തിരുവനന്തപുരം: മന്ത്രിസഭാ തീരുമാനങ്ങള്‍ പുറത്തുവിടാനാകില്ലെന്ന് മുഖ്യമന്ത്രി പിണറായി വിജയന്‍. മന്ത്രിസഭാ തീരുമാനത്തിന്റെ കാര്യമെടുത്താല്‍ ചില തീരുമാനങ്ങള്‍ പുറത്തുപോകുന്നതിന് മുന്‍പ് നടപ്പിലാക്കേണ്ടി വരും. അത് ആദ്യം പുറത്ത് കൊടുക്കില്ല. പുറത്ത് കൊടുത്താല്‍ നടപടി നിരര്‍ത്ഥകമായിപ്പോകും. അത്തരം കാര്യങ്ങളും ഈ വിഷയത്തെ സമീപിക്കുമ്പോള്‍ മനസില്‍ വെക്കേണ്ടതായിട്ടുണ്ട്. ഇങ്ങനെ തീരുമാനങ്ങള്‍ പുറത്തുവിടുന്നത് ലക്ഷ്യം നേടുന്നതിന് തടസം സൃഷ്ടിക്കുമെന്ന് മുഖ്യമന്ത്രി അഭിപ്രായപ്പെട്ടു. വ്യക്തിപരമായ ദുരുദ്ദ്യേശത്തോടുകൂടി ചിലര്‍ വിവരാവകാശ നിയമത്തെ ദുരുപയോഗം ചെയ്യുന്നുണ്ടെന്നും ഇത്തരം പ്രവണതകള്‍ അനുവദിക്കാനാകില്ലെന്നും മുഖ്യമന്ത്രി വ്യക്തമാക്കി. വിവരാവകാശ നിയമപ്രകാരം വിവരങ്ങള്‍ വെളിപ്പെടുത്തുന്നതില്‍ വിവേചനം വേണമെന്ന് മുഖ്യമന്ത്രി ആവശ്യപ്പെട്ടു. വിവരാവകാശ നിയമം വ്യക്തിപരമായി ദുരുപയോഗിക്കുന്നവരെ തിരിച്ചറിയണം. അതേസമയം ദുരപയോഗം മറയാക്കി വിവരങ്ങള്‍ നല്‍കാതിരിക്കുന്ന സ്ഥിതിയും ഉണ്ടാകരുത്. സംസ്ഥാനത്ത് അഴിമതി പടരുകയാണ്. വികസനം ലക്ഷ്യപ്രാപ്തിയില്‍ എത്താതെ മറ്റുവഴികളിലൂടെ ചോര്‍ന്ന് പോവുകയാണ് മുഖ്യമന്ത്രി അഭിപ്രായപ്പെട്ടു. ശുദ്ധമായും സുതാര്യമായും കാര്യങ്ങള്‍ നടപ്പിലാക്കുക എന്നതാണ് സര്‍ക്കാര്‍ ലക്ഷ്യമിടുന്നത്. മുഖ്യമന്ത്രി തിരുവനന്തപുരത്ത് പറഞ്ഞു.