ന്യൂഡല്ഹി: പാര്ലമെന്റിന്റെ ശീതകാല സമ്മേളനം അനാവശ്യ കാരണങ്ങള് പറഞ്ഞ് മോഡി സര്ക്കാര് അട്ടിമറിക്കാന് ശ്രമിക്കുകയാണെന്നു കോണ്ഗ്രസ്സ് അധ്യക്ഷ സോണിയാ ഗാന്ധി. ഇന്ത്യയുടെ പാര്ലമെന്റ് ജനാധിപത്യത്തിനു മേല് കരി നിഴലാണു മോഡി സര്ക്കാര് കൊണ്ടുവന്നിരിക്കുന്നതെന്നും സോണിയാ ഗാന്ധി വ്യക്തമാക്കി. കോണ്ഗ്രസ്സ് പ്രവര്ത്തക സമിതിയോഗത്തെ അഭിസംബോധന ചെയ്തു സംസാരിക്കുകയായിരുന്നു അവര്. ജി്.എസ്.ടി നടപ്പാക്കുന്നതില് വന്ന പാകപ്പിഴകള് ഇന്ത്യയുടെ നികുതി സമ്പ്രദായത്തെ പ്രതികൂലമായി ബാധിച്ചെന്നും സോണിയ കൂട്ടിച്ചേര്ത്തു. പരമ്പരാഗതമായി ശീതകാല സമ്മേളനം നവംബര് മൂന്നാം ആഴ്ച മുതല് ഡിസംബര് മൂന്നാം ആഴ്ച വരെയാണു നടത്തപ്പെടുന്നത്. എന്നാല്, ഇതുവരെ ശീതകാല സമ്മേളനത്തിന്റെ തീയതി പ്രഖ്യാപിച്ചിട്ടില്ല. ഇന്ത്യയുടെ ചരിത്രം തിരുത്താനുള്ള ശ്രമങ്ങളാണ് കേന്ദ്രസര്ക്കാര് നടത്തുന്നത്. ഇന്ത്യയുടെ ആദ്യ പ്രധാനമന്ത്രി ജവഹര്ലാല് നെഹ്റു രാജ്യത്തിന് നല്കിയ സംഭാവനകള് ഇല്ലാതാക്കാനുള്ള ശ്രമങ്ങളാണ് ഇപ്പോള് നടന്നുകൊണ്ടിരിക്കുന്നത്. 2019 ലോക്സഭാ തിരഞ്ഞെടുപ്പ് ലക്ഷ്യമാക്കി കോണ്ഗ്രസ് നടത്തുന്ന 18 മാസം നീളുന്ന കര്മ്മ പരിപാടികള്ക്ക് നേതൃത്വം നല്കുന്നതിനാണ് രാഹുല് ഗാന്ധിയെ പ്രസിഡന്റ് സ്ഥാനത്തേയ്ക്ക് ഉയര്ത്തുന്നത്.
Comments