആദ്യ രാഷ്ട്രത്തലവൻ. പാകിസ്താൻ പ്രധാനമന്ത്രി ഇമ്രാൻ ഖാൻ, ചൈനീസ് പ്രസിഡന്റ് ഷി ജിൻപിങ് തുടങ്ങിയവരും അനുമോദിച്ചു. ജപ്പാൻ പ്രധാനമന്ത്രി ആബെ ഷിൻസോ പ്രധാനമന്ത്രിയെ ഫോണിൽ വിളിച്ച് അഭിനന്ദനമറിയിച്ചു.