കതിരൂര്‍ മനോജ് വധക്കേസില്‍ സിപിഎം കണ്ണൂര്‍ ജില്ലാ സെക്രട്ടറി പി.ജയരാജനെ സിബിഐ ചോദ്യംചെയ്തു. അന്വേഷണസംഘം ചില വിവരങ്ങള്‍ ചോദിച്ചറിയാന്‍ വിളിപ്പിച്ചതാണെന്നും താന്‍ എല്ലാത്തിനും മറുപടി നല്കിയെന്നും ജയരാജന്‍ ചോദ്യം ചെയ്യലിനു ശേഷം മാധ്യമപ്രവര്‍ത്തകരോടു പറഞ്ഞു. ഇനി ചോദ്യം ചെയ്യലിനു ഹാജരാകാന്‍ തന്നോട് ആവശ്യപ്പെട്ടിട്ടില്ലെന്നും തത്കാലം മാധ്യമങ്ങളോടു കൂടുതലൊന്നും പറയാനില്ലെന്നും ജയരാജന്‍ പറഞ്ഞു.കഴിഞ്ഞ ബുധനാഴ്ചയാണു ചോദ്യംചെയ്യലിനു ഹാജരാകാന്‍ ജയരാജനു സിബിഐ നോട്ടീസ് നല്കിയത്. സിബിഐ ആസ്ഥാനത്തായിരുന്നു ചോദ്യംചെയ്യല്‍. മനോജ് വധത്തിനു പിന്നിലെ ഗൂഢാലോചന അന്വേഷിക്കുന്നതിന്റെ ഭാഗമായാണു ജയരാജനെ ചോദ്യംചെയ്തത്.