തൃശൂര്: ശോഭാ സിറ്റിയിലെ സെക്യൂരിറ്റി ജീവനക്കാരന് ചന്ദ്രബോസിനെ ആക്രമിച്ച് വാഹനമിടിച്ച് കൊലപ്പെടുത്തിയ കേസില് വ്യവസായി മുഹമ്മദ് നിസാമിനെതിരെ കാപ്പ ചുമത്തി. ജില്ലാ എക്സിക്യൂട്ടീവ് മജിസ്ട്രേറ്റ് കൂടിയായ തൃശൂര് ജില്ലാ കളക്ടര് എം.എസ് ജയ ആണ് സാമൂഹ്യ വിരുദ്ധ പ്രവര്ത്തനം തടയല് നിയമം (കാപ്പ) ചുമത്തിയത്.
നേരത്തെ നിസാമിനെതിരെ കാപ്പ ചുമത്തുന്ന കാര്യത്തില് കലക്ടര് നിയമോപദേശം തേടിയിരുന്നു. നിസാം കോടതിക്കു പുറത്ത് ഒത്തുതീര്ത്ത കേസുകള് കാപ്പ ചുമത്താന് പരിഗണിക്കാമോ എന്ന സംശയം നിലനില്ക്കുന്ന സാഹചര്യത്തിലായിരുന്നു ഇത്.
പൊലിസ് കലക്ടര്ക്ക് സമര്പ്പിച്ച റിപ്പോര്ട്ടില് നിസാം 13 കേസുകളില് പ്രതിയാണെന്നാണ് പറയുന്നത്. എന്നാല്, ഇതില് പകുതിയിലേറെ ഒത്തുതീര്ത്തതിനാല് ശിക്ഷയുണ്ടായില്ല. എങ്കിലും അത്തരം കേസുകള് കാപ്പ ചുമത്താന് പരിഗണിക്കാമെന്നാണ് പൊലിസിന് നിയമോപദേശം ലഭിച്ചിരുന്നു.
Comments