കോണ്‍ഗ്രസിലെ പ്രശ്‌നങ്ങള്‍ പരിഹരിച്ചുവെന്നും യു.ഡി.എഫ് തീരുമാനങ്ങളുമായി മുന്നോട്ടുപോകുമെന്നും കെ.പി.സി.സി പ്രസിഡന്റ് വി.എം സുധീരന്‍ മാധ്യമങ്ങളോട് പറഞ്ഞു. തര്‍ക്കങ്ങള്‍ അപ്രസക്തമായെന്നും ഇപ്പോള്‍ എല്ലാം സാധാരണ നിലയിലാണെന്നും അദ്ദേഹം പറഞ്ഞു. മേഖലാജാഥ മാറ്റിവെക്കണമെന്ന് ലീഗ് ആവശ്യപ്പെട്ടിട്ടില്ലെന്ന് സുധീരനുമായി നടത്തിയ കൂടിക്കാഴ്ചയ്ക്കുശേഷം മന്ത്രി പി.കെ കുഞ്ഞാലിക്കുട്ടിയും പറഞ്ഞു. 

യു.ഡി.എഫ് യോഗം വൈകീട്ട് ചേരാനിരിക്കെ കോണ്‍ഗ്രസിലെ പ്രശ്‌നങ്ങള്‍ പരിഹരിക്കാന്‍ തിരക്കിട്ട ശ്രമങ്ങളാണ് തിങ്കളാഴ്ച നടന്നത്. മന്ത്രി കെ.സി ജോസഫ് ആഭ്യന്തരമന്ത്രി രമേശ് ചെന്നിത്തലയുമായും കെ.പി.സി.സി പ്രസിഡന്റ് വി.എം സുധീരനുമായും ചര്‍ച്ച നടത്തി. മന്ത്രിമാരായ പി.കെ കുഞ്ഞാലിക്കുട്ടിയും വി.കെ ഇബ്രാഹീം കുഞ്ഞും സുധീരനുമായും കൂടിക്കാഴ്ച നടത്തി. വൈകീട്ടോടെ മുഖ്യമന്ത്രിയും ആഭ്യന്തരമന്ത്രിയും കെ.പി.സി.സി ആസ്ഥാനത്തെത്തി സുധീരനുമായി ചര്‍ച്ച നടത്തും.