മലപ്പുറം: നിലവിളക്ക് വിഷയത്തില്‍ പരസ്യ പ്രസ്താവന പാടില്ലെന്ന് മുസ് ലിം ലീഗ്. പാര്‍ട്ടി നേതാക്കള്‍ക്ക് സംസ്ഥാന അധ്യക്ഷന്‍ പാണക്കാട് ഹൈദരലി ശിഹാബ് തങ്ങളാണ് കര്‍ശന നിര്‍ദേശം നല്‍കിയിട്ടുള്ളത്. വിഷയത്തില്‍ നേതാക്കള്‍ വ്യത്യസ്ത അഭിപ്രായം പ്രകടിപ്പിച്ച സാഹചര്യത്തിലാണ് നടപടി.

നിലവിളക്ക് കൊളുത്തുന്നതിനെ ചൊല്ലി മുസ് ലിം ലീഗിലെ അഭിപ്രായ ഭിന്നത മറനീക്കി പുറത്തു വന്നിരുന്നു. നിലവിളക്ക് കൊളുത്തേണ്ടതില്ലെന്നാണ് പാര്‍ട്ടി നിലപാടെന്ന ദേശീയ സെക്രട്ടറി ഇ.ടി മുഹമ്മദ് ബഷീറിന്‍െറ പ്രസ്താവന തള്ളി മന്ത്രി എം.കെ മുനീറാണ് രംഗത്തെത്തിയത്. നിലവിളക്ക് കൊളുത്തേണ്ടതില്ലെന്ന് പാര്‍ട്ടി നിലപാടെടുത്തിട്ടില്ലെന്നും കൊളുത്തുന്നത് ഓരോരുത്തരുടെയും വ്യക്തിപരമായ സ്വാതന്ത്യമാണെന്നും മുനീര്‍ ചൂണ്ടിക്കാട്ടിയിരുന്നു.