കോഴിക്കോട്: പ്രതിരോധ മന്ത്രി അരുണ്‍ ജെയ്റ്റ്‌ലി രാജ്യത്തിന് വേണ്ടി ജീവന്‍ സമര്‍പ്പിച്ച യഥാര്‍ത്ഥ രക്തസാക്ഷികളെ മറന്നുവെന്ന് എം.ബി രാജേഷ് എം.പി. രാജ്യത്തിന് വേണ്ടി ജീവന്‍ സമര്‍പ്പിച്ച പട്ടാളക്കാരായ നിരവധി രക്തസാക്ഷികളുടെ വീട് കേരളത്തിലുണ്ട്.തിരക്കുള്ള ഔദ്യോഗിക ജീവിതത്തിനിടെ കേരളത്തിലെത്തി ഗുണ്ടാ ആക്രമത്തില്‍ കൊല്ലപ്പെട്ട ആര്‍.എസ്.എസ് നേതാവിന്റെ വീട് സന്ദര്‍ശിക്കാന്‍ സമയം കണ്ടെത്തിയ അരുണ്‍ ജെയ്റ്റ്‌ലി അവിടെ കൂടി സന്ദര്‍ശിക്കേണ്ടിയിരുന്നുവെന്നും എം.ബി രാജേഷ് എം.പി പറഞ്ഞു. ഫെയിസ്ബുക്ക് പേജിലൂടെ പ്രതിരോധ മന്ത്രിക്കെഴുതിയ തുറന്ന കത്തിലൂടെയാണ് ജെയ്റ്റ്‌ലിയുടെ കേരള സന്ദര്‍ശനത്തെ വിമര്‍ശിച്ച് കൊണ്ട് എം.ബി രാജേഷ് രംഗത്തെത്തിയിരിക്കുന്നത്. കേരളത്തിലെത്തുന്ന പാര്‍ട്ടി നേതാക്കളെ പൂമാലയും ബൊക്കയും നല്‍കിയാണ് സ്വീകരിക്കുകയെന്നും മറിച്ച് കല്ലേറിലൂടെയും പ്രതിഷേധത്തിലൂടെയുമല്ലായെന്നും ഇപ്പോള്‍ പ്രതിരോധ മന്ത്രിക്ക് മനസിലായിട്ടുണ്ടാവുമെന്നും രാജേഷ് തന്റെ കത്തില്‍ ചൂണ്ടിക്കാട്ടുന്നു.