ബി ബി സി സംപ്രേഷണം ചെയ്ത 'ഇന്ത്യയുടെ മകള്‍' ഡോക്യുമെന്ററിയില്‍ നടത്തിയ വിവാദ പരാമര്‍ശങ്ങളുമായി ബന്ധപ്പെട്ട് ഡല്‍ഹി കൂട്ടബലാത്സംഗക്കേസിലെ രണ്ട് പ്രതിഭാഗം അഭിഭാഷകര്‍ക്ക് സുപ്രീം കോടതി നോട്ടീസയച്ചു. ജസ്റ്റിസ് വി ഗോപാല്‍ ഗൗഡ അധ്യക്ഷനായ ബഞ്ചാണ് അഭിഭാഷകരായ എം എല്‍ ശര്‍മ, എ പി സിങ് എന്നിവര്‍ക്ക് നോട്ടീസയച്ചത്. 

വിഷയം ഗൗരവമേറിയതാണെന്ന് ബഞ്ച് നിരീക്ഷിച്ചു. അഭിഭാഷകര്‍ രണ്ടാഴ്ചയ്ക്കകം നോട്ടീസിന് മറുപടി നല്‍കണം. സുപ്രീം കോടതിയിലെ വനിതാ അഭിഭാഷകരുടെ സംഘടന നല്‍കിയ ഹര്‍ജിയിലാണ് നടപടി. സുപ്രീം കോടതിയില്‍ കേസുകള്‍ വാദിക്കുന്നതില്‍നിന്ന് രണ്ട് അഭിഭാഷകരെയും വിലക്കണമെന്നാണ് വനിതാ അഭിഭാഷകര്‍ ആവശ്യപ്പെട്ടിട്ടുള്ളത്.