ചെന്നൈ: എംഎൽഎമാരുടെ പിന്തുണ ഉറപ്പാക്കാനായി ശശികല എംഎൽഎമാരുമായി കൂടിക്കാഴ്ച നടത്തുന്നു. ഭീഷണികളിൽ ഭയപ്പെടില്ലെന്നും എല്ലാ പ്രതിസന്ധികളും തരണം ചെയ്ത് തമിഴ്നാട്ടിൽ പുതിയ സർക്കാർ രൂപീകരിക്കുമെന്നും ശശികല പറ‍ഞ്ഞു.മുൻകൂട്ടി തയാറാക്കിയ പദ്ധതിയാണ് ഇപ്പോൾ നടക്കുന്നത്. രാജ്യത്ത് ഏറ്റവും കൂടുതൽ അനുയായികളുള്ള മൂന്നാമത്തെ പാർട്ടിയാണ് അണ്ണാ ഡിഎംകെ. പാർട്ടിയെ പിളർത്താനുള്ള ശ്രമം അണികൾ തിരിച്ചറിയണമെന്നും അവർ പറഞ്ഞു. കൽപ്പാക്കത്ത് കഴിഞ്ഞിരുന്ന എംഎൽഎമാരെയും കൂവത്തൂരിലെത്തിച്ചിട്ടുണ്ട്. കൂടിക്കാഴ്ചയ്ക്കുശേഷം തുടർനടപടി തീരുമാനിക്കും. മുഖ്യമന്ത്രി ഒ.പനീർസെൽവവും കൂവത്തൂരിലെത്തുമെന്നാണ് റിപ്പോർട്ടുകൾ. കാര്യങ്ങൾ തനിക്കെതിരായാൽ ആത്മഹത്യ ചെയ്യുമെന്നു ഗവർണർക്കു കത്തെഴുതിയെന്ന പ്രചാരണവും ശശികല തള്ളി.ഇന്നലെയും ശശികല റിസോർട്ടിലെത്തി മൂന്നു മണിക്കൂറോളം എംഎൽഎമാരുമായി കൂടിക്കാഴ്ച നടത്തിയിരുന്നു.