തിരുവനന്തപുരം: സംസ്ഥാനത്ത് നേതൃമാറ്റത്തെ പറ്റിയുള്ള ചര്‍ച്ചകള്‍ തള്ളി ആഭ്യന്തര മന്ത്രി രമേശ് ചെന്നിത്തല. നേതൃമാറ്റം അജണ്ടയിലി െല്ലന്ന് ചെന്നിത്തല മാധ്യമങ്ങളോട് പറഞ്ഞു. ഭരിക്കുമ്പോള്‍ തെറ്റുകള്‍ സ്വാഭാവികമാണ്. തെറ്റുകള്‍ തിരുത്തി മുന്നോട്ട് പോയാല്‍ ഭരണത്തുടര്‍ച്ചയുണ്ടാകും. ജനവിശ്വാസം വര്‍ധിപ്പിക്കാന്‍ നടപടികള്‍ എടുക്കുമെന്നും ചെന്നിത്തല വ്യക്തമാക്കി.

ബാര്‍ കോഴക്കേസില്‍ മന്ത്രിയാണോ എന്ന് നോക്കിയല്ല വിജിലന്‍സ് മുന്നോട്ടുപോകുന്നത്. സത്യമുണ്ടോ എന്ന് പരിശോധിക്കാനാണ് എഫ്.ഐ.ആര്‍ രജിസ്റ്റര്‍ ചെയ്തത്. ഇതിന്‍െറ അടിസ്ഥാനത്തില്‍ രാജിവെക്കേണ്ട കാര്യമില്ല. ആരോപണം ഉയര്‍ന്നപ്പോള്‍ സ്ഥാനത്തുനിന്ന് മാറിയവരും മാറാത്തവരും ഉണ്ടെന്നും ചെന്നിത്തല പറഞ്ഞു.

ചട്ടങ്ങള്‍ അനുസരിച്ച് മാത്രമേ വിജിലന്‍സിന് മുന്നോട്ടുപോവാന്‍ സാധിക്കൂ. മാണിക്കും ബാബുവിനും രണ്ട് നീതിയാണെന്ന് മാധ്യമങ്ങള്‍ എഴുതിയെന്നും ചെന്നിത്തല ചൂണ്ടിക്കാട്ടി. ബാര്‍ കോഴ ആരോപിക്കുമ്പോള്‍ ഐ ഗ്രൂപ്പുകാരെ ഒഴിവാക്കി എന്ന ചോദ്യത്തോട്, അത് ബിജു രമേശ് മറുപടി പറയേണ്ട കാര്യമാണെന്ന് ചെന്നിത്തല പ്രതികരിച്ചു.

സംസ്ഥാനത്തെ നേതൃമാറ്റവുമായി ബന്ധപ്പെട്ട ചോദ്യങ്ങളില്‍ നിന്ന് ചെന്നിത്തല കഴിഞ്ഞദിവസം ഒഴിഞ്ഞുമാറിയിരുന്നു. സോളാര്‍, ബാര്‍ കോഴ എന്നിവ വിഷയമാക്കി ഐ ഗ്രൂപ്പ് നേതൃമാറ്റത്തിന് ശ്രമിക്കുന്നു എന്ന് കഴിഞ്ഞദിവസങ്ങളില്‍ മാധ്യമങ്ങള്‍ റിപ്പോര്‍ട്ട് ചെയ്തിരുന്നു.