ലക്നൗ ∙ സമാജ്‌വാദി പാർട്ടിയും കോൺഗ്രസും ഉത്തർപ്രദേശ് നിയമസഭാ തിരഞ്ഞെടുപ്പിൽ ഒരുമിച്ചു മൽസരിക്കും. കോൺഗ്രസ് സമാജ്‌വാദി പാർട്ടി ലക്നൗവിൽ നടത്തിയ സംയുക്ത വാർത്താസമ്മേളനത്തിലാണ് സഖ്യതീരുമാനം പ്രഖ്യാപിച്ചത്. ഇന്നു നടന്ന സീറ്റുവിഭജന ചർച്ചകളിൽ ഇരുകൂട്ടർക്കും സ്വീകാര്യമായ ധാരണ ഉരുത്തിരിഞ്ഞതോടെയാണ് സഖ്യം രൂപീകരിച്ച് മൽസരിക്കാനുള്ള തീരുമാനം. സംസ്ഥാനത്തിന്റെ സമഗ്രവളർച്ചയ്ക്കായും പാവപ്പെട്ട ജനങ്ങളുടെ ഉന്നമനത്തിനായും ചേർന്നു പ്രവർത്തിക്കുമെന്ന് നേതാക്കൾ വ്യക്തമാക്കി. അന്തിമ ധാരണയനുസരിച്ച് കോൺഗ്രസ് 105 സീറ്റിലും സമാജ്‍‌വാദി പാർട്ടി 298 സീറ്റുകളിലും മൽസരിക്കും. സമാജ്‌വാദി പാർട്ടിയുടെ അഖിലേഷ് യാദവ് മുഖ്യമന്ത്രി സ്ഥാനാർഥി. കോൺഗ്രസ് അധ്യക്ഷ സോണിയ ഗാന്ധി ഉൾപ്പെടെയുള്ളവർ നേരിട്ട് ഇടപെട്ടതോടെയാണ് സഖ്യത്തിന് അന്തിമ ധാരണയായത്.