വനിതാ മാവോവാദി നേതാവ് കാട്ടാനയുടെ ആക്രമണത്തില്‍ കൊല്ലപ്പെട്ടതായി റിപ്പോര്‍ട്ട്. പശ്ചിമ ഘട്ടത്തില്‍ പ്രവര്‍ത്തിക്കുന്ന ഭവാനി ദളത്തിലെ അംഗം ലതയാണ് കൊല്ലപ്പെട്ടത്. മാവോവാദികള്‍ ഇറക്കിയ ലഘുലേഖയിയാണ് ലത കൊല്ലപ്പെട്ട വിവരം പറയുന്നത്. ആഗസ്റ്റ് ആറിന് വൈകിട്ട് നാടുകാണി വനമേഖലയിലുണ്ടായ കാട്ടാനയുടെ ആക്രമണത്തിലാണ് ഇവര്‍ കൊല്ലപ്പെട്ടതെന്നും ലഘുലേഖയില്‍ വ്യക്തമാക്കുന്നു. മൃതദേഹം ബന്ധുക്കളെയോ പ്രവര്‍ത്തകരെയോ കാണിക്കാതെ സംസ്‌കരിക്കേണ്ടി വന്നതിലുള്ള ഖേദപ്രകടനവും സംഘടന നടത്തുന്നുണ്ട്. 1996 മുതല്‍ സംഘടനയുമായി ഇവര്‍ക്ക് ബന്ധമുണ്ടെന്നാണ് വിവരം.