വരാപ്പുഴയില്‍ വീട് ആക്രമിച്ച കേസിലെ പ്രതി ശ്രീജിത്ത് പോലീസ് കസ്റ്റഡിയില്‍ മരിച്ചതില്‍ പ്രതിഷേധിച്ച് ബിജെപിയുടെ ആഹ്വാനം ചെയ്ത ഹര്‍ത്താലില്‍ വ്യാപക ആക്രമം. പ്രധാന റോഡുകളിലൂടെയുള്ള വാഹനങ്ങളെല്ലാം ഹര്‍ത്താലനുകൂലികള്‍ തടഞ്ഞിട്ടു. വഴിയാത്രക്കാരെയടക്കം ബിജെപി പ്രവര്‍ത്തകര്‍ മര്‍ദ്ദിച്ചെന്ന പരാതിയും ഉയര്‍ന്നു. പറവൂരില്‍ ആശുപത്രിയിലേക്കുള്ള വാഹനങ്ങളും കടത്തിവിട്ടില്ല. അക്രമ സംഭവങ്ങള്‍ തടയുന്നതില്‍ പോലീസ്‌ നിഷ്‌ക്രിയത്വം പാലിക്കുന്നുവെന്ന പരാതിയും യാത്രക്കാര്‍ ഉയര്‍ത്തി. പിഞ്ചു കുഞ്ഞുമായി ആശുപത്രിയിലേക്ക് പോകുന്ന വാഹനത്തെ സമരക്കാര്‍ തടഞ്ഞത് സ്ഥലത്ത് സംഘര്‍ഷത്തിനിടയാക്കി. വഴിതടഞ്ഞത് ചോദ്യം ചെയ്ത കുഞ്ഞിന്റെ പിതാവിനെ ഹര്‍ത്താലനുകൂലികള്‍ ക്രൂരമായി മര്‍ദ്ദിച്ചു. അക്രമികള്‍ക്കെതിരെ പോലീസ് ഒരു നടപടിയും സ്വീകരിച്ചില്ല.