ബംഗളൂരു: അനധികൃത സ്വത്തു സമ്പാദന കേസില് ശിക്ഷിക്കപ്പെട്ട് ജയിലില് കഴിയുന്ന മുന് തമിഴ്നാട് മുഖ്യമന്ത്രി ജയലളിത പാര്ട്ടി അധ്യക്ഷ സ്ഥാനം ഒഴിയണമെന്ന് പാര്ട്ടിക്കുള്ളില് നിന്നും ആവശ്യമുയര്ന്നു. എ.ഐ.ഡി.എം.കെ അംഗമായ രാമ സുബ്രഹ്മണ്യന് ആണ് ഇക്കാര്യം ആവശ്യപ്പെട്ട് ജയലളിതക്ക് കത്തെഴുതിയത്. ശിക്ഷിക്കപ്പെട്ടതിന്റെ ധാര്മിക ഉത്തരവാദിത്തം ഏറ്റെടുത്ത് സ്ഥാനം ഒഴിയണമെന്നും അതുവഴി പാര്ട്ടിയിലെ മറ്റു നേതാക്കള്ക്ക് മാതൃക കാണിക്കണമെന്നും കത്തില് പറയുന്നു.
താങ്കള് ഒരു നേതാവാണ്. നമ്മുടെ പാര്ട്ടി ചട്ടമനുസരിച്ച് ജനറല് സെക്രട്ടറിക്കെതിരെ ഒരു നടപടിയും എടുക്കാന് ആര്ക്കും അധികാരമില്ല. അതുകൊണ്ടു തന്നെ ശിക്ഷിക്കപ്പെട്ടതിന്റെ ധാര്മിക ഉത്തരവാദിത്തം ഏറ്റെടുത്ത് സ്വയം രാജി വെച്ചൊഴിയുകയാണ് വേണ്ടത്.
അധ്യക്ഷ സ്ഥാനം ഒഴിഞ്ഞാലും താങ്കള് തന്നെയായിരിക്കും പാര്ട്ടി നേതാവെന്നും സുപ്രീംകോടതിയില് നിരപരാധിത്തം തെളിയിച്ച് മടങ്ങിവരണമെന്നും കത്തില് പറയുന്നു.
ആദ്യമായാണ് ജയലളിതയുടെ രാജി ആവശ്യപ്പെട്ട് പാര്ട്ടിക്കുള്ളില് നിന്ന് ശബ്ദം ഉയരുന്നത്. മുന് ബി.എസ്.പി നേതാവായ സുബ്രഹ്മണ്യന് 2010ലാണ് എ.ഐ.ഡി.എം.കെയില് ചേരുന്നത്.
Comments