ഹാമില്‍ട്ടണ്‍: ലോകകപ്പ് ക്രിക്കറ്റ് പൂള്‍ ബിയിലെ ആദ്യ മത്സരത്തില്‍ സിംബാബ്വെക്കെതിരേ ദക്ഷിണാഫ്രിക്കക്ക് കൂറ്റന്‍ സ്കോര്‍. ഡേവിഡ് മില്ലറുടെയും ഡുമിനിയുടെയും സെഞ്ച്വറി കരുത്തില്‍ ദക്ഷിണാഫ്രിക്ക 339 റണ്‍സ് വിജയലക്ഷ്യം കുറിച്ചു. മില്ലര്‍ 92 ബോളില്‍ 138 റണ്‍സും ഡുമിനി 100 ബോളില്‍ 115 റണ്‍സും എടുത്തു. മുന്‍ നിരയുടെ തകര്‍ച്ചക്ക് ശേഷം നാലിന് 83 എന്ന നിലയില്‍ നിന്നാണ് ഇരുവരും ദക്ഷിണാഫ്രിക്കയെ കരകയറ്റിയത്. ഏകദിന ക്രിക്കറ്റില്‍ മില്ലറുടെ രണ്ടാം സെഞ്ച്വറിയാണിത്. ഏഴു റണ്‍സെടുത്ത ഡി കോക്കിനെ തെന്‍ഡായ് ചിതരയും 11 റണ്‍സെടുത്ത ഹഷിം അംലയെ തിനാഷെ പനിയന്‍ഗരയും പുറത്താക്കി. ഡു പ്ലെസിസ് (24) എല്‍ട്ടന്‍ ചിഗുംബുരയ്ക്കു വിക്കറ്റ് നല്‍കി മടങ്ങി. പിന്നാലെ ഡിവില്ലിയേഴ്സും (25 റണ്‍സ്) പുറത്തായി. ടോസ് നേടിയ സിംബാവെ ദക്ഷിണാഫ്രിക്കയെ ബാറ്റിങ്ങിന് അയക്കുകയായിരുന്നു. ഹാമില്‍ട്ടണിലാണ് മത്സരം.