വിദേശ ബാങ്കുകളില്‍ പണം നിക്ഷേപിച്ച കൂടുതല്‍ ഇന്ത്യാക്കാരുടെ പേരുകള്‍ പുറത്തായി. 2006-2007 കാലയളവില്‍ ജനീവയിലെ എച്ച്.എസ്.ബി.സി ബാങ്കില്‍ നിക്ഷേപം നടത്തിയവരുടെ പേരുകളും ബാലന്‍സുമാണ് പുറത്തുവന്നത്. എന്നാല്‍ ലിസ്റ്റ് കേന്ദ്രസര്‍ക്കാരിന് നേരത്തെ ലഭിച്ചുവെന്നും പേരുകള്‍ മാത്രംപോര അവര്‍ക്കെതിരെയുള്ള തെളിവുകളാണ് വേണ്ടതെന്നും കേന്ദ്രമന്ത്രി അരുണ്‍ ജയ്റ്റ്‌ലി പറഞ്ഞു. തെളിവുകള്‍ ലഭിച്ച ഏതാണ്ട് അറുപത് പേര്‍ക്കെതിരെ ആദായവകുപ്പ് നടപടിയാരംഭിച്ചെന്നും അദ്ദേഹം പറഞ്ഞു.

 

ഒരു മലയാളിയും പുതിയ പട്ടികയിലിടം പിടിച്ചിട്ടുണ്ട്. കണ്ണൂരില്‍ ജനിച്ച 84 കാരി ആനി മെനൗഡിന് ഒരു ലക്ഷം ഡോളറിന്റെ നിക്ഷേപമാണ് ഉള്ളത്. സ്റ്റെനോഗ്രാഫറായിരുന്ന ആനി ദുബായിലാണ് അക്കൗണ്ട് ആരംഭിച്ചത്. കോട്ടയം സ്വദേശികള്‍ക്കും കള്ളപ്പണ നിക്ഷേപമുള്ളതായി പുറത്തു വന്ന റിപ്പോര്‍ട്ടില്‍ പറയുന്നു. ഇവരുടെ പേരുകള്‍ ലഭ്യമായിട്ടില്ല.

2011-ല്‍ ഫ്രഞ്ച് അധികൃതര്‍ കേന്ദ്രസര്‍ക്കാരിന് കൈമാറിയതിന്റെ ഇരട്ടിയോളം പേരുടെ പട്ടികയാണ് പുതിയതായി പുറത്തുവന്നത്. ഫ്രഞ്ച് അധികൃതര്‍ 628 പേരുടെ പട്ടികയായിരുന്നു കൈമാറിയിരുന്നത്. പുതിയ പട്ടികയില്‍ 1195 പേരുടെ പേരുകളാണുള്ളത്. ദ ഇന്ത്യന്‍ എക്‌സ്പ്രസ് ദിനപത്രം വാഷിംഗ്ടണ്‍ ആസ്ഥാനമായുള്ള ഇന്‍വെസ്റ്റിഗേറ്റീവ് ജേര്‍ണലിസ്റ്റ് കണ്‍സോര്‍ഷ്യം (ഐ.സി.ഐ.ജെ), പാരീസ് ആസ്ഥാനമായുള്ള ലാ മോണ്ടെ ന്യൂസ്‌പേപ്പര്‍ എന്നിവയുമായി ചേര്‍ന്ന് നടത്തിയ മൂന്ന് മാസം നീണ്ട അന്വേഷണത്തിലാണ് പുതിയ വിവരങ്ങള്‍ പുറത്തുവന്നത്. എന്നാല്‍ ഇത് മുഴുവന്‍ കള്ളപ്പണ നിക്ഷേപകരാണെന്ന് കരുതാന്‍ കഴിയില്ലെന്നും റിപ്പോര്‍ട്ടില്‍ പറയുന്നുണ്ട്.